Neɣe 9 - JAM DE NHIALIC 2011

Kɔc Agamkï Karɛcken

¹ Në kööl ye pɛɛi thok thiërrou ku ŋuan yen ë pɛɛi manë, go kɔc ke Yithriɛl kenïïm mat ku reeckï cäm, nyooth kek dhiën ë piɔ̈u de awɛ̈ɛ̈ckɛn yek looi.

² Keek acïk röt pɔ̈c bei pei në juöör lei yiic. Aceŋkï anuɛɛr ku ayek kenïïm wäl abuui, nyooth kek dhiën ë piɔ̈ɔ̈thken, ku ëtɛ̈ɛ̈n acïk bɛ̈n kɔ̈ɔ̈c läŋkï bïk ke päl awɛ̈ɛ̈cken ku awɛ̈ɛ̈cë cïï kuarken looi.

³ Në kë cït thɛɛr kadiäk ke löŋ de Bɛ̈nydït Nhialicden ë kuënë keek, ku thɛɛr kɔ̈k kadiäk ke ke gam awɛ̈ɛ̈cken ku läŋkï Bɛ̈nydït Nhialicden.

⁴ Ëtɛ̈ɛ̈n, ade pam dïït ye kɔc ke Lebaikë kɔ̈ɔ̈c në kenïïm yï: Jecua ku Bani, ku Kadmiel, ku Cebania, ku Buni, ku Kepira, ku Bani ku Kenani. Acïk Bɛ̈nydït Nhialicden bɛ̈n lɔ̈ŋ në röl dït.

⁵ Kɔc ke Lebaikë: Jecua, ku Kadmiel, ku Bani, ku Ɣacabania, ku Cerebia, ku Ɣodia, ku Cebania ku Pethaya. Acïk lueel an: “Jatkï röt ku lɛ̈kkï Bɛ̈nydït Nhialicdun thieithieei. Lɛckï ënɔɔnë aɣet athɛɛr! Takï raan ëbɛ̈n thieei dhuëëŋ de rinke, takï leec mɛnh ë raan ku lëk thieithieei!”

Lɔ̈ŋ de Gäm de Awɛ̈ɛ̈c

⁶ Ku ëtɛ̈ɛ̈n kɔc ke Yithriɛl acïk bɛ̈n lɔ̈ŋ në ee lɔ̈ŋë an, “Yïn Bɛ̈nydït, Yïn Yïtök, Yïn ee Bɛ̈nydït, Yïn cï të nhial looi ku kuɛl nhial. Yïn cï të ril looi ku loi wɛ̈ɛ̈r ku këriëëc ëbɛ̈n tɔ̈u ë keyiic. Yïn ee këriëëc ëbɛ̈n gäm wëi. Ka ril ke paannhial ayek kenïïm guöt piny ku läŋkï Yïn

⁷ Yïn Bɛ̈nydït Nhialic cï Abram lɔc ku bɛ̈ɛ̈iyë bei piny de Ur tɔ̈u në Babilonia, ku waar rinke an Abraɣam.

⁸ Acï yök nɔn en raan ee piɔ̈u adöt ke Yïn, ku mac löŋ wekë yen. Acï thɔ̈n en bä gäm piny de kɔc ke Kanaan piny de kɔc ke Ɣit kekë kɔcke piny de Peridh ku Jebuth ku Girgac ke bï ya piny bïï käude rëër thïn. Yïn cï kë cï than piny muk në biäk Yïn Raan adöt.

⁹ “Acï tïŋ guöm cïï kuarkuɔ gum ɣɔn piny de Rip, Yïn cï cɔ̈tdɛn kɔɔr kek kuɔɔny piŋ në Wɛ̈ɛ̈r Thith nɔm.

¹⁰ Yïn cï kagɛ̈iyë luöi melik, ku bänykɛn ke luɔi ku kɔc ceŋ pinyde në biäk ŋic Yïn en yen yaaŋ ɣɔn cïï kek kɔcku yɔŋ. Yïn cï tiam në tïc de rin ŋoot ke tɔ̈u ke Yïn aɣet cï ënɔɔnë.

¹¹ Në wɛ̈ɛ̈ric, Yïn cï kueer luöi kɔcku, ku tɛ̈ɛ̈kë ke tëril. Ku mɔu kɔc cop keek piny ë pïïu thäär të thuth, cït man ë kɔi cï dïïr në apiöŋ dïït ë wɛ̈ɛ̈ric.

