Nyöŋ 12 - JAM DE NHIALIC 2011

Të Töŋ de Läm

¹ Kakë ayek lööŋ bäk keek dhil döt apiɛth të cä wek lɔ piny cï Bɛ̈nydït Nhialic de kuarkun gäm week, bäk lɔ nööm në akööl bä wek rëër ëbɛ̈n ë piny nɔm.

² Wek bï ɣään ye juöör bä keek lɔ cop lam thïn riɔ̈ɔ̈k ëbɛ̈n, ɣään tɔ̈u në kuur nïïm, ku ɣään tɔ̈u të thöny, ku tiim tɔ̈c thäär ëbɛ̈n.

³ Wek bï yïkken dhil thuöör piny, ku riäk wai ke kurkɛn yaath abïk lɔ thorthor, nyop kïn de yanh de tik Acera ku yɛpë yiëthken piny, ago keek cïï bï bɛ lam në ee ɣäänkë yiic.

⁴ “Duökï Bɛ̈nydït Nhialicdun ee lam në kueer ye kɔckë yiëthken lam.

⁵ Në wuöt ceŋ ë dhiëënkun kedhie Bɛ̈nydït abï të tök lɔc, të bïï kɔc aa bɛ̈n në Ye lɔ̈ɔ̈m ku lamkï Yen.

⁶ Ëtɛ̈ɛ̈n, wek bï miɔ̈cduön näk gam, miɔ̈c ye nyop ëbɛ̈n, ku lɔ miɔ̈ckuön kɔ̈k näk, ku töŋduön ë thiëër ku miɔ̈cduön, ku miɔ̈c cä than an bäk aa gäm Bɛ̈nydït, miɔ̈cduön de miɛtëpiɔ̈u, ku kɛ̈i de weŋdun ayï thökkun.

⁷ Në Bɛ̈nydït Nhialicdun lɔ̈ɔ̈m ëtɛ̈ɛ̈n, we bï cam, ku jakï piɔ̈ɔ̈th miɛt në bɛ̈ikun ëtök, në ka cäk keek looi ëbɛ̈n, ka cï Bɛ̈nydït Nhialicdun we thieei.

⁸ “Wek cïï bï aa luui në luɔi lui wek ee tënë ee köölë, raan ëbɛ̈n ee kë ye tïŋ ke piɛth ë yepiɔ̈u looi,

⁹ në biäk kën wek ɣet piny bï Bɛ̈nydït Nhialicdun gäm week, të bä wek lɔ rëër thïn në mät.

¹⁰ Të la wek wɛ̈ɛ̈r de Jordan teem Bɛ̈nydït abï week tɔ nöm piny ku rɛ̈ɛ̈rkï ëtɛ̈ɛ̈n. Abï week kony në kɔc ke aterdun tɔ̈u ë welɔ̈m. Ku abï we gäm mät.

¹¹ Bɛ̈nydït abï të tök lɔc, të bï ë Yen aa lam thïn, ku abäk aa yiɛ̈n käŋ ëtɛ̈ɛ̈n, ka cä lɛ̈k week, miɔ̈cduön näk miɔ̈c ye nyop ëbɛ̈n, ku miɔ̈cduön kɔ̈k, ku töŋ de thiëër, ku miɔ̈c, ku miɔ̈cduön kɔ̈k cï ke thön Bɛ̈nydït.

¹² Jakï piɔ̈ɔ̈th miɛt ëtɛ̈ɛ̈n në Bɛ̈nydït lɔ̈ɔ̈m week në mïthkun, ku lïïmkuön röör ku diäär, ku Lebai rëër ë wuötkuniic, ku aŋiɛckï nɔn cïn ë Lebai nïïm wuöt ke naamden.

¹³ Wek cïï miɔ̈c ye nyop ëbɛ̈n bï aa gam tëduön cäk tak.

¹⁴ Abä keek dhil gäm të töŋ bï Bɛ̈nydït lɔc, në wun töŋ de wuöt ke dhiëënkun yiic. Yen ee të töŋë yetök, yen abä wek miɔ̈cduön ye nyop ëbɛ̈n aa gam, ku bä wek ka cä thön week kedhie aa looi.

¹⁵ “Ku wek de nɔm lääu bä wek läikun aa nɔ̈k ku cuɛtkï keek në wuöt rëër wek thïn. Wek duëër cuet cït man ë kë kaarkï week wedhie, na ee län piɛth ku nɔn ee län de acuɔl, aduëërkï ke cuet cït man ye kɛɛu kekë thiäŋ cuet.

