Nyöŋ 19 - JAM DE NHIALIC 2011

Pɛ̈ɛ̈nydït ke Thiaan

¹ Go Mothe lueel an, “Të cïï Bɛ̈nydït Nhialicdun juöör de piny gëm week jɔ riɔ̈ɔ̈k, ku të cä wek pɛ̈ɛ̈nydïtken ku ɣöötken jɔ nööm, ku rɛ̈ɛ̈rkï ëtɛ̈ɛ̈n.

^2-3 Wek bï pɛ̈ɛ̈nydït kadiäk tɔ̈ɔ̈u pei, piny bï Bɛ̈nydït Nhialicdun lɔ gäm week. Tɛkkï piny ë diäk, ku we bï kuɛɛr piɛth dhil looi, ago na de raan cï raan nɔ̈k, aduëër kat ke lɔ thiaan në keyiic ke bïï kony.

⁴ Na cï raan raan wääth ke cie raan de ater ke yen, aduëër kat ke lɔ wun tök në ee wuötkë yiic ku abï kony.

⁵ Na de kɔc kaarou cï lɔ rooric lek yep, ku të wën yep ë raan tök tim, go yiëp rɔt luöny bei në wai yic ku nɛ̈k raandäŋë, raan ë wɛ̈ɛ̈th raanë, aduëër kat ke lɔ wun tök në ee pɛ̈ɛ̈nydïtkë yiic kadiäk ku abï kony.

⁶ Ku na ee pänydïït tök yen tɔ̈u tei, ku kaamde amec ke kɔc, ke kɔc ke raan cï nɔ̈k kɔɔr guur, ka aduëërkï raan ë näk raan guɔ gïth ku nɛ̈kkï raan cïn guöp awäc ë guur. Kën ë loi rɔt, aa näk raanden ke ee wɛ̈ɛ̈th, aaye raan ë cïn kek ater.

⁷ Yeka cän week yöök, bäk pɛ̈ɛ̈nydït kadiäk tɔ tɔ̈u pei.

⁸ “Të cïï Bɛ̈nydït Nhialicdun pinydun tɔ dït, cït man ɣɔn cï Yen e lɛ̈k kuarkun an bïï looi, ku gëm week piny cï thön week ëbɛ̈n,

⁹ ëtɛ̈ɛ̈n, wek bï pɛ̈ɛ̈nydït kɔ̈k kadiäk lɔc. (Abï week gäm ee pinyë na cäk ka cï lɛ̈k week ë köölë lɔ looi ëbɛ̈n, ku na nhiaarkï Bɛ̈nydït Nhialicdun ku na lak rëër cït man ë wëëtde.)

¹⁰ Luɔikï ee kënë, ke kɔc cïn gup awɛ̈ɛ̈c ke ke cïï bï thou, ku aguɔkï gup ciën gääk ë baŋ cä wek ke nɔ̈k piny gëmë Bɛ̈nydït week.

¹¹ “Ku na cï raan raan de kek ater buuth ku nɛ̈k ke ŋic, ku jɔ kat ke lɔ wun tök në ee pɛ̈ɛ̈nydïtkë yiic ke bï lɔ kony.

¹² Në ee jamë yic, aduëër ë röördït ke wunden tɔ lɔ bïïyë, ku abïk gäm kɔc ke raan cï nɔ̈k, kɔc kɔɔr guur, agokï lɔ nɔ̈k.

¹³ Duökï nyuth kok de piɔ̈u. Nyaaikï raan ee raan cïn guöp awäc nɔ̈k në Yithriɛl, ago käŋ ëbɛ̈n tɔ̈u apiɛth tëde week.

Aken Thɛɛr

¹⁴ “Duökï kë cï tääu aken ë raan thiääk wek nɔm ee nyaai, kë cï tääu piny ɣɔn thɛɛr, piny gëmë Bɛ̈nydït Nhialicdun week.

Lööŋ në Baŋ de Cäätɔ

¹⁵ “Cäätɔ tök acïï duëër röŋ ke luɔi duëër ë raan tɔ gäk në kë cï wööc, ee cäätɔ kaarou tei ku nɔn ee diäk kek duëër ye nyuɔɔth nɔn cïï raan wäc.

¹⁶ Na kɔɔr raan bïï raan däŋ tɔ luiyë kërac në jam lueth,

¹⁷ keek kaarou abïk dhil lɔ të töŋ de läm, ku jɔ löŋden lɔ guiir në bäny de kake Nhialic ku bäny ee lööŋ guiir, kɔc bï tɔ̈u ë luɔi yic.

¹⁸ Bäny ee lööŋ guiir abïk këdäŋ kɔɔric apiɛth, ku na cï raan jam lueth luɛɛl në raandɛn ë Yithriɛl guöp,

¹⁹ yen ee raanë abï kuum në kuöm wën duëër ë raan wën lueelë guöp jam lueth kuum. Në ee kueerë wek bï kërɛɛcë jɔ nyaai.

²⁰ Ëtɛ̈ɛ̈n, abïï raan ëbɛ̈n piŋ yen kë cï rɔt looi, ku kɔc abïk jɔ riɔ̈ɔ̈c, ku acïn raandäŋ bï kërɛɛc cït ee kënë bɛ looi.

²¹ Në lööŋ cït ee kakë yiic, duökï kokdepiɔ̈u ee nyuɔɔth, kuöm abï ya, pïïr ee nɔm pïïr, ku nyin ee nɔm nyin, ku lëc ee nɔm lëc, ku ciin ee nɔm ciin, ku cök ee nɔm cök.