Nyöŋ 21 - JAM DE NHIALIC 2011

Lööŋ në Baŋ de Raan Kuc ë Nɛ̈k

¹ Na wën ke lueel Mothe an, “Na cï raan yök ke cï nɔ̈k roor, piny lee Bɛ̈nydït Nhialicdun gäm week, ku wek kuc raan ë näk en.

² Röördïtkun ku bäny ee lööŋ guiir abïk dhil lɔ biic ku themkï kaamic, gɔl të wën tɔ̈u ë raan cï thou thïn lee në pɛ̈ɛ̈nydït thiääk në tën ë thouwë raan thïn.

³ Ku ëtɛ̈ɛ̈n, röördït ke wun wën thiääk ke të wën cïï ë raan nɔ̈k thïn, abïk miɔɔr bɛ̈ɛ̈i, miɔɔr kën kɔn lui, ku kën ka ke pɔ̈ɔ̈r kɔn ket.

⁴ Ku abïï röördït jɔ lɛɛr të thiääk ke nyin cie dëu, ku të kën ë piny kɔn puur, ku kënë kɔn com, ku abïk miɔɔr jɔ dhoŋ yeth ëtɛ̈ɛ̈n ë wakic.

⁵ Ku bäny ke kake Nhialic de Lebai abïk lɔ ëtɛ̈ɛ̈n ayadäŋ, në biäk bïï kek löŋ teem, löŋ de yic tɔŋ. Acïï Bɛ̈nydït Nhialicdun keek lɔc, bïk Yen luöi ku bïk athiɛɛi aa lueel në rinke.

⁶ Ku ëtɛ̈ɛ̈n, röördït ke wun thiääk ke të wään yök ë raan cï nɔ̈k thïn kedhie, abïk kecin jɔ waak në weŋ kɔ̈u.

⁷ Ku luelkï an, ‘Wok kën ee raanë nɔ̈k, ku wok kuc raan ë näk en.

⁸ Bɛ̈nydït pälë Yithriɛl kɔcku awänyden, kɔckuön ë kony keek ë Rip. Pälë wook awäc, ku du wo yiëk yiëth gääk de näŋ ë raan cïn guöp awäc.’

⁹ Ku në luɔi looi kek kë cïï Bɛ̈nydït lueel, we bï yiëth ciën awäny de raan ë näk.

Lööŋ në Baŋ de Diäär cï Peec ë Tɔŋic

¹⁰ “Të cï Bɛ̈nydït Nhialicdun week tɔ tiëm ë tɔŋic, ku cäk kɔc cïï peec nööm,

¹¹ tɛk däŋ bä tiiŋ läk tïŋ në keyiic, tiiŋ nhiaar ku akɔɔr bä thiaak.

¹² Lɛɛrë baaidu, ku tɔ mut yenɔm, ku tem yeriöp,

¹³ ku waar lupɔɔke. Abï rëër paandu ku abï kɔcken dhiëëu në pɛɛi tök, ku ëtɛ̈ɛ̈n yïn bï jɔ lɔ we yen, yïn bï aa monyde ku ye tiiŋdu.

¹⁴ Na cï akööl wan, ku cïï be kɔɔr, abï tɔ jël në nɔmlääu. Në luɔi cï yïn en tääu ɣöt në riɛl, acïï bï luööi cït man ë lïm, ku acïï bï ɣaac.

Lööŋ në Baŋ de Kë bïï Wën Kɛ̈i Lak

¹⁵ “Na de raan nɔm diäär kaarou ku keek kedhie acïk yen dhiëth mïthwät, ku wën kɛ̈i acie mɛnh ë tiiŋ nhiɛɛr.

¹⁶ Të cïï ë raan yen jɔ guiir yen kueer bï yen mïthke tɛ̈k kake, acïï tɛɛk ë yic bï dhil nyuɔɔth, në gëm gëm en wën ë tiiŋ nhiɛɛr biäk de wën kɛ̈i.

¹⁷ Abï biäk kaarou dhil gäm wën kɛ̈ide, cakaa nɔn cïï yen ee wën ë tiiŋdɛn nhiɛɛr. Raan abï wën kɛ̈ide dhil ŋic, ku gëm biäkdɛn cïï ë löŋ gäm en.

Lööŋ në Baŋ de Mɛnh Rilnɔm

¹⁸ “Na de raan nɔm mɛnhdɛn rilnɔm ku ee jam rɛɛc piŋ, mɛnh cïï man ku wun ee riëëu, cakaa yen ë yek dui.

¹⁹ Abïï man ku wun yiɛ̈n röördït ke wun rëër en thïn ku jɔkï tɔ kuum.

²⁰ Abïk lɛ̈k röördït ke wunden, luelkï an, ‘Wënda aril nɔm, ku ee jam rɛɛc piŋ, ku acïï wook ee riëëu, ee wëu riɔ̈ɔ̈r ku ee dek mɔ̈ndït.’

²¹ Ëtɛ̈ɛ̈n, abïï kɔc tɔ̈u wutic jɔ biɔ̈ɔ̈k abïï thou, ku we bï kërɛɛcë ja nyaai. Kë cï tuöl abïï ë raan ëbɛ̈n piŋ, raan tɔ̈u ë Yithriɛl ku abï riɔ̈ɔ̈c.

Lööŋ Kɔ̈k

²² “Na de raan cï nɔ̈k në biäk de awänydɛn cï yen raan nɔ̈k, ku acï nɔ̈ɔ̈k guöp ë tim kɔ̈u,

²³ guöpde acïï bïï tɔ tɔ̈u ë tim kɔ̈u aɣët cï wakɔ̈u. Abï dhil tɔ̈ɔ̈u ee kööl töŋë yic, në biäk ye guöp de raan cï thou nɔ̈ɔ̈k ë tim kɔ̈u aciɛɛn ë Nhialic bɛ̈ɛ̈i piny. Täukï guöp de raan cï thou, aguɔkï piny gëmë Bɛ̈nydït Nhialicdun week cïï bï riɔ̈ɔ̈k.