Neɣe 2 - JAM DE NHIALIC 2011

Neɣemia Alɔ Jeruthalem

¹ Na ɣɔn në kööl tök aacï pɛ̈i kaŋuan tëëk ke Melik Ateradath aa cäm, guɔ mɔ̈u lɛɛr tëde yen, ku yen akën a kɔn tïŋ ke ya dhiau piɔ̈u ë kööl tök.

² Na wën ke Melik thiëc ɛn an, “Eeŋö tɔ̈u yïn cït kë de kë cï riääk, ku yïn cïn guöp juäi? Aya tak, abï dɛk kë rem yïpiɔ̈u.” Guɔ piɔ̈u lɔ lïk në riɔ̈ɔ̈c,

³ ku bɛ̈ɛ̈r lɛ̈k en an, “Melik yïn bï pïïr athɛɛr! Eeŋö cän piɔ̈u duëër dhiau ku pänydïït wään cïï kuarkuɔ tɔ̈ɔ̈u thïn acï riääk, ku athïïnke acï ke nyop në mac?”

⁴ Go a thiëëc an, “Ku eeŋö duɛ̈ɛ̈rë kɔɔr?” Guɔ Nhialic de paannhial lɔ̈ŋ,

⁵ ku lɛ̈k Melik an, “Na duëër melik piɔ̈u miɛt ke yɛn, ku bïï lopdï puk nɔm, ke tɔ ya lɔ pänydït nu Juda, ɣɔn tɔ̈ɔ̈u ë kuarkuɔ thïn, ku bä lɔ nyɔk në yïk.”

⁶ Go Melik lɛ̈k ɛn ke tiiŋ melik rɛ̈ɛ̈r në yelɔ̈ɔ̈m an, “Ee nɛn bï yïn lɔ bɛ̈n ciëën?” Aguɔ lɛ̈k en, go jamdï gam ku tɔ ya lɔ.

⁷ Ku acä lɛ̈k en aya na bï miɛt ë yepiɔ̈u ke duëër awereek gäär bäny mac piny de wɛ̈ɛ̈r ë Yuparat të lɔ aköl athɛ̈i, bïï ke jääm ke ke bï yɛn päl tëëk, agut të bï yɛn ɣet apiɛth piny de Juda,

⁸ ku gɔ̈ɔ̈r awerek däŋ bï yiɛ̈n Athap raan ee roor de Melik tiit, ago a lɔ miɔɔc ë tiim bä ke lɔ looi ke ke ye këërkëër ke athïïn ke të wën ye Luaŋdït tiit thok, ku yïkë ke kal ë pänydït ku ɣön bï yɛn tɔ̈u thïn. Go Melik ya gäm ka cä thiëëc kedhie në luɔi nu athiɛɛi de Nhialic ke yɛn.

⁹ Melik acï ya tuöc bäny kɔ̈k ke rem de tɔŋ ku rem cath ë jöŋgöör kɔ̈ɔ̈th bïk cath në yɛn, aguɔ jäl cak ke ya lɔ piny tɔ̈u ë wɛ̈ɛ̈r ë Yuparat të lɔ aköl athɛ̈i. Ëtɛ̈ɛ̈n yɛn cï awereek ke melik bɛ̈n lɔ gäm bäny.

¹⁰ Ku na wën aa lɔ Thanbalat raan de Ɣoron ku bɛ̈ny Tobia raan de Ammon, ye piŋ luɔi de yen raan cï bɛ̈n bïï bɛ̈n luui, ke bï mïth ke Yithriɛl bɛ̈n bɛ tɔ piɛth, ke ke jɔ piɔ̈ɔ̈th riääk arëët.

¹¹ Ëtɛ̈ɛ̈n, aguɔ bɛ̈n Jeruthalem ku rɛ̈ɛ̈r ë nïn kadiäk.

¹² Na ɣɔnakɔ̈u ke ya jɔt rɔt wokë kɔc lik cath në yɛn, ku lɛ̈n töŋ ëtɔ̈u ke wook ee mul ëcath ɛn ë yekɔ̈u, ku cïn raan töŋ cä lɛ̈k kë cïï Nhialic tääu në yapiɔ̈u bä luöi Jeruthalem.

¹³ Yɛn cï lɔ biic, la tëëk në Thoŋ lɔ të lɔ Wakic, ku la të lɔ Nyin de Ŋuäl ke ya lɔ ë Thoŋ de Dhuurnɔm, ku ja kal cï dhuɔŋ piny caath, ku thookkɛn ɣɔn cï nyop në mac.

¹⁴ Ku bɛ kal kuany kɔ̈u ke ya lɔ Thoŋ de Awaŋ ku Awuöl de Melik, ku cïn të tëëk ë mul wën cath ɛn.

¹⁵ Aguɔ lɔ piny ë Wakic ke ya ciɛɛth kal ë pänydït, ku ee tɛ̈ɛ̈n yɛn cï a nɔm bɛ̈n puɔ̈k ciëën në Thoŋ biäk të lɔ Wakic bä wut.

¹⁶ Ku bäny ke luɔi akuckï të cïï yɛn lɔ thïn, ku kë cä lɔ looi në biäk kɛ̈n ɛn e lɛ̈k Judai kɔ̈k, ku bäny ke kake Nhialic, ku röördït ke baai, ayï bäny ke luɔi, ayï kɔc ke luɔi kedhie.

¹⁷ Ku në ee kakë cök, acä bɛ̈n lɛ̈k keek an, “Week wedhie awɔikï yen ë kërɛɛc nu wok thïnë, täu de Jeruthalem piny ke cï riääk, ku athïïn ke kal ë pänydït acï ke nyop në mac, bäk yïkku kal ë Jeruthalem, ke wo cïï ayäär bï bɛ guum.”

¹⁸ Ku lɛ̈k keek luɔi tɔ̈u ë athiɛɛi de Nhialicdï ke yɛn ku guiëër keek ka cïï melik ke lɛ̈k ɛn aya. Ku acïk jamdï bɛ̈n gam, ku lueelkï an, “Gɔlku yïk!” Gokï röt coc buk luɔi gɔl.

¹⁹ Ku na wën aa cï Thanbalat ku Tobia raan de Ammon, ku raan de Arab cɔl Gecem kë kɔɔrku buk looi piŋ, agokï wo dɔl gup luelkï an, “Ee känŋö yak tak kë kaarkï bäk looi? Kaarkï bäk melik rɛɛc thok?”

²⁰ Guɔ bɛ̈ɛ̈r an, “Nhialic de paannhial Yen abï wo gäm tiëm, wok ee lïïmke, ka wok bï yïk lɔ gɔl. Ku wek cïn nïïm yic në kake Jeruthalemiic, ku cïn kë bäk rɔm në kake ciɛɛŋde yic.”