Nyöŋ 18 - JAM DE NHIALIC 2011

Miɔ̈c Biäk ye Gäm Bäny ke Kake Nhialic

¹ Na wën ke lueel Mothe an, “Bäny de kake Nhialic kɔc dhiën ë Lebai acïï keek bï miɔɔc në piny, keek abïk aa pïïr në miɔ̈c, ku lɔ miɔ̈c näk kɔ̈k ye gäm Bɛ̈nydït.

² Acïn piny bï aa këden, cït man ë dhiën kɔ̈k de nïïm piny, biäkden ee miɛtëguöp cï kek aa bäny ke kake Nhialic de Bɛ̈nydït, cït man cï Bɛ̈nydït Ye thɔn.

³ “Të cï weŋ ku thök nɔ̈k, bäny ke kake Nhialic, abï keek aa gäm jiɛɛr, ku gëm, ku yäc.

⁴ Abïk miɔ̈c de rap cï kɔn luɔk, ku miök, ku mɔ̈u, ku nhïm ke thök aa nööm.

⁵ Bɛ̈nydït acï dhiën de Lebai lɔc në dhiëënkun yiic kedhie, ke ke bï Yen aa luööi, ke ke ye bäny de kake Nhialic aɣet athɛɛr.

⁶ “Ku na de raan de Lebai ceŋ wundäŋ në wuöt ke Yithriɛliic, ku ade piɔ̈u bɛ̈n të töŋ de läm cïï Bɛ̈nydït lɔc, aduëër bɛ̈n të kɔɔr en en.

⁷ Ku aduëër lui ëtɛ̈ɛ̈n ke ye bɛ̈ny de kake Nhialic de Bɛ̈nydït Nhialicde, cït man ë Lebai kɔ̈k lui ë tɛ̈ɛ̈n.

⁸ Abï biäk de këcam kït kekë ka ye bäny ke kake Nhialic kɔ̈kkë aa nööm, ku aduëër kakɛn ye baaiden yiɛ̈n en aa mɔ̈k rɔt.

Yöök në Baŋ de Läm ë Yiëth

⁹ “Të la wek lɔ bɛ̈n piny gëmë Bɛ̈nydït Nhialicdun week, duökï luɔi rɛɛc de juöör nu ëtɛ̈ɛ̈n kuany yiic.

¹⁰ Duökï mïthkun näk në mac ku gamkï keek në yïkkun nïïm, ku duökï kɔckun tɔ loi tïït, ku nɔn ee cäär, ku nɔn ee thuɛ̈th.

¹¹ Ku nɔn ee läm de yiëth, ku nɔn ee caw, ku nɔn wël ee mɛɛk.

¹² Bɛ̈nydït Nhialicdun aman kɔc ee karɛc cït ee kakë looi, yen ka ë kë cop En ee juöör biic, të ya wek lɔ ke we lɔ tueŋ.

¹³ Yak röt gäm Bɛ̈nydït Nhialicdun taitai në piɔ̈n adöt.

Thön në Baŋ bïï Tiët Tuööc

¹⁴ “Në ee juöör bäk lɔ copë, tiɛtkï röt në tït nu ëtɛ̈ɛ̈n ku kɔc ee käŋ caar, ku Bɛ̈nydït Nhialicdun acïï week ee päl luɔi cït ee kënë.

¹⁵ Ku kë bïï looi, abï week tuöc tiët de Nhialic cït ɛn, raan de kɔckun yiic ku abäk dhil riëëu.

¹⁶ “Në akööl wään cä wek amatnɔm looi në kuur ë Thinai thar, we cï lɔ̈ŋ aläl nɔn cä wek Bɛ̈nydït bï bɛ aa piŋ röl ke jam ke week, ku cäkkï täudɛn tucthok bï bɛ tɔ bïï ë we lɔ̈m, në luɔi ë riääc wek an bäk thou.

¹⁷ Go Bɛ̈nydït ya yöök an, ‘Acïk thiëc në pɛlënɔm.

¹⁸ Abä keek tuöc tiët de Nhialic cït yïn raan de kɔcken yiic, abä lëk kë bïï lueel, ku abï kɔc lëk këriëëc cä lɛ̈k en ëbɛ̈n.

¹⁹ Abï jam në rinkï, ku Yɛn bï raan ëbɛ̈n kuum, raan reec jamde riëëu.

²⁰ Ku na de tiët lɔ jam lueel në rinkï të kën Yɛn yen yöök bïï kënë lɔ looi, abï dhil thou në këde, ku yen ee täu bï tït ee jam ë rin ke yiëth kɔ̈kkë tɔ̈u.’

²¹ “Ku wek bï gäi, an bäk jɔ ŋic adï e nɛn yen cïï jam de tiët ee bɛ̈n tëde Bɛ̈nydït?

²² Na cï tiët jam në rin ke Bɛ̈nydït, ku kë cï lueel akën bɛ̈n ke ee yic, ka jamë acie jam de Bɛ̈nydït. Yen ee tiëtë aa jam në riɛlde, ku wek cïï bï riɔ̈ɔ̈c në yen.