Naɣum 2 - JAM DE NHIALIC 2011

Wïïk de Ninebe

¹ Yïn mookë piny Ninebe. Gël ɣäänkuön ril ke tɔŋ apiɛth. Tiɛtkï kuɛɛriic ëgɔk! Määtkï tɔŋdun yic ëbɛ̈n! Ke ke bï röt coc!

² (Ku Bɛ̈nydït abï dhuëëŋ de kɔc ke Juda pɔ̈k nɔm keek, cït man ë dhuëëŋ de kɔc ke Yithriɛl aya. Në luɔi cïï kɔc ke aterden ke rum, cït man ye apäm puɔ̈ɔ̈t bei në tim guöp.)

³ Kööt ke rem de tɔŋ de kɔc ke aterdu yïn Ninebe acï ke giɛt në kathith, ku jöötkɛn ke tɔŋ acïk röt piɔ̈th në lupɔɔ thith. Ku abëëlkɛn ke tɔŋ, të le ke kiëët! Ayek ariauriau cït man ë mac! Ku tɔɔŋ nyeŋger ke thɔ̈ɔ̈r amet keyiic.

⁴ Abëël ke tɔŋ ayek miööt në kuɛɛriic, ayek lɔ tueŋ ku lek ciëën ë për ke pänydït yiic, ayek riau cït kuthyuui, ayek lɔ bërët cït wil ë deŋ.

⁵ Ku bäny ke Ninebe aye ke kuaath tɔŋ, ku ayek kɔ̈th të le kek tɔŋ. Kɔc bïï tɔŋ acïk ɣëët ke ke bɛ̈k kal ë wut, ku loikï gëlgël ril.

⁶ Ku athïïn ke kiir acï ke yal thook wut, ku jɔ kɔc tɔ̈u ɣön ë bɛ̈ny lath.

⁷ Tiiŋ melik acï yɔ̈ɔ̈r ka cï jɔt ke duööt, ka duet lïïmke akïmkï cït guuk, ku yek kepiɔ̈ɔ̈th biɔ̈ɔ̈k, në jiɛthëpiɔ̈u.

⁸ Ninebe ee ciët awuöl cïï pïïuke wɛt wei, ka bänyke ayek cööt an, “Kääckï! Kääckï!” Ku acïn raan bɔ̈ ciëën.

⁹ Go kɔc ke ater röt aa lɛ̈k an, “Pɛckï atek ku adhɛ̈p! Pänydït athiäŋ yic ke kajuëc tuc ë ɣööcden cïk kuɛ̈t röt, acie ka bï thök!

¹⁰ Acïn kë cï döŋ Ninebe, acï ya jɔ̈ɔ̈r cïï cieŋ! Ku riɔ̈ɔ̈c alɛth kɔc gup ëbɛ̈n. Acïn riɛl be nu, acïk nyïïn lɔ lɔ̈ɔ̈lɔ̈ɔ̈r në riɔ̈ɔ̈c.

¹¹ Ka pänydït cï lɔ ënou ënɔɔnë Wun wään cït duŋ de kɔ̈ɔ̈r yen mïthke cääm thïn, ku cath mïthke ke cïn kë riëëc keek.

¹² Ku ee mïthke näk cït kë kɔɔr, ku ee läi dhuöŋ yiëth ŋunde kekë mïthke, ku jɔ duŋden yic thiäŋ ke rïŋ.

¹³ Alueel ë Bɛ̈nydït de rɛm, an, “Tiëŋkï, Yɛn ee nɔm week. Abëëlkuön ke tɔŋ abä keek ɣɔ̈k mac, ku remduön ë tɔŋ abï keek nɔ̈k tɔŋ, ku acïn kë bä buɔ̈th week në ka wään ruömkï, ku kɔckuön wään yak tooc an bïk athölbɔ̈ bɛ̈n aa kut acïï ke bï bɛ piŋ röt.