Neɣe 1 - JAM DE NHIALIC 2011

¹ Kënë aluel ka cïï Neɣemia wën de Ɣakalia ke looi. Ɣɔn në pɛɛi cɔl Kithlep (yen ee Akɔ̈nydït në thoŋda), në ruöön de thiërrou ye Ateradath Melik de Perthia, yɛn Neɣemia yɛn aa tɔ̈u ë Thutha tëde riɛl.

Diɛɛr de Neɣemia në biäk de Jeruthalem

² Go Ɣanani raan töŋ de wɛ̈ɛ̈tamäthkï bɛ̈n ë Juda kekë kɔc kɔ̈k, guɔ ke thiëëc në biäk de Judai ɣɔn cï döŋ apïr ɣɔn kënë peec, ku täu de pänydït de Jeruthalem.

³ Acïk bɛ̈n lɛ̈k ɛn an, kɔc wään cï döŋ apïr ɣɔn kënë peec, atɔ̈ukï në guöm dïtic, ku ye juöör rɛ̈ɛ̈r në kelɔ̈m ke dhɔɔt gup, ku kal ë pänydïït de Jeruthalem aŋoot ke tɔ̈u piny, ke cï riääk ku athïïn ke yen thok akënë ke tääu ëcaŋɣɔn nyopë keek.

⁴ Na wën aa la ee kakë piŋ, guɔ nyuc piny ku dhiaau. Ja nïn lɛɛr ke ya dhiau ku rɛɛc cäm ke ya läŋ Nhialic de paannhial, luɛɛl an,

⁵ “Bɛ̈nydït Nhialic de paannhial! Yïn dït, ku Yïn Awärjäŋ, Yïn raan ee löŋduön cï mac döt kekë nhiëërduön agɔk wekë kɔc nhiaar Yïn, ku loikï lööŋkuön cï than piny.

⁶ Ku ënɔɔnë ye a tïŋ Bɛ̈nydït, ku piŋ lɔ̈ŋdiën yan lɔ̈ŋ aköl ku wäkɔ̈u në biäk de lïïmku, kɔc ke Yithriɛl, yɛn gam awɛ̈ɛ̈c cuk looi wok kɔc ke Yithriɛl, kuarkuɔ ku yɛn wok cï wäc.

⁷ Yïn cuk luöi kërac arëët, ku kënku kë cï lɛ̈k wook looi, ku wok kën lööŋku döt, lööŋ ɣɔn gamë wook në kueer ë Mothe lïmdu.

⁸ Ku ënɔɔnë, tak Yïnɔm në kë wään lɛ̈kë Mothe an, ‘Na cakkï bï aa kɔc adöt në Yɛn, ke wek bä thiäi në juöör kɔ̈kiic,

⁹ ku na dɔ̈kkï röt Ɛn, ku luɔikï lööŋ cä lɛ̈k week, të ciɛk ë we thiäi të lee piny thar guut, ke wek bä bɛ bɛ̈ɛ̈i të wään cä lɔc bä wek Ɛn aa lɔ̈ŋ thïn.’

¹⁰ “Bɛ̈nydït kakë ayek lïïmku, kɔc ke nɔmdu, ɣɔn luäk në riɛldïïtdu.

¹¹ Ku ënɔɔnë piŋ lɔ̈ŋdï ku lɔ̈ŋ de lïïmkuön kɔɔr bïk Yïn riëëu. Tɔ ya tiëm ee köölë ku bï Melik piɔ̈u kok ke yɛn.” Në aa köölkë ee yɛn aaye raan ee ka ye melik dek kɔn thiëëp nïïm.