Nyöŋ 11 - JAM DE NHIALIC 2011

Dït de Bɛ̈nydït

¹ Go lueel an, “Nhiaarkï Bɛ̈nydït Nhialicdun ku yak lööŋke riëëu kedhie ë ceŋ.

² Takï wenïïm ee köölë në kë cäk ŋic në biäk le Bɛ̈nydït në kueer ë kë cäk yök tëde Yen. Ee wek ë yök ee kakë, acie mïthkun. Wek cï dït de Nhialic tïŋ, ku riɛlde ku riɛdïïtde,

³ ku göökke. Wek cï kë cï luöi melik de Rip tïŋ kekë paande ëbɛ̈n.

⁴ Acäk tïŋ luöi cïï Bɛ̈nydït rem de tɔŋ de Rip riɔ̈ɔ̈r nyin taitai kekë jöŋgöörke ku abëëlkɛn ke tɔŋ, tɔ keek mɔu në Wɛ̈ɛ̈r thith yic ɣɔn cop kek week.

⁵ Week ŋic kë cïï Bɛ̈nydït luöi week ë jɔ̈ɔ̈ric wään kën wek kɔn ɣëët ee në.

⁶ Wek duëër kë cï luöi Dathan kekë Abiram tak, ku wɛ̈ɛ̈t ke Eliap raan dhiën ë Ruben. Në kɔc nyïïn ëbɛ̈n piny acï rɔt bɛ̈n liep ku liek keek, liek piny keek në ɣöötken, ku wuötken kedhie, ku lïïmken ëbɛ̈n ku läiken.

⁷ Yeka, ee wek ë ye kɔc ë tïŋ ee kadïtkë kedhie, ka cï Bɛ̈nydït ke looi.

Athiɛɛi de Piny cï Than

⁸ “Riëëukï lööŋ kedhie, lööŋ cä gäm week ee köölë. Yen abä wek kiir lëu në tɛ̈m ku nämkï piny kaarkï bä wek lɔ thïn.

⁹ Ku wek bï rëër ë run juëc piny ee wat ë ca ku miök ë kiëc, piny cïï Bɛ̈nydït than an bïï gäm kuarkun ku mïth ke mïthken.

¹⁰ Yen piny kaarkï bäk lɔ nöömë acïï cït piny de Rip, piny wään kan wek rëër thïn, wään ë Rip, të cä wek kɔ̈th com, wek ee lui aläl ke we puur duum,

¹¹ ku yen ee piny bäk wek lɔ thïn, ee piny de kur ku wëk, ee piny ye deŋ piɔɔk.

¹² Bɛ̈nydït Nhialicdun ee Yen ee pinyë looi, ku aye tiit e ruöön thok ëbɛ̈n.

¹³ Ka week, jakï lööŋ cä gäm week ee köölë riëëu Nhialic Bɛ̈nydït Nhialicdun ku yak luööi në piɔ̈ndun ëbɛ̈n.

¹⁴ Na lak looi, abï deŋ tuɔɔc pinydun të kɔɔr ë yen, rut ku anyɔ̈ɔ̈c, aguɔkï nïïm dɛ anyuɔl, ku mɔ̈u, ku miök de Olip,

¹⁵ ku wal ke ɣɔ̈k, wek bï nïïm de kacaam kaarkï.

¹⁶ Duökï röt tɔ thelë wei në Bɛ̈nydïtdun lɔ̈ɔ̈m, bäk yiëth kɔ̈k lɔ lam, ku luööikï keek

¹⁷ Na lak looi, Bɛ̈nydït abï piɔ̈u rac ke week. Abï deŋ tɔ kääc tënhial, ka pinydun abï ril wei aläl, ka acïn rɛɛp bï cil. Ku ëtɛ̈ɛ̈n, wek bï thou ëtɛ̈ɛ̈n, cakaa nɔn yen piny piɛth yen gäm week.

¹⁸ Yak ee lööŋkë tak ku mɔ̈kkï keek. Duöötkï keek në we kök ku yak keek cieŋ në wenïïm tueŋ ke bï week aa täk nïïm.

¹⁹ Wɛ̈ɛ̈tkï mïthkun në keek. Yak jam në biäkden të täu wek baai, ayï të liɛɛu wek baai, ayï të läŋ wek, ayï të luööi wek.

²⁰ Gäärkï keek në ɣöötkun thook tueŋ ayï athïïn ke ɣöötkun thook.

²¹ Ëtɛ̈ɛ̈n, week në mïthkun, wek bï rëër ë run juëc në piny yic, piny cïï Bɛ̈nydït Nhialic thɔn bï gäm kuarkun, wek bï rëër ëtɛ̈ɛ̈n, cït run bïï nhial ke rëër tënhial në piny.

²² Riëëukï lööŋ cä gäm week kedhie në piɔ̈n adöt, nhiaarkï Bɛ̈nydït Nhialicdun, luɔikï këriëëcdun cï lueel ëbɛ̈n, ku yak röt tɔ ye adööt tëde Yen.

²³ Ëtɛ̈ɛ̈n, yen abï juöör ëbɛ̈n cuɔp wei të la wek tueŋ, ku wek bï piny de juöör dït ku rilkï arëët awär week nööm.

²⁴ Piny bä wek cath thïn ëbɛ̈n abï ya pinydun. Akɛɛthken abïk rɔt gɔl në jɔ̈ɔ̈ric të lɔ wöuwic leer kur ke Lebanɔn të lɔ rut, ku gɔl në wɛ̈ɛ̈r ë Yuparat të lɔ aköl amiäk leer në Wɛ̈ɛ̈r Ɣer të lɔ aköl athɛ̈i.

²⁵ Të bä wek lɔ thïn ëbɛ̈n në ee pinyë, Bɛ̈nydït Nhialicdun abï kɔc tɔ riɔ̈c në week, cït man cïï Yen ë thɔn, ku acïn raan bï we tɔ kääc.

²⁶ Ee köölë wek gäm keek kë bäk lɔc, në kaam de athiɛɛi kekë aciɛɛn,

²⁷ ë Athiɛɛi të la wek lööŋ ke Bɛ̈nydït Nhialicdun gäm week ee köölë riëëu,

²⁸ Ku abï aa aciɛɛn të cä wek lööŋkë rïïu, ku wɛlkï röt wei bäk yiëth kɔ̈k lam, yiëth kɛ̈nkï keek kɔn lam ɣɔn.

²⁹ Të le Bɛ̈nydït week lɔ bɛ̈ɛ̈i piny bäk lɔ nöömë, wek bï athiɛɛi aa lueel në kuur de Geridhim nɔm, ku aciɛɛn në kuur de Eebal nɔm.

³⁰ (Kek ee kurkë kaarou anukï ë wɛ̈ɛ̈r de Jordan baŋ të lɔ aköl athɛ̈i, piny de kɔc ke Kanaan ee rɛ̈ɛ̈r në Araba ë wak de Jordanic. Anukï të lɔ aköl athɛ̈i, acïkï mec arëët në tiim ke ɣok ke Mameer thiääk në wun cɔl Gilgal.)

³¹ Wek cï thiɔ̈k në luɔi bä wek wɛ̈ɛ̈r de Jordan teem kɔ̈u ku nämkï piny cïï Bɛ̈nydït Nhialicdun gäm week. Të la wek e lɔ nööm ku rɛ̈ɛ̈rkï ëtɛ̈ɛ̈n,

³² Ku dɔ̈tkï apiɛth në luɔi bä wek lööŋ gäm ke week kedhie ee köölë riëëu.