Neɣe 10 - JAM DE NHIALIC 2011

¹ Raan tueŋ ë yen ë kɔn thɛ̈ɛ̈ny ee bɛ̈ny de baai, Neɣemia wën de Ɣakalia, ku jɔ Dhedekia thɔ̈ɔ̈ny. Ku kɔc bɔ̈yë acïk thɔ̈ɔ̈ny aya:

Bäny:

^2-8 Bäny ke kake Nhialic Theraya, ku Adharia, ku Jeremia, Pacur, ku Amaria, ku Malikija, Ɣatuc, ku Cebania, ku Maluc, Ɣarim, ku Meremoth, ku Obadaya, Danyel, ku Ginethon, ku Baruk, Meculam, ku Abija, ku Mijamin, Maadhia, ku Bilgai, ku Cemaya, kɔckë kedhie aake ye bäny ke ka ke Nhialic

Lebai:

^9-13 Kɔc ke Lebai Jecua wën de Adhania, Binui wën dhiën de Ɣenadad, Kadmiel, ku Cebania, ku Ɣodia, Kelita, ku Pelaya, ku Ɣanan, Maika, ku Reɣop, ku Ɣacabia, Dhakur, ku Cerebia, ku Cebania, Ɣodia, Bani ku Beninu.

Bäny

^14-27 Bäny nu ë kɔc nïïm: Paroc, ku Paɣath Mowap, Eelam, ku Dhatu, ku Bani, Buni, ku Adhagat, ku Bebai, Adonija, ku Bikbai, ku Adin, Ater, ku Ɣedhekia, ku Adhur, Ɣodia, ku Ɣacum, ku Bedhai, Ɣarip, ku Anathoth, ku Nebai, Magpiac, ku Meculam, ku Ɣedhir, Mecedhabel, ku Dhadok, ku Jadua, Pelatia, ku Ɣanan, ku Anaya, Ɣocia, ku Ɣanania, ku Ɣacup, Ɣaloɣec, ku Piliɣa, ku Cobek, Reɣum, ku Ɣacabana, ku Maathia Aɣia, ku Ɣanan, ku Anan, Maluc, ku Ɣarim, ku Baana.

Mät

²⁸ Wok kɔc ke Yithriɛl, bäny ke kake Nhialic ku kɔc ke Lebai, ku kɔc ee thook ke Luaŋdït tiit, ku kɔc ke diɛt në Luaŋdïtic, ku kɔc ke luɔi në Luaŋdïtic, ku kɔc kedhie kɔc ee lööŋ ke Nhialic riëëu, wok cï röt wɛ̈l bei në juööriic, juöör rɛ̈ɛ̈r pinyda, wook wodhie në diäärkuɔ, ku mïthkuɔ kedhie, wok cï dït, ka wok ee käŋ yökiic,

²⁹ wok bï mat në bänykuɔ ku luelku gutguut an buk gup dɛk aciɛɛn të le wok e dhɔ̈ŋic. An buk tɔ̈u në löŋ de Nhialicic, löŋ ɣɔn cïï Bɛ̈nydït gäm wook në kueer ë lïmde Mothe an, buk lööŋkɛn cïï lueel ëbɛ̈n döt ku ka kɔɔr röt ëbɛ̈n.

³⁰ Wok cïï röt bï thiaak në juöör rɛ̈ɛ̈r pinyda.

³¹ Të le kɔc ke juöör agamɔ bɛ̈ɛ̈i bï ke bɛ̈n ɣaac, në köölë ë Thabath ku nɔn ee kakɛn kɔ̈k kek bïk ɣaac në kööl tueŋ de akööl ɣeriic, ke yen acuku keek bï aa ɣɔɔc tëde keek. Të cïï run kadhorou tëëk wok cïï piny bï aa puur, ku wok bï käny ke kɔc aa pɔ̈l.

³² Në ruöön thok ëbɛ̈n wok bï wëu aa juaar, raan ëbɛ̈n abï kuën cït wëu kadhïc aa yök në ateek, bïï ke kake Luaŋdït aa cuat piny ka kɔɔr kuɔɔny.

³³ Wok bï kake läm kɔɔr ka cït: kuïn cï pam ye gäm Bɛ̈nydït ku miɔ̈c ë rap, ku miɔ̈c ye nyop ëbɛ̈n aköölnyïïn, ku miɔ̈c ɣeric de kööl ë thabath, ku miɔ̈c de dhuëëŋ ë pɛɛi piac wil, ku dhuëŋ kɔ̈k ku miɔ̈c kɔ̈k ɣeriic, ku miɔ̈c de päl awɛ̈ɛ̈c bïï ë kɔc ke Yithriɛl teem gup, ku këriëëc kɔɔr rɔt ɣön ë Nhialicic ëbɛ̈n,

³⁴ Wook, ku kɔc, ku bäny ke kake Nhialic, ku kɔc ke Lebai wok bï gɛk aa dɛɛny në ruöön thok ëbɛ̈n, buk aa ŋic, ee dhiën nou bï tiim lɔ kuany, tiim bï dɛ̈p në yïïŋ de Bɛ̈nydït, Nhialicda nɔm, cït kë kɔɔr ë löŋ.

³⁵ Wok bï miɔ̈c tueŋ de ka cï kɔn luɔk aa lɛɛr Luaŋdït, në ruöön thok ëbɛ̈n, cït man ë rɛɛp cï kɔn luɔk cuk tem, ku mïth ke tiimkuɔn yok com cï luɔk.

³⁶ Wook wodhie ŋɛk abï mɛnh moc ee kɛ̈i aa lɛɛr Luaŋdït, tëde bɛ̈ny de kake Nhialic, bï gäm Nhialic cït man ë kë kɔɔr ë löŋ. Wok bï kɛ̈i ke daaukuɔn cï dhiëth aa lɛɛr në ruöön thök ëbɛ̈n në Luaŋdïtic ke ke ye miɔ̈c de Nhialic, ku amithöök ke amɛ̈l ee kɛ̈i ayï thök bɔɔth.

³⁷ Wok bï mɔ̈n de rɛɛp ë piac luɔk yiɛ̈n bɛ̈ny de kake Nhialic ë Luaŋdïtic në ruöön thok ëbɛ̈n, ayï kakuɔn ke miɔ̈cdan de mɔ̈u, ku miök de olip, ku këriëëc ë lok ë mïth ke tiim ëbɛ̈n. Ku yïnku kɔc ke Lebai ee ajuëër kut në wuötkuɔn ke pɔ̈ɔ̈riic, töŋ ë thiëër, ku këriëëc ee luɔk në duumkuɔ yiic.

³⁸ Bäny ke kake Nhialic de käu Aron, abïk lɔ tɔ̈u ë kɔc ke Lebai, të mɛ̈ɛ̈të töŋ ë thiëër yiic, ku në biäk de ka ke luɔi në Luaŋdïtic, ke kɔc ke Lebai abïk töŋ ë thiëër cïk määtiic lɛɛr në Luaŋdïtic, ku kut kenïïm ɣön ye käŋ tɔ̈ɔ̈u thïn.

³⁹ Kɔc ke Yithriɛl ku kɔc ke Lebai abïk ajuëër ë mɔ̈u, ku miök de olip, ayï rap dhɛ̈ɛ̈th ɣön wën ye kake tëɣeric tɔ̈ɔ̈u thïn, ku thönë ke bäny ke kake Nhialic de nïïm luɔi ee köölë, ayï kɔc ee tïït, ku kɔc ke diɛt. Në biäk cïï wok e than piny nɔn cïï wok ɣön ë Nhialicda bï päl wei.