Neɣe 12 - JAM DE NHIALIC 2011

Rin ke Bäny ke kake Nhialic ku Kɔc ke Lebai

¹ Kakë ee rin ke bäny ke kake Nhialic ku kɔc ke Lebai ɣɔn bɔ̈ ciëën në pɛ̈cic në Dherubabel, wën de Caltiɛl ku bïkkï në Jocua bɛ̈nydïït ë kake Nhialic, ku bäny ke kake Nhialic:

Bäny

^2-7 Bäny ke kake Nhialic: Theraya, ku Jeremia, ku Edhera, Amaria, ku Maluc Ɣatuc, Cekania, ku Reɣum, ku Meremoth, Yido, ku Ginethoi, ku Abija, Mijamin, ku Maadia, ku Bilga, Cemaya, ku Joyarip, ku Jedaya, Thalu, ku Amok, ku Ɣilikia, ku Jedaya. Kɔckë ee kek aye bäny, ë tɔ̈u në bäny ke kake Nhialic ë bɛ̈n nïïm, në akööl ke Jocua.

Lebai:

⁸ Ku kɔc ke Lebai: Kɔckë kek aaye bäny ke kɔc ee diɛt ke thieithieei kiit: Jecua, ku Binui, ku Kadmiel, ku Cerebia, ku Juda ku Matania.

⁹ Kɔckë ayek kɔc ee diɛt gam: Bakbukia, ku Yuno, ku kɔckɛn ke Lebai.

Käu de Jocua Bɛ̈ny Tueŋ de kake Nhialic

¹⁰ Jocua: yen ee wun Joyakim, ku ye Joyakim wun Eliacip, ku ye Eliacip wun Joyada.

¹¹ Ku ye Joyada wun Jɔnathan, ku ye Jɔnathan wun Jadua.

Bäny Tɔ̈u në dhiëën ke Bäny ke kake Nhialic Nïïm

^12-21 Ɣɔn ee Joyakim bɛ̈nydïït ë kake Nhialic, kɔckë aake ye bäny nu në dhiëën ke bäny ke kake Nhialic nïïm: Bɛ̈ny de kake Nhialic Dhiën Meraya Theraya Ɣanania Jeremia Meculam Edhera Jeɣoɣanan Amaria Jɔnathan Maluki Jothep Cebania Adena Ɣarim Ɣelkai Merayoth Dhekaria Yido Meculam Ginethon Dhikiri Abija Rin aliukï në Ɣeberuu Miniamin Piltai Mowadia Camua Bilga Jeɣonathan Cemaya Matenai Joyarip Yudhi Jedaya Kalai Thalai Eber Amok Ɣacabia Ɣilikia Nethaniɛl Jedaya

Bɛ̈ny de kake Nhialic Dhiën Rin ke Bäny ke kake Nhialic ku Dhiëën ke Lebai

²² Rin aake cï gɔ̈ɔ̈r rin ke bäny mac ɣööt ke Lebai thook ku ɣööt ke bäny ke kake Nhialic në akööl ɣɔn pïïrë bäny tueŋ ke kake Nhialic kë: Eliacip, Joyada, Jɔnathan, ku Jadua. Rin cï gɔ̈ɔ̈rkë aake thöl ë gäär ɣɔn ye Dariouth Melik në Perthia.

²³ Rin ke bäny mac ɣööt ke Lebai thook, aake cï gɔ̈ɔ̈r në Awerek de Gäär ë ka ke luɔi aköölnyïïn, agut cï akööl ke Jɔnathan, wën ë wën ë Eliacip.

Tëŋ de Luɔi de Luaŋdït

²⁴ Rin ke bäny mac ɣööt ke Lebai thook ee yï: Ɣacabia, Cerebia, Jecua, Binui, ku Kadmiel, ku kɔc ke Lebai acïk röt guiir në akuut kaarou: kakë ayek kɔ̈ɔ̈c në ke lɔ̈m ke ke kiit diɛt ke alɛɛc ku piɔ̈ny, ku jɔ kɔ̈kkë ke aa gam rɔ̈t cït kë cï wɛ̈ɛ̈t ë melik Debid, raan de Nhialic.

