Nyöŋ 1 - JAM DE NHIALIC 2011

Anyooth

¹ Kënë ee jam lëkkë Mothe kɔc ke Yithriɛl kedhie, në jɔ̈ɔ̈r tɔ̈u në wɛ̈ɛ̈r de Jordan kɔ̈u të lɔ aköl amiäk, ku kɔc rɛ̈ɛ̈r ë jɔ̈ɔ̈ric, në Araba thiääk kekë Thup, në kaam de Paran kekë wuöt cɔl ke: Topel ku Laban ku Ɣadheroth ku Didhaɣab.

² (Ku të jël ë raan në kuur de Thinai le Kadec Barniya. Ë kueer de kuur ë Edom ee nïn kathiëër ku tök.)

³ Na ɣɔn ë run kathiërŋuan cök, në jäl ë kɔc ke Yithriɛl ë Rip në kööl tueŋ de pɛɛi ë thiëër ku tök, ke Mothe jɔ kɔc ke Yithriɛl lɛ̈k këriëëc ëbɛ̈n, kë cïï Bɛ̈nydït lɛ̈k en an bïï guiir ke kɔc ke Yithriɛl.

⁴ Kënë ee wään cïï Bɛ̈nydït Thiɣon kekë Og tiaam. Thiɣon aaye melik de kɔc ke Amor, ku aa rɛ̈ɛ̈r wun cɔl Ɣecbon, ku Og aaye melik de Bacan, ku aa rɛ̈ɛ̈r ë Acetaroth kekë Ederi.

⁵ Kɔc ke Yithriɛl rɛ̈ɛ̈r ë wɛ̈ɛ̈r de Jordan kɔ̈u të lɔ aköl amiäk paan de kɔc ke Mowap. Na ɣɔn ëtɛ̈ɛ̈n ke Mothe ë jɔ lööŋ ke Nhialic guiëër keek lueel an,

⁶ “Bɛ̈nydït Nhialic ë jam kekë week ë kuur ë Thinai nɔm lueel an, ‘Wek cï tɔ̈u aläldïïtë ë kuurë lɔ̈ɔ̈m.

⁷ Cuɔckï röt ku lakï piny ë kuur de kɔc ke Amor, ku lɔ ɣään thiɔ̈k ëtɛ̈ɛ̈n në Araba ku Jordan yɔu kedhie, ku kur nïïm ku lɔ të lɔ aköl athɛ̈i ku të lɔ wöuwic, ku të lɔ Wɛ̈ɛ̈rdïït ɣer yɔu ku piny de Kanaan kekë Lebanɔn lɔɔr abä ɣet wɛ̈ɛ̈r dït yɔu, wɛ̈ɛ̈r ë Yuparat.

⁸ Tiëŋkï wek cä gäm piny ka week lakï thïn, ku nämkï takï ee këdun. Acïï Bɛ̈nydït thɔ̈n kuarkun yï: Abraɣam ku Yithaak ku Jakop kekë mïth ke mïthken.’

Mothe Akuany Bäny

⁹ Ku ɣɔn ë köölë yic aa cä lueel an, ‘Acïn luɔɔi bän week bɛ lëu në luɔɔi wat ɛn week yatök.

¹⁰ Në luɔɔi cïï Bɛ̈nydït Nhialicdun week tɔ juëc, ku wek cï juëc ka wek cï ciët kuɛl nu nhial.

¹¹ Ku yɛn läŋ Bɛ̈nydït de kuarkun, bïï week tɔ ye kɔc juëc raan agum, ku thieei week wedhie, cït man ë kë cï thɔ̈n week.

¹² Ku yɛn cïï ka nuan week ayï agööthkun ayï ka guiɛɛrkï bï lëu yatök.

¹³ Ka wek lackï röör në dhiëënkun thook kedhie röör pelnïïm ku ŋickï käŋ ku rïïuwë keek gup. Ku abä keek tɔ ee bäny nu ë wenïïm.’

¹⁴ Guɔkï këdï bɛ̈ɛ̈r an, ‘Këduön cï lueel an bäk looi apiɛth.’

