Nyöŋ 13 - JAM DE NHIALIC 2011

¹ Go Mothe jam an, “Tït ku nɔn ee kɔc ee nyuöth waaric, aduëërkï göök ku nɔn ee këde gäi thön week,

² në biäk bïï kek week thɛl në läm ku luööikï yiëth, yiëth kënkï keek kɔn lam ɣɔn thɛɛr. Na cakaa këdɛn ë thönkï week, yen cï bɛ̈n ke ee yic,

³ duökï wël ee tiëtë gam taitai. Acïï Bɛ̈nydït Nhialicdun keek tɔ ee ka bïï ë week them, ago ë Bɛ̈nydït ŋic na nhiaarkï ë wepiɔ̈ɔ̈th ëbɛ̈n.

⁴ Kuanykï Bɛ̈nydït cök ku riëëukï, yak riëëu guöp, ku mɔ̈kkï lööŋke, ku lamkï, ku takï röt adööt tëde Yen.

⁵ Ku näkkï raan ëbɛ̈n raan ee nyuöth waaric ayï tiët ee we yöök, an, bäk Bɛ̈nydït Raan ë kony week ë Rip rɛɛc, të wään ya wek lïïm thïn. Kɔc cït ee kakë ayek karɛc looi, ku akɔɔrkï bïk week thɛl wei në pïïric, pïïr cï Bɛ̈nydït lɛ̈k week an bä wek pïïr. Abï keek dhil nɔ̈k aguɔkï kërɛɛcë jɔ bɛ̈ɛ̈i bei ë weyiic.

⁶ “Ayï wënkui, ku nɔn ee wëndu, ku nɔn ee nyandu, ku nɔn ee tiiŋduön nhiaar, ku nɔn ee raan määth wek arëët, aduëër yïn riit piɔ̈u ë määth, ke yï bï yiëth lam, yiëth kënë ke kɔn lam wekë kuarkun.

⁷ Aduëër ë raan tök ë ke yiic lɛ̈k yïn, nɔn bï yïn yanh de kɔc thiääk ë week lam, ku nɔn ee yanh de kɔc rëër të mec.

⁸ Ku week, duökï keek tɔ meet week, ku duökï këden gam. Duökï piɔ̈ɔ̈th kɔn kok në keek, ayï kuny, duökï keek ee kony.

⁹ Näkkï keek! Tɔ rɔt ee raan tueŋ bï keek kɔn biöök, ku jɔ keek tɔ biöök ë kɔc kɔ̈k aya.

¹⁰ Biääkkï keek abïk thou! Acïk them bïk week thɛl wei në Bɛ̈nydït Nhialicdun lɔ̈ɔ̈m, raan ë kony week ë Rip, të wään ya wek lïïm thïn.

¹¹ Ku ëtɛ̈ɛ̈n, abïï kɔc ke Yithriɛl jɔ piŋ ëbɛ̈n yen kë cï rɔt looi, ku abïk riɔ̈ɔ̈c, ku acïn raan bï kërɛɛc cït ee kënë bɛ looi.

¹² “Të la wek lɔ rëër në pɛ̈ɛ̈nydït cï Bɛ̈nydït Nhialicdun gäm week, abäk aa piŋ,

¹³ an ade kɔc rac kɔ̈k në jurdunic, kɔc cï kɔc ke wuötken thɛl wei, bïk yiëth kɔ̈k lam, yanh kënkï kɔn lam ɣɔn thɛɛr.

¹⁴ Të cä wek ee jamë piŋ ke ye tuum, ke jakï kɔɔr yic apiɛth, ku të cï jam aa yic, nɔn cïï ee kërɛɛcë rɔt looi,

¹⁵ ke wek jɔ kɔc ke ee wunë ëbɛ̈n nɔ̈k, ku näkkï läiken kedhie ayadäŋ. Riäkkï ee wunë taitai.

¹⁶ Bɛ̈ɛ̈ikï kake kɔc ceŋ ee wunë tëtök kedhie, ku kuötkï kenïïm wutic cil. Ku nyuɔpkï keek wutic kekë këriëëc nu thïn ëbɛ̈n, ke ee miɔ̈c de Bɛ̈nydït Nhialicdun. Abï pɔ̈l ke cï riääk aɣet athɛɛr, ku acïï bïï bɛ nyɔk ë yïk taitai.

¹⁷ Duökï kë cï kuöm riääk ee mɔ̈k röt, ke Bɛ̈nydït bï rɔt puk në agönhdɛn tuc yic, ku nyuth week kok de piɔ̈u. Abï piɔ̈u kok ke week ku tɔ week ee kɔc juëc, cït man cïï Yen ë thön kuarkun,

¹⁸ të cä wek lööŋkɛn cä gäm week ee köölë kedhie riëëu, ku luɔikï kë kɔɔr.