Neɣe 3 - JAM DE NHIALIC 2011

Kal ë Jeruthalem Abe ë Yïk

¹ Kënë yen ee nyöŋ ë be kal ë pänydït nyɔk në yïk ka. Go Eliacip bɛ̈nydïït ë kake Nhialic kekë bäny ke kake Nhialic acïk Thoŋ de kal cɔl Amääl nyɔk në yïk aya, ku gëmkï Bɛ̈nydït, ku tɛ̈ɛ̈ukï athïïn tëden. Ku gëmkï kal Bɛ̈nydït aɣet Aloocdïït de Bɔt ku Aloocdïït de Ɣananel, ye wut tiit.

² Go kɔc ke Jeriko biäk däŋë yïk. Ku yïk Dhakur wën de Yimeri biäk däŋë.

³ Ku yïk dhiën de Ɣathenath Thoŋ de Rɛ̈c, ku tɛ̈ɛ̈ukï awïkde ku athïïnke tëden ku rïurïu ke.

⁴ Ku Meremoth wën de Yuria, ku ee wën ë wën ë Ɣakoth acï biäkdäŋë yïk. Ku Meculam, wën de Berekia ku ee wën ë wën ë Mecedhabel acï biäkdäŋë yïk. Ku yïk Dhadok wën ë Baana biäkdäŋë.

⁵ Ku kɔc ke Tekowa yïkkï kal biäkdäŋë, ku bänyken acïk bɛ̈n jaai në luɔi cï kënë gäm keek në bäny.

⁶ Ku Joyada wën ë Pathia ku Meculam wën ë Bethodei acïk Thoŋ de Jecana nyɔk në yïk. Acïk awïkde ku athïïnke tääu tëden ku rïurïu ke.

⁷ Ku Melatia raan wun de Gibiɔn, ku Jadon raan wun de Meronoth ku kɔc ke Gibiɔn ku Midhpa acïk biäk däŋë yïk, abïk ɣeet ɣöndïït de bɛ̈ny mac wɛ̈ɛ̈r ë Yuparat biäk të lɔ aköl athɛ̈i.

⁸ Ku Yudhiɛl wën ë Ɣanania, raan adhɛ̈p thɔ̈ɔ̈th acï biäk däŋë yïk. Ku Ɣanania raan ee luui në aŋiëër, acï biäk däŋë yïk, acïk Jeruthalem nyɔk në yïk abïk ɣet në kal Biäk Lääuwic.

⁹ Ku Repaya wën ë Ɣur, bɛ̈ny mac biäk töŋ de Jeruthalem acï biäk däŋë yïk.

¹⁰ Ku yïk Jedaya wën ë Ɣarumap biäk däŋ de kal thiääk ke baaide. Ku yïk Ɣatuc wën de Ɣacabania biäk däŋë.

¹¹ Ku Malikija wën ë Ɣarim ku Ɣacup wën ë Paɣath Mowap acïk kal biäk däŋë yïk ëtök në Aloocdïït de nyum de kuïn cï pam.

¹² Ku Calum wën de Ɣaloɣec, bɛ̈ny de biäk töŋ de Jeruthalem acï kal biäk däŋë yïk. (Acï ë duetke kuɔny në luɔi ë yïk.)

¹³ Ku Ɣanun ku kɔc rɛ̈ɛ̈r wun cɔl Dhanowa acïk thoŋ de kal biäk të lɔ Wakic nyɔk në yïk, ku tɛ̈ɛ̈ukï athïïn ke tëden ku rïurïu ke, ku nyɔkkï kal në yïk në kë cït mitïïr bot kaŋuan ku thiërŋuan 440 ɣeetkï ë thoŋ lɔ Dhuurnɔm.

¹⁴ Ku yïk Malikija wën de Rekap, bɛ̈ny de Bethɣakerem Thoŋ lɔ Dhuurnɔm ku tɛ̈ɛ̈ukï athïïnke tëden, ku rïurïu ke.

¹⁵ Calum wën ë Koloɣodh, bɛ̈ny de Midhpa acï Thoŋ de Awaŋ nyɔk në yïk, ku tɛ̈ɛ̈u awïk de kal thok, ku tɛ̈ɛ̈u athïïnke tëden ku rïurïu ke. Acï kal biäkdäŋë yïk në awuöl ë Cela nɔm ɣëëtkï ë dom de Melik, ku ɣëëtkï në kueer ye kɔc bɛ̈n piny Pänydït de Debid.

