Nyöŋ 20 - JAM DE NHIALIC 2011

Lööŋ në Baŋ de Tɔŋ

¹ Go Mothe lueel an, “Të la wek biic, lak thɔ̈ɔ̈r në kɔc ke aterdun, ku lak abëël ke tɔŋ tïŋ, jöŋgöör ku remdïït de tɔŋ wär week në juëc, duökï riɔ̈c në keek, Bɛ̈nydït Nhialicdun Raan wään luäk week në Rip, abï tɔ̈u ke week.

² Të ŋuɔɔt wek ke we kën tɔŋ gɔl, bɛ̈ny de kake Nhialic abï bɛ̈n tueŋ, ku yɔ̈ɔ̈k rem de tɔŋ an,

³ ‘Piɛŋkï röör ke Yithriɛl, ëköölë we lɔ tɔŋ. Duökï riɔ̈c në kɔc ke aterdun, ku duökï röt pɛ̈l wei, ku duökï päu.

⁴ Bɛ̈nydït Nhialicdun alɔ ke week, ku abï week tɔ tiëm.’

⁵ “Ëtɛ̈ɛ̈n, bäny ke tɔŋ abïk kɔc jɔ jääm, luelkï an, ‘Na de raan nu ë we yiic ee tënë, raan ë piac ɣöt yïk ku kën ɣöt gäm Bɛ̈nydït? Na nu, ka aduëër lɔ baaide. Na le lɔ nɔ̈k tɔŋ, raan däŋ abï ɣönde lɔ̈ɔ̈k gäm Bɛ̈nydït.

⁶ Na de raan nu ë we yiic ee tënë, raan ë piac tim de enap com, ku akën kaam yök, kaam tem en mïthke? Na nu, ka aduëër lɔ baaide. Na le lɔ nɔ̈k tɔŋ, raandäŋ abï mɔ̈nde dek.

⁷ Na de raan nu ë weyiic ee tënë, raan cï duet lɔc nyan bïï thiaak? Na nu, ka aduëër lɔ baaide. Na le lɔ nɔ̈k tɔŋ, raan däŋ abï nyandɛn cï lɔc lɔ̈ɔ̈k thiaak.’

⁸ “Ku bäny ke tɔŋ abïk kɔc jääm ayadäŋ luelkï an, ‘Na de raan nu ë we yiic ee tënë, raan cï piɔ̈u kɔ̈c, ku acï riɔ̈ɔ̈c? Na nu, ka aduëër lɔ baaide. Na le lɔ lɔ abï ŋeeny de kɔc kɔ̈kkë riɔ̈ɔ̈k.’

⁹ Na cï bäny ke tɔŋ jɔ thök në jiëëm jiëëm kek rem de tɔŋ, ke bäny abïk keek jɔ kuany në akuut nïïm, akuttë ke bɛ̈nyde ku akuttë ke bɛ̈nyde.

¹⁰ “Të la wek lak pänydït mak, yak kɔc tɔ̈u wutic ëtɛ̈ɛ̈n kɔn gäm kaam bï kek röt gam.

¹¹ Na cïk athïïn ke pänydït liep ku gɛmkï röt, keek kedhie abïk aa lïïmkun, ku abïk luɔiduön ril aa looi.

¹² Ku na kën kɔc ke pänydït röt gäm week, ku lek thɔ̈ɔ̈r në week, gɛɛukï ke cil në remduön de tɔŋ.

¹³ Ëtɛ̈ɛ̈n, na cï Bɛ̈nydït Nhialic week tɔ pec pänydït näkkï röör tɔ̈u thïn kedhie.

¹⁴ Wek duëër röt nöm diäär, ku mïth, ku ɣɔ̈k, ku këriëëc tɔ̈u ë pänydïtic ëbɛ̈n. Ku wek duëër aa lui në kake kɔc ka aterdun kedhie. Acïï Bɛ̈nydït ke gäm week.

¹⁵ Yen kueer bä wek lui ka në ee pɛ̈ɛ̈nydïtkë, pɛ̈ɛ̈nydït mec në piny de juöör bä wek lɔ rëër thïn.

¹⁶ “Ku të la wek pɛ̈ɛ̈nydït lɔ peec, piny gëmë Bɛ̈nydït Nhialicdun week, näkkï kɔc kedhie.

¹⁷ Riäärkï kɔc nyïïn kedhie taitai, kɔc ke Ɣit, ku kɔc ke Amor, ku kɔc ke Kanaan, ku kɔc ke Peridh, ku kɔc ke Ɣib, ku kɔc ke Jebuth, cït man cïï Bɛ̈nydït we yɔ̈ɔ̈k an luɔikï.

¹⁸ Näkkï keek, agokï week cïï bï tɔ lui kërac Bɛ̈nydït Nhialicdun, në wɛ̈ɛ̈t bï kek we wɛ̈ɛ̈t në kanhiany ëbɛ̈n, ka yek keek looi në läm de yiëthken yiic.

¹⁹ “Të kaar wek bäk pänydït peec, duökï tiimkɛn de mïth ye cam ee yiɛp piny, cakaa nɔn bïï luɔi cï ë wut tuɔɔk kaamdït lɛɛr. Camkï mïth ke tiim ku duökï tiim riäk, tiim acïkï de ater në week.

²⁰ Wek duëër tiim kɔ̈k cïn mïth ye cam yiɛp piny, ku takkï keek ee ka tuɔɔk wek wut, agut të bï ë pänydït peec.