¹⁵ Guɔ kɔc ee kɔc wat nööm ë weyiic, ku tääu keek në wenïïm, ku kɔ̈k ye bäny de agum ë kɔc. Ku ye kɔ̈k bäny de bɔt ë kɔc, ku ye kɔ̈k bäny de thiërdhïc ë kɔc, ku ye kɔ̈k bäny ke thiëër ë kɔc, ku kuany bäny kɔ̈k aya në dhiëënkun yiic kedhie.

¹⁶ “Guɔ bänykun yɔ̈ɔ̈k an, ‘Yak lööŋ ŋiëc guiir në kaam de kɔc ke Yithriɛl kapäc, ku yak löŋ ŋiëc guiir aya në kaam de Yithriɛl kekë kɔc lei.

¹⁷ Ku të guiɛɛr wek löŋ, yak kɔc kiëët nïïm kedhie, ku duökï kɔc ee pɔ̈ɔ̈c yiic, cakaa raan yïndï ë cïn raan ya wek riɔ̈ɔ̈c ë yen në biäk ee guiëër ë löŋdun bɛ̈n tëde Nhialic. Ku bɛ̈ɛ̈ikï gööny rilic tëde yɛn ku abä keek bɛ̈n guiir.’

¹⁸ Ku në ye köölë wek cä lɛ̈k këriëëc bäk dhil looi ëbɛ̈n.

Nëëm Toocë Keek Wutic Kadec Barniya

¹⁹ “Ku cït man cïï Bɛ̈nydït wook yɔ̈ɔ̈k, Goku jäl ë kuur ë Thinai ku tëku ë kueer ë jɔ̈ɔ̈r dïït de riɔ̈ɔ̈c tɔ̈u piny ë kuur ë kɔc ke Amor, na wën acuk ɣëët Kadec Barniya,

²⁰ guɔ lueel an, ‘ënɔɔnë wek cï ɣëët piny ë kuur ë kɔc ke Amor, paan cïï Bɛ̈nydït Nhialic de kuarkun gäm wook.

²¹ Tiëŋkï yeka. Lakï ku ɣapkï cït man wään cien we yɔ̈ɔ̈k, an, duökï lɔ wïlwïl ku duökï riɔ̈c.’

²² “Ku wek cï bɛ̈n tëde yɛn, ku luɛɛlkï an, ‘Toocku kɔc kɔ̈k tueŋ në wonïïm bïk piny lɔ neem, agokï wo lɛ̈k kueer piɛth buk dɔmic ku ee pɛ̈ɛ̈nydït tɔ̈u adï kek tɔ̈u ëtɛ̈ɛ̈n.’

²³ “Guɔ täŋë tïŋ ke piɛth, guɔ kɔc kathiëër ku rou kuany në weyiic, në dhiën thook kedhie, raan töŋ ë dhiënë ku raan töŋ ë dhiënë.

²⁴ Gokï jäl ku lekï piny ë kuur, agokï bɛ̈n ë wak de Ecekol ku cɛɛthkï apiɛth.

²⁵ Ku jɔtkï mïth ke tiim nu ë pinyë në keek ëtök, gokï mïth ke tiim yiɛ̈n wook ku luelkï an, ‘Ee piny piɛth yen gëm Bɛ̈nydït Nhialicda wook.’

²⁶ “Ku wek cï jai në luɔi bä wek lɔ ëtɛ̈ɛ̈n, wek cï jam de Bɛ̈nydït Nhialicdun rɛɛc.

²⁷ Wek cï bɛ̈n dok në pɛɛnykun yiic ku luɛlkï, an, “Bɛ̈nydït aman wook, ka ë wook bɛ̈ɛ̈i bei në Rip bïï wook bɛ̈n tääu në kɔc ke Amor cin bïk wo bɛ̈n riɔ̈ɔ̈r nyïïn.

²⁸ Ee tënou yen bï wok lɔ? Mïthëkɔckuɔ acïk wook tɔ pɛ̈l röt wei? Ayek lueel an, Ril kɔc ku bɛ̈ɛ̈r awärkï wook ku pɛ̈ɛ̈nydïtken adïtkï ku adekï kɛ̈ldït ɣet nhial ya. Ayï kɔc ke Anakim acuk kek tïŋ ëtɛ̈ɛ̈n.

²⁹ “Aguɔ lɛ̈k week, an, ‘Duökï riɔ̈c aläl në keek.