¹⁶ Neɣemia wën de Adhibuk bɛ̈ny de biäk de wun cɔl Bethdhur acï kal biäk däŋë yïk ɣeetkï të lɔ raŋ de Debid kekë awuöl, ku ɣön ë jööt ke tɔŋ.

Kɔc ke Lebai cï Luui në Kal

¹⁷ Kɔc ke Lebai acïk ɣään juëc kɔ̈k de kal nyɔk në yïk, Reɣum wën ë Bani acï biäk däŋë nyɔk në yïk. Ɣacabia bɛ̈ny de biäk de Keila acï biäk däŋë yïk yetök në rin ke wunde.

¹⁸ Ku yïk Bawai wën de Ɣenadad, bɛ̈ny de Keila biäkdäŋë.

¹⁹ Ku yïk Edher wën de Jocua bɛ̈ny de Midhpa biäk däŋë ɣeet ɣön ye wëu ke tɔŋ tääu thïn ɣeet Aŋel të ye kal rɔ yal.

²⁰ Ku yïk Baruk wën de Dhabai biäk däŋë, gɔl në Aŋel të ye kal rɔ yal ɣeet në kueer ee lɔ baai de Eliacip bɛ̈nydïït ë kake Nhialic.

²¹ Ku Meremoth, wën de Yuria ku wën ë wën de Ɣakoth acïk biäk däŋë yïk, ɣeetkï në thök ë ɣön ë Eliacip.

Bäny ke kake Nhialic cï Luui në Kal

²² Bäny ke kake Nhialic acïk biäk de kal nyɔk në yïk: Bäny ke kake Nhialic rɛ̈ɛ̈r në Jeruthalem kɔ̈u ëbɛ̈n acï ke gäm biäk de kal agokï yïk.

²³ Ku gëmë Benjamin kekë Ɣacup biäk däŋ tɔ̈u në ɣöötken thook agokï yïk. Ku Adharia wën de Maathia ku wën ë wën ë Anania acïk biäk däŋë yïk, biäk de kal tɔ̈u ë ɣönde thok.

²⁴ Ku yïk Binui wën ë Ɣenadad kal biäk däŋë, tëëk në baai de Adharia gut Aŋel të ye kal rɔ yal.

²⁵ Ku Palal wën de Yudhai acï Aŋel biäk däŋë bɛ̈n yïk, gɔl në aguk nɔm ale guööt në aloocdïït de melik nu nhial thiääk ke ɣön ye kɔc mac thïn. Ku yïk Pedaya wën ë melik biäk däŋ nu të lɔ aköl amiäk, thiääk ke Thoŋ de Pïïu ku Alooc ye Luaŋdït tiit,

²⁶ ku kënë athiääk ke wut biäk cɔl Opɛl të lɔ aköl amiäk ye kɔc lui në Luaŋdït cieŋ ke thiäk kekë alooc bäär.

Kɔc kɔ̈k cï Yïk

²⁷ Go kɔc ke Tekowa kal biäk däŋë yïk, ku biäkdɛn däŋ ë rou atuööm nɔm kekë alooc bäär ye Luaŋdït tiit ɣeet në kal thiääk ke Opɛl.

²⁸ Ku yïk amatnɔm de bäny ke kake Nhialic biäk däŋë ɣeetkï të lɔ rut thiääk ke kal Thoŋ de Jöŋgöör, raan aaye kal yïk të thiääk ke baaide.

²⁹ Ku yïk Dhadok wën de Yimer biäk thiääk ke baaide. Ku yïk Cemaya wën de Cekania, tïn de Thoŋ të lɔ Aköl amiäk biäkdɛn däŋë.

³⁰ Ku Ɣanania wën de Celemia ku Ɣanun wën ee kek Dhetem de Dhalap, acï kal biäkdɛn de rou yïk. Ku yïk Meculam wën de Berekia kal biäk däŋë tɔ̈u në baaiden thok.

³¹ Ku yïk Malikija raan ee thäth adhɛ̈p kal biäk däŋë, ɣeet ɣön ë kɔc ke luɔi ë Luaŋdït, ku ɣön ë kɔc ee käŋ ɣɔɔc wën ee rɛ̈ɛ̈r Thoŋ ye tïït, thiääk ke ɣön nu nhial tɔ̈u në aguk de kal.

³² Ago Thɛ̈th ke adhɛ̈p ku kɔc ee ɣööc biäk däŋë bɛ̈n yïk, gɔlkï në aguk de kal ɣeetkï të thiääk ke Thoŋ de Amääl.