Nyöŋ 10 - JAM DE NHIALIC 2011

Mothe abe Lööŋ Nööm

¹ “Na wën, ke Bɛ̈nydït yöök ɛn, an, guaŋ pɛɛm ke kur kaarou cït man ë ka wään tueŋ, ku loi athänduŋ de tim bïï keek tääu thïn. Bäär nhial të nu yɛn ë kuur nɔm,

² ku yɛn bï ee kurkë gääriic ka cä ke gäär ë kur wään bä ke dhoŋë yiic, ku abä keek tääu në athändukic.

³ Aguɔ athänduk looi në tim de aluii ku guaŋ pɛɛm ke kur kaarou cït ka wään tueŋ, ku lɛɛr keek ë kuur nɔm.

⁴ Na wën ke Bɛ̈nydït ë gäär pam ke kur kɔ̈ɔ̈th wël cït wël wään cï kɔn gɔ̈ɔ̈r tueŋ, lööŋ kathiëër wään cï gäm week ɣɔn jiɛɛm En në macic, kööl ɣɔn bä wek amatnɔm looi ë kuur thar, go Bɛ̈nydït ya gäm pɛɛm,

⁵ aguɔ rɔt puk ku laar piny ë kuur nɔm, ku cït man cïï Bɛ̈nydït yɛn yɔ̈ɔ̈k, acä keek tääu athändukic, Athänduŋ cä looi, ku acïk tɔ̈u ëtɛ̈ɛ̈n gɔl ee të wäänë.”

⁶ (Na wën ke kɔc ke Yithriɛl ë ke jël në Bene Jaakan, ku lëkkï Mothera. Ku ëtɛ̈ɛ̈n yen ë thou Aron ku tɔ̈ɔ̈u ëtɛ̈ɛ̈n, go wënde Eleyadhar tëde lɔ̈ɔ̈k nööm ke ye bɛ̈ny de kake Nhialic.

⁷ Ëtɛ̈ɛ̈n acïk bɛ̈n lɔ Gudgoda ku bɛɛrkï yic Jotbatha, tëde yic pïïu arëët.

⁸ Ku në kuur nɔm Bɛ̈nydït acï röör ke Lebai bɛ̈n lɔc bïk athänduŋ de män ë Bɛ̈nydït aa muk, ku bïk lui ke ke ye bäny ke kakë Nhialic, ku bïk athiɛɛi aa lueel në rinke. Ku kakë aŋootkï ke ke ye luɔiden.

⁹ Yeka kën ë dhiën de Lebi piny nööm cït man ë dhiën kɔ̈k, kë cïk yök ee diɛk në luöi, cïï kek aa bäny ke kakë Nhialic, cït man cïï Bɛ̈nydït Nhialicdun ye lueel.)

¹⁰ Yɛn cï rɛ̈ɛ̈r ë kuur nɔm në nïn kathiërŋuan ku wɛ̈ɛ̈riic kathiërŋuan, cït man cän ye looi wään tueŋ. Go Bɛ̈nydït ya bɛ piŋ thok ka akën we riɔ̈ɔ̈r nyïïn.

¹¹ Ëtɛ̈ɛ̈n ë ya yɔ̈ɔ̈k bä week lɔ wat, aguɔkï piny lɔ nööm, piny ɣɔn cï lɛ̈k kuarkun.

Kë Kɔɔr ë Nhialic

¹² “Kɔc ke Yithriɛl ënɔɔnë piɛŋkï kë kɔɔr ë Bɛ̈nydït tëde week: Lamkï Bɛ̈nydït ku luɔikï lööŋke kedhie. Nhiaarkï ku yak luööi në piɔ̈ndun ëbɛ̈n,

¹³ ku riëëukï lööŋ kedhie. Agäm keek week ee köölë në baŋ bä wek piɛth.

¹⁴ Paannhial ya ee këde Bɛ̈nydït, ku piny nɔm ee këde aya, ayï këriëëc tɔ̈u thïn ëbɛ̈n.

¹⁵ Ku Bɛ̈nydït anhiaar kuarkun aläldïïtë, ago week lɔc ku cï kɔc kɔ̈k lɔc, ku wek ŋoot ke we ye kɔckɛn cï lɔc.

¹⁶ Ka ënɔɔnë, gɔl ee köölë yak Bɛ̈nydïtdun riëëu, ku duökï nïïm be riɛl.

¹⁷ Bɛ̈nydït Nhialicdun anu nhial ë yiëth nïïm ëbɛ̈n, ku riɛl nïïm ëbɛ̈n. Yen Adït ku Awärjäŋ, ku abïï ë dhil riɔ̈ɔ̈c. Yen acïï tɛ̈ɛ̈k yic ee nyuɔɔth, ku acïï kumthok ee gam.

¹⁸ Aye kɔɔr ë yic nɔn bïï mïth abɛɛr ku tiiŋ abaar aa luööi apiɛth, yen anhiaar alɛi rɛ̈ɛ̈r në kɔckuɔ, aye keek gäm kacaam, ku lupɔɔ.

¹⁹ Ka yak nhiëër nyuöth alɛikë, në baŋ cä wek kɔn aa alɛi në Rip.

²⁰ Riëëukï Bɛ̈nydït Nhialicdun, ku yak lam Yen Yetök, yak aa kɔc adöt tëde Yen, ku yak kuëëŋ në rin ke Yetök.

²¹ Yak leec. Ee Nhialicdun, ku acäk keek tïŋ ë wenyïïn wapäc, kek kadït ku göök dït cï ke luöi week.

²² Wään lee ë kuarkun Rip, aake ye kɔc kathiërdhorou tei. Ku ënɔɔnë Bɛ̈nydït Nhialicdun acï week tɔ juëc cït man ë kuɛl nu nhial.