Nyöŋ 23 - JAM DE NHIALIC 2011

Raan bïï Nyaai ë Kɔc ke Bɛ̈nydït Yiic

¹ Na wën ke lueel Mothe an, “Acïn mony cï roc, ku nɔn ee mony cïï ë ruɔŋde tɛ̈ɛ̈m bei, bï tɔ̈u në amatnɔm de Bɛ̈nydïtic.

² “Acïn adhiëthlëër ayï käude, ku nɔn ee käu de käu ë mïth ke kɔc cït ee kakë, agut cï rem ye rɛm thiëër, bïï tɔ̈u në amatnɔm de kɔc ke Bɛ̈nydïtic.

³ “Acïn raan de Ammon, ku nɔn ee raan de Mowap, ku nɔn ee mïth ke mïthken, bïï lɔ në amatnɔm de kɔc ke Bɛ̈nydït yiic, agut cï rem ye rɛm thiëër.

⁴ Acïk jaai bïk week gäm këcam kekë pïïu wään bä wek bei në Rip, ku acïk Balaam wën de Beyor, raan wun de Pethor ë Methopotamia riɔp bï week läm aciɛɛn.

⁵ Ku Bɛ̈nydït Nhialicdun akën jam de Balaam bɛ̈n piŋ, go aciɛɛn puk tɔ ye athiɛɛi, në biäk nhiɛɛr En week.

⁶ Në rëërdunic ke we ye jur, duökï de kë kuönykï ee juöörkë, ku duökï keek tɔ kueth.

⁷ “Ku duökï kɔc ke Edom biɔn gup, ayek kɔc raan ë week. Ku duökï kɔc ke Rip biɔn gup aya, wek cï kɔn rɛ̈ɛ̈r pinyden.

⁸ Gɔl ë rem de diäk leer tueŋ, mïth ke mïthken aduëërë ke lɔ në amatnɔm ë kɔc ke Bɛ̈nydït yiic.

Yak Paany de Rem de Tɔŋ tɔ Piɛthic

⁹ “Të täu wek ë paanyic, në akööl ke tɔŋ, wek bï këriëëc ëbɛ̈n dhil nyaai, ke bï week tɔ rac gup në biäk de ciɛɛŋ.

¹⁰ Na cï moc guöp rac, në biäk cï yen nyuöth wakɔ̈u, abï lɔ ë paany këc biic ku rëër ëtɛ̈ɛ̈n.

¹¹ Na cï piny aa thëën ke jɔ waak, na cï akɔ̈l lɔ piny ke jɔ bɛ̈n ë paanyic.

¹² “Wek bï röt luöi të de lɔ roor ë paany këc biic, ke we bï aa lɔ biic ëtɛ̈ɛ̈n.

¹³ Ŋɛk ë ye thieec muk ke ye töŋ de kake, ago në de raan guöp yäc ke wec piny ku kut lɔroordu nɔm.

¹⁴ Yak paanydun tɔ ɣeriic në biäk tɔ̈u ë Bɛ̈nydït Nhialicden ke week ë paanyic ke kony week, ku tɔ we tiam kɔc ke aterdun. Duökï kë cïï piɛth loi, kë bï Bɛ̈nydït tɔ wël Yekɔ̈u week.

Lööŋ Kɔ̈k

¹⁵ “Na de lïïm cï kat tëde kɔc de keek, ku cïk bɛ̈n tëde week, ke ke kɔɔr kuɔɔny, ke duökï keek puk nïïm ciëën.

¹⁶ Aduëërkï ke tɔ rɛ̈ɛ̈r wun tök në wuötkuniic, wun cïk lɔc, ku acäkkï keek bï luööi arac.

¹⁷ “Acïn moc ku nɔn ë tiiŋ de kɔc ke Yithriɛl bï ya akɔɔrröör ayï akɔɔrdiäär ë luaŋ ë yathic.

¹⁸ Ku ayï wëu ye keek bɛ̈ɛ̈i në kueer cït ee kënë, acïï keek bï aa lɛɛr ë Luaŋdïït de Bɛ̈nydït Nhialicden, ke ye miɔ̈c de gutguut, Bɛ̈nydït aman akɔɔrröör ku akɔɔrdiäär de Luɛ̈k yiic.

¹⁹ “Të cä wek wëu ku nɔn ee këcam ku nɔn ee këdäŋ pei dhën raanduön ë Yithriɛl, duökï tɔ puk nɔm në aŋuëk.

²⁰ Wek duëër aŋuëk aa kɔɔr të cä wek käŋ dhën alɛi, ku acie ka cäk keek dhën kɔckuön ke Yithriɛl. Riëëukï ee löŋë, ku Bɛ̈nydït Nhialicdun abï këriëëcdun ëbɛ̈n, kë lak looi thieei yic piny lak nöömë.

²¹ “Të cä wek gutguut lɛ̈k Bɛ̈nydït Nhialicdun, duökï këduön cä wek gutguut lueel be pɔ̈l, Bɛ̈nydït abï kë cï yïn gutguut lueel mukic, ku abï aa kërac të kën wek gutguut döt.

²² Acie kërac të kën yïn gutguut luöi Bɛ̈nydït,

²³ ku na cï gutguut lueel, abä them ëgɔk nɔn bï yïn en döt.

²⁴ “Të cath week kueer ee tɛ̈ɛ̈k domic dom de enap ë raandäŋ, wek duëër cam në mïth ke enap cït man ë kë kaarkï, ku duökï de ka bäk keek lɛɛr wut në diönyic.

²⁵ Ku të cath week kueer ee tɛ̈ɛ̈k domic dom de rap ë raandäŋ, wek duëër cam në kooi ke rɛɛp cäk keek nyuön ë wecin ëbɛ̈n, ku wek cïï rap bï tem në menyjel.