³⁰ Bɛ̈nydït Nhialicdun, raan nu ë wenïïm abï week thäär tɔŋ, cït man wään cï Yen e luöi week ë Rip, ke we daai në wenyïïn.

³¹ Ku wään ë jɔ̈ɔ̈ric acäk tïŋ ɣɔn ɣɛ̈ɛ̈cë Bɛ̈nydït Nhialicdun week, cït man ee wun meth wënde ɣääc, ku wek cï piny caath abäk jɔ ɣëët ee tënë.

³² Ku ee kakë yiic kedhie, wek cïï Bɛ̈nydït Nhialic ŋäth,

³³ Raan wään tɔ̈u ë wenïïm tueŋ ë cäthdunic, ee week meer nïïm në mac wakɔ̈u, na akɔ̈l ke kum wenïïm në luät, ku aaye piny bä wek ɣap thïn kɔɔr ku ye week nyuöth kueer bä we tëëk thïn.

Bɛ̈nydït Adui Yithriɛl

³⁴ Na ɣɔn, aa cï Bɛ̈nydït ke cäk lueel piŋ, go piɔ̈u diu arëët ku lueel alëyɔ̈ɔ̈ an,

³⁵ “Acïn raan tök në we yiic, wek ee rem rɛɛcë, bï piny piɛth wään cä lueel an bä gäm kuarkun tïŋ.

³⁶ Ee Kalep wën de Jepuna yetök, yen abï ɣëët ë pinyë. Acï a luööi në piɔ̈n piɛth. Ka bä gäm piny wään cï neem kekë mïthke kedhie.

³⁷ Ku në biäkdun Bɛ̈nydït acï piɔ̈u bɛ̈n diu kekë yɛn, ago lueel, an, “Yïn cïï bï lɔ thïn aya.”

³⁸ Ku raan ee yïn kuɔny cɔl Jocua wën de Nun, abï lɔ thïn, jɔ riit piɔ̈u, në biäk bï en kɔc ke Yithriɛl lɛɛr bïk piny lɔ ɣap.’

³⁹ “Ku Mïthkuön thiikë wään yak lueel an bïï keek peec, wek mïthkuön kën këpiɛth kɔn ŋic ayï këriëëc abïk lɔ ee pinyë abä gäm keek, ku abïk piny nööm.

⁴⁰ Ku week, pɔ̈kkï röt ciëën ku lakï ë jɔ̈ɔ̈ric të lɔ kueer de Wɛ̈ɛ̈r Thith

⁴¹ Aguɔkï bɛ̈ɛ̈r, an, “Wek cï kërac luöi Bɛ̈nydït. Wek bï lɔ tueŋ ënɔɔnë buk lɔ piɔ̈t cït man cïï Bɛ̈nydït Nhialicda wo yɔ̈ɔ̈k, ago ŋɛk tɔɔŋke aa nööm ë weyiic aa yak tak an bï tɔŋ lak thɔ̈ɔ̈r piny ë kuur yic piɔl.

⁴² Ku Bɛ̈nydït acï ya yɔ̈ɔ̈k alëyɔ̈ɔ̈ an, “Yɔ̈ɔ̈k keek, cïkï bï lɔ tueŋ ku thɛ̈ɛ̈rkï në baŋ cän bï tɔ̈u wokë week, wek bïï kɔc ke aterdun keek tiaam.

⁴³ Na wën ke we yɔ̈ɔ̈k, aguɔkï kan piŋ wek cï jam de Bɛ̈nydït rɛɛc gam, ku në ciën piɔ̈ndun, wek cï bɛ̈n lɔ tueŋ lakï piny ë kuur.

⁴⁴ Go kɔc ke Amor wään ceŋ piny ë kuur, gokï tɔŋ yiɛ̈n week, ku copkï week cït man ë kiëc, ku nɛ̈kkï wek piny gɔl në Edom leer ë kueer de Ɣorma.

⁴⁵ Aguɔkï bɛ̈n ciëën ku dhiaukï në Bɛ̈nydït nɔm, ago dhiëndun cïï woi, ku cïï jamdun piŋ aya.

Run ke Jɔ̈ɔ̈ric

⁴⁶ “Aguɔkï jɔ rëër në Kadec ë nïn juëc, kaamdït arëët acäk thöl ëtɛ̈ɛ̈n.