²⁵ Rinkë ee rin ke kɔc ee Luaŋdït tiit thok ku ayek ɣööt ye käŋ tɔ̈ɔ̈u thïn tiit ɣööt nu në thöŋ lɔ Luaŋdït. Matania, ku Bakbukia, ku Obadaya, ku Meculam, ku Talmon ku Akub.

²⁶ Kɔckë aake tɔ̈u në thaar ɣɔn nu Joyakim, wën ë Jocua ku ee wën ë wën ë Jeɣodhadak, ku në akööl ɣɔn ye Neɣemia bɛ̈ny de wuöt ku ye Edhera bɛ̈ny de kake Nhialic, ku ye lööŋ wɛ̈ɛ̈t.

Neɣemia Agëm Nhialic Kal ë Pänydït

²⁷ Ɣɔn gëmë Nhialic kal ë pänydït de Jeruthalem cï piac looi, kɔc ke Lebai aake cï bɛ̈n lɔ bɛ̈ɛ̈i ɣäänkɛn rëër kek thïn, në biäk bïï kek röt bɛ̈n mat ë dhuëëŋ dïït de kal gëmë Nhialic bï thieei agokï kake miɛtëpiɔ̈u looi në kiët kiit kek diɛt ke piɔ̈ny ku lec leecë Nhialic nɔm në lɔ̈r ku thom ku kɛŋ.

²⁸ Dhiën ke kɔc ke Lebai ee ket acï keyiic määt në tëdɛn rëër kek thïn ë Jeruthalem kɔ̈u, ku në bɛ̈i rëër kek ë Netopa kɔ̈u,

²⁹ ku në Bethgilgal, ku gɔl piny de Geba ku Adhimabeth, go kɔc ee ket röt yiɛ̈k bɛ̈i ë Jeruthalem kɔ̈u.

³⁰ Go bäny ke kake Nhialic ku Lebai ke gup tɔ ɣer ku tɔkï kɔc ke Yithriɛl ɣer gup, ku jɔkï thook ke kal, ku lɔ kal ë pänydït de Jeruthalem tɔ ɣeric.

³¹ Yɛn cï bäny ke Juda lɛɛr në kal ë pänydït nɔm, ku tääu kuut dïït ee yic rou de kɔc ke diɛt në ke cin bïk cath ë kal nɔm ke ke wil wut ke ke lec Nhialic. Go kuut tueŋ rɔt cɔ̈k të lɔ biäk cuëny de kal Thoŋ de Dhuurnɔm.

³² Go Ɣocaya lööny në kɔc kɛ̈t cök ku kuany kecök në biäk töŋ de bäny ke Juda.

³³ Bäny ke kake Nhialic kë: aciɛthkï ke ke koth kɛŋ ke ke biɔth Adharia, ku Edhera, ku Meculam.

³⁴ Ku Juda, ku Benjamin, ku Cemaya, ku Jeremia wën ë wën ë Cemaya.

³⁵ Kɔc raan ë keek aake nu yï: Dhekaria wën de Jɔnathan, wën de Cemaya, wën de Matania, wën de Mikaya, wën de Dhakur, wën de Athap.

³⁶ Ku kuany cök ë kɔc kɔ̈k ke dhiënden yï: Cemaya, ku Adharel, ku Milalai, ku Gilalai, ku Maai, ku Nethaniɛl, ku Juda, ku Ɣanani, ku lɔ kɔc kedhie ë cath ë thoom gutkï cït ka ɣɔn ee Melik Debid gut, raan de Nhialic. Ku wat keek në Edhera raan ee löŋ wɛ̈ɛ̈t.

³⁷ Na wën aa cïk ɣet në Thoŋ de Awaŋ, gokï cɔ̈k nhial, në kueer lɔ Pänydït de Debid, tëkkï baai dïït de Debid ku pukkï röt kal thiääk ke Thöŋ de Pïïu në biäk de aköl amiäk de pänydït.

