Neɣe 8 - JAM DE NHIALIC 2011

Edhera Akuën Kɔc Awerek de Lööŋ

¹ Na ɣɔn në pɛɛi ë dhorou ke kɔc ke Yithriɛl acïk jɔ nyuc kedhie në wuötkeniic, ku në kööl tueŋic në ee pɛɛi manë acïk kenïïm bɛ̈n mat ë Jeruthalem, në pëëric lɔŋ të lɔ Thoŋ de Pïïu. Gokï Edhera thiëëc bɛ̈ny de kake Nhialic, ku ee bɛ̈ny ee lööŋ ɣɔn cïï Bɛ̈nydït ke gäm kɔc ke Yithriɛl në kueer ë Mothe wɛ̈ɛ̈t bï awerek de lööŋ bɛ̈ɛ̈i.

² Go Edhera awerek lɔ bɛ̈ɛ̈i të wën cïï amatnɔm mat thïn, röör, ku diäär ku mïth cï nyïïn ŋuɛ̈ɛ̈n duëër löŋ yökic.

³ Në pëëric lɔŋ të lɔ kal thoŋ de pïïu yen aa kɛ̈ɛ̈c en thïn, ku kuën keek awerek de lööŋ, gɔl ɣɔn amiäk abï akɔ̈l kɔ̈ɔ̈c cil, ku keek aake cï ke yïth päl piny apiɛth ke ke pïŋ.

⁴ Yen Edhera aa kääc në pam nɔm pam thöny ë loi në biäk de ee kënë, ku kääc yï Matithia, ku Cema, ku Anaya ku Yuria, ku Ɣilikia, ku Maathia në biäk cuënyde, ku kääc yï: Pedaya, ku Miciɛl, ku Malikija, ku Ɣacum, ku Ɣacabadana, ku Dhekaria ku Meculam në ye biäk cam.

⁵ Të wën kɛ̈ɛ̈c Edhera nhial të thöny në kɔc nïïm, gokï jɔ döt guöp, na wën ale awerek liep, gokï röt jat nhial kedhie.

⁶ Go Edhera lueel an, “Lɛckï Bɛ̈nydït, Nhialic dït!” Go kɔc kecin jat nhial kedhie, gamkï an, “Amiin! Amiin!” Ku guŋkï ke ke läŋ abïk piny jak në kenïïm.

⁷ Ëtɛ̈ɛ̈n gokï röt bɛ jɔt ku kɛ̈ɛ̈ckï në ɣäänkeniic, ku jɔ kɔc ke Lebaikë cök ke lööŋ wɛ̈ɛ̈ric keek yï Jecua, ku Bani, ku Cerebia, ku Jamin, ku Akub, ku Cabethai, ku Ɣodia, ku Maathia, ku Kelita, ku Adharia, ku Jodhabad, ku Ɣanan, ku Pelaya.

⁸ Gokï pukic yen löŋ de Nhialic, ku werkï yic ago kɔc yökic.

⁹ Na wën ale kɔc e piŋ yen kë kɔɔr ë löŋ, goke gut piɔ̈ɔ̈th arëët abïk duɛ̈ɛ̈r an dhiaukï. Go Neɣemia bɛ̈ny de baai ku Edhera bɛ̈ny de kake Nhialic, ku ee bɛ̈ny ee lööŋ wɛ̈ɛ̈t ku kɔc ke Lebai wën ee löŋ wɛ̈ɛ̈ric kɔc ëbɛ̈n, acïk lueel an, “Köölë ee kööl ɣeric tëde Bɛ̈nydït Nhialicdun ka wek cïï piɔ̈ɔ̈th bï jiɛth thïn, ku nɔn dhiaukï.

¹⁰ Jälkï ënɔɔnë lak baai ku luɔikï këcamdït ku ramkï cämdun ku mɔ̈ndun në kɔc dɛk ë käŋ. Köölë aɣeric tëde Bɛ̈nydïïtda, ka duökï piɔ̈ɔ̈th jieth. Miɛtëpiɔ̈u ë gëmë Bɛ̈nydït week abï week tɔ ril.”

¹¹ Go kɔc ke Lebai kɔc cath në kɔciic ke ke ye kɔc yɔ̈ɔ̈k bïk röt päl piny ku cïkkï piɔ̈ɔ̈th bï jiɛth në kööl ɣeric.

¹² Go raan ëbɛ̈n jɔ lɔ baai ku ciëm, ku dëk në miɛtëpiɔ̈u ku jɔkï këriëëc ëbɛ̈n rɔm ë kɔc kɔ̈k, në biäk cïï kek en yökic yen kën ë kuënë keek.

Dhuëëŋ de Kɛ̈ɛ̈t

¹³ Në kööl däŋë ke röördït nu dhiëën nïïm mɛ̈tkï në bäny ke kake Nhialic ku kɔc ke Lebai, lekkï tëde Edhera, bï ke lɔ wɛ̈ɛ̈t në lööŋ.

¹⁴ Gokï jɔ yökic nɔn ye lööŋ ë gëm Bɛ̈nydït, kɔc ke Yithriɛl në kueer ë Mothe ke yɔ̈ɔ̈k, bïk aa rëër në kɛ̈ɛ̈tiic në nïn ke akööl ke Dhuëëŋ de Kɛ̈ɛ̈t.

¹⁵ Ëtɛ̈ɛ̈n yen acïï kek jamë bɛ̈n tuɔɔc Jeruthalem ku wuöt kɔ̈kiic an, “Lakkï në kur nïïm, ku bɛ̈ɛ̈ikï kër ke tiim ke olip, ku kër ke aköt ku lɔ kër ke tiim kɔ̈k kithiic bäk lɔ yök bï ke kɛ̈ɛ̈t bɛ̈n yïk, cït man cïï ye wɛ̈ɛ̈t në kë cï gɔ̈ɔ̈r në löŋic.”

¹⁶ Ëtɛ̈ɛ̈n kɔc acïk kër ke tiim bɛ̈n lɔ bɛ̈ɛ̈i ku yïkkï röt kɛ̈ɛ̈t në ɣöötken nïïm ku për ë kɛ̈lken yiic ku për ke ɣön ë Nhialic yiic, ayï pëër dïït ye kɔc kenïïm mat thïn, në Thoŋ de Pïïu ku Thoŋ de Eparaim.

¹⁷ Ku amatnɔm de kɔc ɣɔn cï lɔ bɛ̈n ciëën në pɛ̈cic, acïk bɛ̈n rëër në kɛ̈ɛ̈t ë yïkï yiic, ku kënë yen ee yïŋ tueŋë jɔke bɛ nyɔk në yïk gɔl në akööl ɣɔn ke Jocua wën ë Nun, ku raan ëbɛ̈n acï piɔ̈u miɛt në këpiɛth cït ee kënë.

¹⁸ Gɔl në kööl tueŋ de dhuëëŋ agut cï kööl ë thök de dhuëëŋ, awerek de löŋ de Nhialic aa yek cool ë kueen kek en yic. Aake loi dhuëëŋ në nïn kadhorou yiic, na ɣɔn në kööl ë bɛ̈t ke ke jɔ lɔ̈ŋ de amatnɔm looi, cït man ë kë cï löŋ lueel.