Nyöŋ 16 - JAM DE NHIALIC 2011

Winythok

¹ Go Mothe lueel an, “Riëëukï Bɛ̈nydït Nhialicdun, në luɔi bä wek dhuëëŋ de Winythok aa looi në pɛɛi de Abib, në biäk yen wakɔ̈uwë yic, në ee pɛɛiyë yic, yen aa luɛ̈k Yen week ë Rip.

² Lakï të töŋ de läm ku näkkï thɔ̈ɔ̈kdun ku nɔn ee weŋ ëtɛ̈ɛ̈n, ke ee këcam de Winythok bä wek Bɛ̈nydït Nhialicdun riëëu.

³ Të la wek ee këcamë cam, duökï kuïn cï pam cï looi në luɔu cam. Në nïn kadhorou yiic wek bï kuïn cï pam cïn yic luɔu aa cam, cït man wään luɔi wek en ɣɔn jäl wek në Rip ë aruööthic. Camkï ee kuïn cï pamë abï aa cɔɔl an, kuïn cï pam de nuan, aguɔkï ee köölë tak në pïïrdunic ëbɛ̈n, kööl ë bä wek bei në Rip, të de nuan.

⁴ Në nïn kadhorou yiic, acïn raan ë pinydun bï nɔm dɛ luɔu ɣönde, ku rïïŋ de lɛ̈n ë näk thëën ë kööl tueŋ, abï dhil cuet në ë wɛ̈ɛ̈r wakɔ̈uwë yic.

^5-6 Yak läi ke Winythok nɔ̈k të töŋ de läm, ku acïn tëdäŋ pei wundun, të bï Bɛ̈nydït Nhialicdun gäm week. Yak looi të le aköl piny, ë kaam cït thaar wään jäl wek në Rip.

⁷ Thalkï rïïŋ ku cuɛtkï të töŋ de läm, na miäk adurduur në kööl däŋë ke we puk röt baai.

⁸ Në nïn kadhetem kɔ̈kkë yiic, wek bï kuïn cï pam, kuïn cïn yic luɔu aa cam, ku në kööl de dhorou we bï amatnɔm luöi Bɛ̈nydït Nhialicdun, ku acïn luɔi bäk looi ee köölë.

Dhuëëŋ de Tëm

⁹ “Yak nïn kadhorou ee yiic dhorou kueen, gɔl në kööl ɣɔn gal wek rap në tëm në menyjel,

¹⁰ ku ëtɛ̈ɛ̈n, jakï dhuëëŋ de tëm bɛ̈n looi, bä wek Bɛ̈nydït Nhialicdun riëëu, ku wek bï miɔ̈c de miɛtëpiɔ̈u bɛ̈ɛ̈i cït man de athiɛɛi cï gäm week.

¹¹ Yak piɔ̈ɔ̈th miɛt në Bɛ̈nydït lɔ̈ɔ̈m, yak piɔ̈ɔ̈th miɛt në mïthkun ëtök, ku kɔc ee we luööi, ku Lebai, ku kɔc lei, ku mïth abɛɛr, ku tiiŋ abaar rɛ̈ɛ̈r ë wuötkuniic, yak ee kënë looi të töŋ de läm, të bïï ë Bɛ̈nydït Nhialicdun lɔc, ago rinke tɔ rɛ̈ɛ̈r thïn.

¹² Thɛmkï bäk ee lööŋkë riëëu, duökï nïïm mär nɔn cä wek kɔn aa lïïm ë Rip.

Dhuëëŋ de Kɛ̈ɛ̈t

¹³ “Të cä wek rɛɛpkun jɔ kɔ̈ɔ̈m ëbɛ̈n, ku cäk mɔ̈ndun jɔ dhiim ëbɛ̈n. Ke we loi Dhuëëŋ de kɛ̈ɛ̈t në nïn kadhorou.

¹⁴ Miɛtkï piɔ̈ɔ̈th në yen ë mïthkun, ku kɔc ee we luööi, ku Lebai, ku kɔc lei, ku mïth abɛɛr, ku diëër abɛɛr rɛ̈ɛ̈r ë wuötkuniic.

¹⁵ Riëëukï Bɛ̈nydït Nhialicdun në luɔi bä wek dhuëëŋë looi në nïn kadhorouwiic të töŋ de läm. Yak piɔ̈ɔ̈th miɛt, në biäk cïï Bɛ̈nydït tëmdun kekë luɔidun thieei.

¹⁶ “Röör ke jurdun ëbɛ̈n abïk aa bɛ̈n, bïk Bɛ̈nydït bɛ̈n lam raan diäk në ruöönic, të töŋ de läm: Në Dhuëëŋ de Kuïn Cïnic Luɔu, ku Dhuëëŋ de Winythok, ku Dhuëëŋ de Tëm, ku Dhuëëŋ de Kɛ̈ɛ̈t. Ku raan ëbɛ̈n abï miɔ̈c aa bɛ̈ɛ̈i,

¹⁷ miɔ̈cdɛn duëër lëu, cït man de athiɛɛi cï Bɛ̈nydït Nhialicdun gäm en.

Luɔɔi de Yic

¹⁸ “Kuanykï bäny ee löŋ guiir ku bäny kɔ̈k ë dhiëënkun yiic, në wuötiic kedhie, wuöt cïï Bɛ̈nydït Nhialinydun ke gäm week. Kɔckë abïk löŋ ë kɔc aa guiir ke cïn tëŋ de yic.

¹⁹ Abïk aa kɔc cïï löŋ ee kuöc guiir, ku cïkkï kɔc ee tekiic në kuömden yic, ku acïkï kumthok bï aa nööm, në baŋ ye miɔ̈c kɔc pelnïïm ku kɔc adööt tɔ cɔɔr, ku tɔ keek tɔ guiir löŋ ë kueer rac.

²⁰ Yak löŋ ŋiëc guiir apiɛth ku në yic, aguɔkï piny lɔ nööm, piny gëm ë Bɛ̈nydït Nhialicden week, aguɔkï ŋoot ke we cëŋ thïn.

²¹ “Të luöi wek Bɛ̈nydït Nhialicdun yïk, duökï kïn ë tim de yanh tik Acera ee tääu ë ye lɔ̈ɔ̈m.

²² Ku duökï wai de kuur, wai de läm ë yiëth ee looi, amɛɛn Bɛ̈nydït keek.