¹² Aye ke wat aköl në mën de luät, ku Ye kueerden meeric wäkɔ̈u ë mën de mac.

¹³ Në kuur ë Thinai nɔm Yïn ëbɛ̈n piny paannhial, ku jamë we kɔcku, ku gämë ke lööŋ lɔgɔk ku wëët piɛth.

¹⁴ Acï ke wɛ̈ɛ̈t bïk kenïïm aa tak në akööl ë thabath ɣeric bïk tɔ piath, ku në kueer ë lïmduön Mothe acï ke gäm lööŋku.

¹⁵ “Ɣɔn cïï cɔk ke nɔ̈k acï ke bɛ̈n gäm kuïn paannhial, ku gämë ke pïïu ë bɔ̈ bei ë kuuric ɣɔn cïï kek yal. Acï lɛ̈k keek an, bïk piny cï than an bä gäm keek dɔm.

¹⁶ Ku kuarkuɔ aake ye kɔc ɣɛ̈ɛ̈c kenïïm acïk nïïm riɛl ëtör gokï lööŋku kɛ̈n gam.

¹⁷ Acïk Yï rɛɛc thok, ku mɛ̈ɛ̈rkï nïïm në këriëëc ɣɔn cï looi ëbɛ̈n, mɛ̈ɛ̈rkï nïïm në kagɛ̈iyë ke cï ke looi, në lɛcden, gokï röt lɔ̈c bɛ̈ny bï ke dak nïïm në lïïmic paan ë Rip. Ku Yïn ee Nhialic ee kɔc päl awɛ̈ɛ̈c, Yïn de nɔm kok de piɔ̈u, ku nhiëër agɔk ku cïï ee dap gɔ̈th, kok de piɔ̈ndu adït arëët, ka kɛ̈n ë ke nyääŋ piny.

¹⁸ Cakaa ɣɔn cï kek röt luöi yanh cïk looi ke cït guöp miɔɔr thiin ë weŋ, ku luelkï an ee yen nhialiny ë bïï ke bei ka paan ë Rip! Ka, cïk Yïn jɔ läät në lɛ̈ɛ̈t rac Bɛ̈nydït!

¹⁹ Ku akɛ̈n ë ke bɛ̈n päl wei ë jɔ̈ɔ̈ric ëtɛ̈ɛ̈n, në biäk dïït ë kok de piɔ̈ndu, ku Yïn kën mën de luät nyaai ayï mën de many ɣɔn ee keek nyuöth kueer aköl ku wakɔ̈u.

²⁰ Në biäk de piathdu acï ke bɛ̈n lɛ̈k kë duëërkï looi, aake ye cääm në mana, ku gäm ë keek pïïu bïk dek.

²¹ Në run kathiërŋuaniic në jɔ̈ɔ̈ric, acï ke gäm këriëëc kɔɔrkï ëbɛ̈n, lupɔɔken acïkï ee rɛɛt, ku cökken akën arɛɛm ke tɔ but.

²² “Acï keek tɔ tiam juöör, ku ciɛɛŋ juëc ku piiny nu në akɛɛthken nïïm, acïk piny de Ɣecbon, ɣɔn mɛcë Thiɣon bɛ̈n dɔm në riɛl, ku piny de Bacan ɣɔn nu ë Og ke ye melik thïn.

²³ Acï ke gäm mïth juëc cït kuɛl nhial ku tɔ ke pec piny ku rëërkï thïn, në thön ɣɔn cïï Yïn e thɔ̈n kuarken nɔn bï Yïn ke gäm piny.

²⁴ Ku peckï piny de Kanaan ku tiamkï kɔc rɛ̈ɛ̈r ee pinyë. Yïn cï kɔcku gäm riɛl, bïï kek kë nhiaarkï looi, në kɔc ku meliik ke Kanaan.

²⁵ Kɔcku acïk wuöt ril ë tör dɔm, ayï piny ee luɔk, ku ɣööt cï thiäŋ ë këriëëc ëbɛ̈n, ku yïth cï thök në wëc, ku duum ke tiim ke olip ku tiim ee luɔk në mïth, ku camkï këriëëcdɛn kɔɔrkï abïk cuai, acïï këriëëc piɛɛth cï gäm keek ëbɛ̈n ke tɔ mit piɔ̈ɔ̈th.

