Nyöŋ 24 - JAM DE NHIALIC 2011

Pɔ̈k ku Nyöŋ de Thiëëk

¹ Go Mothe lueel an, “Na de raan nɔm tiiŋdɛn cï thiaak, ku jɔ bɛ lueel an cïï be kɔɔr, në biäk cï yen këdäŋ yök në yeguöp kë cïï kɔɔr. Ku jɔ awerek de päl ë tik gɔ̈ɔ̈r, ku gëm keek yen, ku jɔ cuɔp wei baaide.

² Ku na jɔ mony däŋ tik bɛ thiaak,

³ ku jɔ ë monyë bɛ guiir aya nɔn cï yen en be kɔɔr, ku be awerek de päl ë tik gɔ̈ɔ̈r ayadäŋ, ku gëm keek yen, ku jɔ cuɔp wei baaide, ku nɔn cï monydɛn ye röör rouwë thou.

⁴ Në ye ɣäänkë yiic kedhie, acïï monydɛn tueŋë yen duëër bɛ thiaak, abï ë tiiŋë dhil tïŋ ke ee kë cï dhiöök. Na le bɛ nyɔk ë thiëëk, ka abï aa awäc yen cï luöi Bɛ̈nydït. Wek cïï kërɛɛc dïït cït ee kënë bï looi në piny gëmë Bɛ̈nydït Nhialicdun week.

Lööŋ Kɔ̈k

⁵ “Të piac ë moc thiëëk, acïï bï aa lɛɛr tɔŋ, ku acïï bï gäm luɔi däŋ de kɔc juëc, abïï aa pɛ̈n luɔi cït ee kakë në ruöön tök, ago rëër baaide ku bïï tiiŋde tɔ mit piɔ̈u.

⁶ “Të cï yïn raan dhën këdäŋ, ke yï du kuurdɛn ee yen guär nöm tëde yen bä mac ë lɔ̈c nɔm. Kënë abï kë ye kɔc ke baai këcamden looi nyaai, këcam ee keek tɔ pïïr.

⁷ “Raan ëbɛ̈n raan lɔ kɔc ë Yithriɛl gɔpiic ku jɔ ke tɔ ee lïm, ku nɔn lee ke ɣaac, ke ke ye lïïm, raanë abï nɔ̈k. Në ee kueerë wek bï kërɛɛcë jɔ nyaai.

⁸ “Të de yen raan cïï ë wɛth dɔm, në them apiɛth bïï kë lëk ë Lebai yen looi, bäny ke kake Nhialic, ku kuanykï wɛ̈ɛ̈t cä gäm keek cök.

⁹ Takkï wenïïm në kë wään cï Bɛ̈nydït Nhialicdun luöi Miriam, wään bä wek bei ë Rip.

¹⁰ “Të cä wek raan thiääk wek dhën këdäŋ, du lɔ ɣönde, bä lupɔ lɔ bɛ̈ɛ̈i, lupɔ bï bɛ̈n mac ë lɔ̈c nɔm,

¹¹ tit biic ku tɔ yïn yïn lupɔ yen guöp.

¹² Na ee raan kuany nyin ke yï du lupɔ muk ke yïn agut cï wakɔ̈u,

¹³ ye lupɔ pɔ̈k nɔm yen thëën, ago nɔm dɛ lupɔ bï yen niin, ku jɔ piɔ̈u miɛt ëtɛ̈ɛ̈n ku thieei yïn, ku abï aa piathëpiɔ̈u tëde week në Bɛ̈nydït Nhialicdun nɔm.

¹⁴ “Duökï kɔc kuanynyïïn cïn nïïm käŋ ee luui në week ee wëŋ, kɔckuön ë Yithriɛl ayï kɔc lei rɛ̈ɛ̈r wun tök në wuötkuniic.

¹⁵ Yak keek gäm ariöpdɛn de luɔi ee köölë, ë kööl thok ëbɛ̈n, të ŋoot aköl ke kën lɔ piny, ku acïk keek ŋic nɔn bï kek keek dɔm, akɔɔrkï wëu. Na cïkkï keek tɔ dɔm wëuken, abïk dhiɛɛu ë wegup ë Bɛ̈nydït nɔm, ku we bï nïïm dɛ kërɛɛc bïï ë we gɔ̈k.

¹⁶ “Wärken ë mïth acïï keek bï aa nɔ̈k në biäk de awäny cïï mïthken looi, ku mïth acïï keek bï aa nɔ̈k në biäk de awäny cïï wärken looi, raan abï aa nɔ̈k në biäk de kërɛɛcdɛn cï looi yetök.

¹⁷ “Duökï yic de alɛi ku yic de mïth abɛɛr ee nööm, ku duökï lupɔ de tiiŋ abaar ee nööm mɛcë ë löny de kë cï dheen nɔm.

¹⁸ Takkï wenïïm wek ye lïïm në Rip go Bɛ̈nydït Nhialicdun we gäm nɔm lääu, yeka gäm Ɛn week ee löŋë.

¹⁹ “Të määt wek rɛɛpkun ë duumiic, rɛɛp cäk keek tem, na de rɛɛp kɔ̈k cï döŋ piny domic, ë rɛɛp cä ke temiic, duökï keek be lɔ bɛ̈ɛ̈i, abï keek nyäŋ alɛi, ku mïth abɛɛr, ku diëër abɛɛr, ago Bɛ̈nydït Nhialicdun week thieei në këriëëcduön yak looi yic ëbɛ̈n.

²⁰ Të cä wek mïth ke tiim ke olip tet raan tök, duökï be lɔ ciëën bäk ka cï döŋë bɛ lɔ tet, ayek kake kɔc lei, ku mïth abɛɛr, ku diëër abɛɛr.

²¹ Të cä wek mïth ke enap määtiic raan tök, duökï be lɔ në duum yiic, bäk ke bɛ lɔ beer yiic, mïth ke enap cï döŋë, ayek kake alɛi, ku mïth abɛɛr, ku diëër abɛɛr.

²² Duökï nïïm kɔn määr, wek aake ye lïïm ɣɔn ë Rip, yeka gäm Ɛn week ee löŋë.