³⁸ Ku kuut däŋ de kɔc lec Nhialic acïk lɔ në biäk ciɛɛm ke ke cath ë kal ë pänydït nɔm, ku ja kuany cök wokë biäk de kɔc. Jɔku cath tëkku në Alooc bäär de Nyup, të lɔ kal de Kuïn cï Pam,

³⁹ ku ëtɛ̈ɛ̈n ke wo jɔ lɔ tëëk në Thoŋ de Eparaim, yen ee Thoŋ de Jecana, ku Thoŋ Thɛɛr, ku Thoŋ de Rɛ̈c ku Alooc bäär de Ɣananel ku Alooc bäär de Bɔt të lɔ Thoŋ de Amɛ̈l. Go cäthda jɔ thök të thiääk ke Thoŋ lɔ të lɔ Luaŋdït.

⁴⁰ Ka kuut ee yiic rou, lec Nhialic nɔm acïk ɣet ë pëër ɣön ë Nhialic. Ku lɔ bäny ɣɔn cath ë yɛn aya,

⁴¹ kuutdï aade yic bäny ke kake Nhialic koth kɛŋ, yï Eliakim, ku Maathia, ku Miniamin, ku Mikaya, ku Eliyonai, ku Dhekaria ku Ɣanania.

⁴² Ku aake kuɛny cök ë yï: Maathia, ku Cemaya, ku Eleyadhar, ku Yudhi, ku Jeɣoɣanan, ku Malikija, ku Eelam, ku Edher. Raan wat kɔc ee diɛt ket, ee Jedheraya, aake kët ke ke tɔ̈u rɔ̈t nhial.

⁴³ Në ee köölë miɔ̈c juëc acï ke bɛ̈n gam, ku kɔc acïk piɔ̈ɔ̈th bɛ̈n miɛt aläl në biäk cïï Nhialic keek tɔ mit piɔ̈ɔ̈th. Diäär ku mïth aake cï röt mat thïn në dhuëëŋic ku awuɔɔuden aaye piŋ të mec ku të dïït lääuwic.

Kake Lɔ̈ŋ ye Gam në Luaŋdïtic

⁴⁴ Ɣɔn ee thaarë kɔc aake cï gäm muŋ de luɔi de ɣööt ye käŋ tɔ̈ɔ̈u ka ye juɛ̈ɛ̈r Luaŋdït, në töŋ ë thiëër, ku rɛɛp cï kɔn luɔk ku kake ee luɔk në ruöön thok ëbɛ̈n. Kɔckë acï ke gäm riɛl bï kek käŋ aa tɔ kut në duum thiääk në wuöt, ka ye juɛ̈ɛ̈r bäny ke kake Nhialic ku kɔc ke Lebai cït kë kɔɔrë löŋ. Kɔc ke Juda kedhie aake cï piɔ̈ɔ̈th miɛt në bäny ke kake Nhialic ku kɔc ke Lebai,

⁴⁵ në biäk cïï kek guiɛɛk ye kɔc tɔ piɛth gup looi ku lɔ guiɛɛk kɔ̈k cïï Nhialic kɔc yɔ̈ɔ̈k bï ke looi. Ku kɔc ee diɛt ket Luaŋdït, ku kɔc ee Luaŋdït tiit thok ayek luɔiden looi cït kë cïï Debid kɔc wɛ̈ɛ̈t kekë wëndɛn Tholomon.

⁴⁶ Në thaar ɣɔn tɔ̈u ë Debid kekë Athap, kɔc ke diɛt aake ye lɔ̈ŋ wat në diɛt ke thieithieei leec kek Nhialic kiit.

⁴⁷ Kɔc ke Yithriɛl kedhie në akööl ke Dherubabel kekë Neɣemia aake ye miɔ̈c de miɛtëpiɔ̈u aköölnyïïn gäm kɔc ee ket, ku kɔc ee Luaŋdït tiit thok, ku kɔc aake ye kɔc ke Lebai gäm miɔ̈c ɣeric ku be kɔc ke Lebai biäk ke bäny de kake Nhialic kɔɔr rɔt gäm keek.