²⁶ “Ku kɔcku acïk jaai ku reeckï Yïthok, acïk kekɔ̈ɔ̈th wɛ̈l lööŋku, acïk tïtkuön ee keek yɔ̈ɔ̈k nɔ̈k, kɔc ee keek yɔ̈ɔ̈k bïk röt dɔ̈k Yïn, keek ayek Yï läät në län rac në thaar nyin ëbɛ̈n.

²⁷ Ëtɛ̈ɛ̈n acï keek tɔ pec ëkɔc ke aterden, ku cieŋkï keek, na lek tɔ̈u në nuanic ke ke cɔl kuɔɔny tëde Yïn, ku bɛ̈ɛ̈rë këden paannhial, në kokdepiɔ̈nduön dït acï keek tuöc bäny, bïk keek bɛ̈n kony në kɔc ke aterden.

²⁸ Na lɔ mät bɛ̈n ke ke be awɛ̈ɛ̈c nyɔk në luɔi, ku be keek tɔ nyɔk ë pɛ̈c peecë keek në kɔc ke aterden. Na lek awɛ̈ɛ̈cken gam ku thiëckï Yïn bä ke kony paannhial, aye ke piŋ ku kony ke në thaar nyin ëbɛ̈n në kokdepiɔ̈nduön dït.

²⁹ Acï ke yɔ̈ɔ̈k bïk wëëtdu gam ku në biäk ye kek kenïïm ɣääc, ayek lööŋku rɛɛc, na cakaa nɔn ye muŋ de lööŋku kueer de pïïr. Ayek nïïm riɛl ku reeckï ke gam.

³⁰ Ruöönë ee lɔ në ruöönë cök ke ke ye yɔ̈ɔ̈k në piɔ̈n lir, ku thiäŋ tïtku në Wëidït bïk keek jääm, ku kɔcku acïk aa mïŋ, ka cï keek tɔ pec ë juöör kɔ̈k.

³¹ Ku në biäk dïït ë kokdepiɔ̈ndu, akɛ̈në ke nyääŋ piny, ku nɔn riäk keek. Yïn ee Nhialic de nhiëër de nɔm kokdepiɔ̈u!

³² “Ënɔɔnë Yïn Nhialicdït lëu këriëëc ëbɛ̈n! Ee piny riääc nɔm ëbɛ̈n, ku Yïn de kokdepiɔ̈u, ku Ye löŋduön cï mac döt. Gɔl ɣɔn yɔŋ ë meliik ke Athiriya wook, agut cï ënɔɔnë në Meliikkuɔ, ku bänykuɔn ke kake Nhialic ayï tït ke Nhialic, ku kuarkuɔ ku kɔc kedhie. Tak Yïnɔm në wook në guömdïït cïï wok yaaŋ guum!

³³ Ee yic yen cï looi bä wo luöi këtuc, cakaa ɣɔn cïï wok wäc ke Yïn ee piɔ̈u piath we wook.

³⁴ Kuarkuɔ, ku Meliikkuɔ, ku bänykuɔ, ku bänykuɔn ke kake Nhialic, akënkï lööŋku döt. Ku akënkï yöökduön cï Yïn ke yɔ̈ɔ̈k piŋ, ku jäny.

³⁵ Në athiɛɛidu, aye meliik kɔcku mac, të rëër kek piny lääu ŋic luɔk cï gäm keek, ku ayek jaai në luɔi bï kek luɔi de karɛc pɔ̈l ku luuikï Yïn.

³⁶ Ku ënɔɔnë wok ee lïïm piny ee yen ë gämë wook, piny ŋic luɔk, ee wo gäm kacaam.

³⁷ Ka ye piny ke luɔk ayek lɔ tëde meliik cï tääu në wo nïïm, në biäk cïï wok karɛc looi. Keek ayek këdɛn cïk tak luöi wook ayï ɣɔ̈kkuɔ, ka wok tɔ̈u në jiɛthëpiɔ̈u ku nɔm muum dït agökic!”

Kɔc Athanykï Kë cï Mat

³⁸ Në biäk de ee kënë ëbɛ̈n, wok kɔc ke Yithriɛl, wok bï löŋ mac ku gɛ̈ɛ̈rku piny, ku bänykuɔ, ku kɔc ke Lebai ku bänykuɔn ke kake Nhialic abïk thaanyic.