Nyöŋ 17 - JAM DE NHIALIC 2011

¹ Go Mothe lueel an, “Duökï Bɛ̈nydït Nhialicdun ee näk weŋ, ku nɔn ee thɔ̈ɔ̈k de guöp tëdak, kënë amɛɛn Bɛ̈nydït.

² “Na lak lɔ piŋ wun tök në wuöt cïï Bɛ̈nydït gäm week, nɔn cïï moc, ku nɔn ee tik këdäŋ wäc Bɛ̈nydït Nhialicdun, ku dhoŋ löŋdɛn cï mac kɔ̈u,

³ në läm lɛm en yiëth kɔ̈k ku ye keek luööi, ku lɛm aköl kekë pɛɛi ku nɔn ee kuɛl, ka wuöc në lööŋ ke Bɛ̈nydït.

⁴ Na cäk jam cït ee kënë piŋ, ke kaarkï yic apiɛth. Na cï ya yic nɔn cïï kërɛɛc cït ee kënë rɔt looi në Yithriɛl,

⁵ ke we jɔt ee raanë, lɛɛrkï ë wut këc biic ku biääkkï arëk abïï thou.

⁶ Ku abï nɔ̈k tei, të cïï kɔc kaarou ku nɔn ee kɔc kadiäk jamdɛn cï lueel piŋ ë yic, acï bïï nɔ̈k na ee raan tök yen ë tïŋ ku piŋ ee jamdɛnë.

⁷ Ku kɔc ë tïŋ ku piŋkï ee jamdɛnë, kek abï kur tueŋ kɔn dɛɛny, ku ëtɛ̈ɛ̈n kɔc kɔ̈kkë abïk raan jɔ biɔ̈ɔ̈k, ku në ee kueerë wek bï kërɛɛcë jɔ nyaai.

⁸ “Ku akööl kɔ̈k, wël kɔ̈k abïk yiic riɛl në baŋ bï raan ë löŋ guiir ë wuötkuniic ye lëu në guiɛɛr, cït man de lööŋ kɔ̈k ke kake kɔc, ku nɔn ë bɔ̈t, ku lööŋ ke pɛ̈ɛ̈k de raan ë näk ku raan ë kur. Të cï ee kënë rɔt looi, lakï të töŋ de läm, të cïï Bɛ̈nydït Nhialicdun lɔc,

⁹ ku lɛ̈kkï jamdun bäny ke kake Nhialic ke Lebai, ku gämkï bɛ̈ny ee löŋ guiir, raan nu ë luɔi yic ee kaamë yic, ku takkï keek guiir ee löŋë.

¹⁰ Abïk löŋden guiir, ku abäk dhil looi aya cït man cïï kek ye lɛ̈k week.

¹¹ Gamkï jamdɛn cïk lueel, ku kuany jam cïk lueel yic, ku kuany cökken yiic.

¹² Raan lɔ löŋ de bɛ̈ny ee käŋ guiir kekë bɛ̈ny de kake Nhialic nu ë luɔi yic rɛɛc gam abïï nɔ̈k, në ee kueerë wek bï kërɛɛcë jɔ nyaai në Yithriɛl.

¹³ Ku, abï raan ëbɛ̈n ye piŋ ëtɛ̈ɛ̈n, ku abï riɔ̈ɔ̈c, ku acï raan bï ye them bïï käŋ bɛ looi aya.

Jam në Baŋ de Melik

¹⁴ “Të cä wek piny jɔ nööm, piny gëmë ë Bɛ̈nydït Nhialicdun week, ku cäk jɔ ɣap ëtɛ̈ɛ̈n, abäk jɔ lueel nɔn kaar wek melik cït man de juöör ëbɛ̈n, juöör rɛ̈ɛ̈r ë we lɔ̈m.

¹⁵ Ŋiɛckï ë gɔk, an raan bäk bɛ̈ɛ̈i ke ee melik, abï aa raan ee yen cïï Bɛ̈nydït lɔc. Abï dhil aa raan töŋ de kɔckuniic, duökï raan lei tɔ ee melikdun.

¹⁶ Ku melik acïï nɔm bï dɛ jöŋgöör juëc, jöŋgöör ke remdɛn ë tɔŋ, ku acïï kɔc bï dhil aa tuɔɔc Rip lek jöŋgöör ɣɔɔc, në biäk cïï Bɛ̈nydït Ye lueel an, kɔckï ë ke cïï kenïïm be pɔ̈k Rip.

¹⁷ Ku melik acïï nɔm bï dɛ diäär juëc, në biäk bïï diäär ye pɔ̈k piɔ̈u wei në Bɛ̈nydïtic, ku acïï rɔt bï tɔ kueth në ateek ku adhääp.

¹⁸ Të cï yen jɔ nyuc në thööny de ciɛɛŋde nɔm, abï nɔm dhil dɛ awerek töŋ ë löŋ ke yen, awerek tɔ̈u kekë Lebai, bäny de kake Nhialic.

¹⁹ Abï awerek muk ë yelɔ̈ɔ̈m, ku abï ya kueenic në pïïrde yic ëbɛ̈n, ago riëëu de Bɛ̈nydït ŋic ku bïï këriëëc cï lueel ëbɛ̈n riëëu në piɔ̈n adöt.

²⁰ Kënë abï yen pɛ̈n luɔi bï yen tak an, ee yen ee raan piɛth në kɔckɛn ke Yithriɛl yiic, ku pën yen luɔi bï yen lööŋ ke Bɛ̈nydït dhɔ̈ŋ yiic. Ku ëtɛ̈ɛ̈n, abï cieŋ në run juëc, ku mïth ke mïthke abïk ciɛɛŋ de Yithriɛl cieŋ në rɛm juëc.