¹⁶ Ku wek cïï riɛmden bï cam cït man ë kuïn, wek bï riɛm dhiɛl wäl piny cït man ë pïïu.

¹⁷ Këriëëc gämkï Bɛ̈nydït, acäkï ke bï aa cam në wuöt rɛ̈ɛ̈r wek thïn, a cakaa töŋ de thiëër de rɛɛpkun, ku mɔ̈ndun, ku miökduön de olip, ku nɔn ë kɛ̈i de weŋdun ku thökkun, ayï miɔ̈c cï thön Bɛ̈nydït, ayï miɔ̈cduön de miɛtëpiɔ̈u kekë miɔ̈cduön däŋ.

¹⁸ Week në mïthkun, wedhie në kɔc ee week luööi ku Lebai rɛ̈ɛ̈r në wuötkuniic, wek bï ee miɔ̈ckë dhil cam në Bɛ̈nydït Nhialicdun lɔ̈ɔ̈m, të töŋ de läm, të cïï Bɛ̈nydït Nhialicdun lɔc. Ku wek bï piɔ̈ɔ̈th jɔ miɛt ëtɛ̈ɛ̈n në biäk de ka cä keek looi ëbɛ̈n.

¹⁹ Ku abäk dhil ŋic aya, nɔn cä wek Lebai bï päl wei, në run rɛ̈ɛ̈r wek pinydun.

²⁰ “Të le Bɛ̈nydït Nhialicdun pinydun tɔ lääuwic, cït man cï Yen ë than, wek bï aa cuet ë rïïŋ tëduön cäk tak.

²¹ Na cï të töŋ de läm mɛc aläl, të kaar wek bäk näk, wek duëër näk në ɣɔ̈kiic ku thökiic, ka cïï Bɛ̈nydït gäm week, ku wek duëër rïïŋ cuet ë wuötkuniic cït man cän e lɛ̈k week.

²² Ku raan piɛth guöp, ayï raan cïï guöp piɛth, aduëër cuet në ee rïïŋë, cït man duëër en rïïŋ de ŋɛɛr kekë thiäŋ cuet.

²³ Ku ee rïïŋ de yic riɛm thïn yen acïkï bï aa cuet, në biäk tɔ̈u ë pïïr në riɛmic, ku we cïï pïïr bï cam kekë rïïŋ.

²⁴ Duökï rïïŋ ee looi ke ee këcam, yak wäl piny cït man ë pïïu.

²⁵ Të la wek löŋë riëëu, Bɛ̈nydït abï piɔ̈u miɛt, ku käŋ kedhie abïk piath tëde week ku kuatdun.

²⁶ Yak miɔ̈cduön ɣeric ku miɔ̈cduön cäk thön Bɛ̈nydït lɛɛr të töŋ ye Bɛ̈nydït lam thïn.

²⁷ Yak miɔ̈c näk gam ëtɛ̈ɛ̈n, miɔ̈c ye nyop ëbɛ̈n në yïïŋ de Bɛ̈nydït nɔm, ku yak miɔ̈c bä wek rïïŋden cam ayadäŋ, ku bäk riɛmden wäl wei.

²⁸ Riëëukï këriëëc cä gäm week ëbɛ̈n në piɔ̈n adöt, ku käŋ kedhie abïk piath tëde week ku kuatdun aɣet athɛɛr, në biäk yen kë yic yen loi, ku ye kë mit ë Bɛ̈nydït Nhialicdun piɔ̈u.

Yöök në Baŋ de Läm ë Yiëth

²⁹ “Bɛ̈nydït Nhialinydun abï juöör riɔ̈ɔ̈k, të la wek ke we pec pinyden, ku abäk ɣap ku rëërkï ëtɛ̈ɛ̈n.

³⁰ Të cïï Bɛ̈nydït ee juöörkë riɔ̈ɔ̈k, abäk dhil ŋic ë gɔk, ke we cïï ka ye yiëthken lam bï kuany cök, kënë abï rac aläl. Duökï them bäk kuɛɛr ye kek yiëthken lam kɔɔr, aguɔkï Ya lam në kueerden.

³¹ Duökï Bɛ̈nydït Nhialicdun ee lam në kueer ye kek yiëthken lam, në biäk ye kek kanhiany looi ë läm de yiëthken yiic, ka mɛɛn Bɛ̈nydït. Arëk ayek mïthken gam näk keek në mac në yïkken nïïm.

³² “Luɔikï këriëëc cä lɛ̈k week ëbɛ̈n, duökï de ka bäk ŋuak thïn ku duökï de kë bäk bɛ̈ɛ̈i bei thïn.