Math 9 - JAM DE NHIALIC 2011

Yecu Atɔ Raan cï Du

¹ Na wën, ke lɔ ë abëlic, go wɛ̈ɛ̈r teem, ku jɔ bɛ̈n pänydɛndït guöp.

² Na wën, ke ke bïï raan të nu yen, raan cï duany, adhɔt piny ë agen nɔm, go Yecu gämden tïŋ, ku yöök raan cï duany an, “Pälë yïpiɔ̈u piny, mɛnhdï, karɛcku acï ke päl yïn.”

³ Na wën, ke kɔc töktöök ë kɔc ë löŋ gɔ̈ɔ̈r yiic, ke luelkï ë keyäc an, “Raanë alat Nhialic!”

⁴ Go Yecu ka luekï ë kepiɔ̈ɔ̈th guɔ ŋic, ago lueel an, “Eeŋö tak wek kërac ë wepiɔ̈ɔ̈th?”

⁵ Ee kënou piɔl ë keek, të luɛɛl ɛn en, an, Karɛcku acï ke päl yïn, ku të luɛɛl ɛn en, an, Jɔt rɔt, cathë?

⁶ Ku nɔɔnë, luɔi bä wek e ŋic nɔn ciɛthë Wën ë Raan ke riɛl ë piny nɔm riɛl bï en karɛc pɔ̈l, ago raan cï duany yɔ̈ɔ̈k an, “Jɔt rɔt, jɔt agendu, lɔ baaidu.”

⁷ Go rɔt jɔt, ku jël le ɣönde.

⁸ Na wën, acï kuut ke kɔc e tïŋ, ke ke gäi, ku leckï Nhialic, Raan cï riɛl cït ee kënë gam kɔc.

Yecu Acɔl Mathayo

⁹ Na wën, acï Yecu jäl ëtɛ̈ɛ̈n, ke tïŋ raan cɔl Mathayo, arɛ̈ɛ̈r ë maktap de athölbö yic, ago Yecu yɔ̈ɔ̈k an, “Kuany a cök.” Go rɔt jɔt, ku kuɛny cök.

¹⁰ Na wën, të rëërë Yecu ɣööt ke cäm, ke kɔc ë athölbö tɔ kut ë ke jɔ bɛ̈n, ku kɔc ë kërac looi, bïk ku nyuckï piny në yen ëtök, yen kekë kɔckɛn ë piööcë.

¹¹ Na wën, acï Parithai e tïŋ, ke ke thiëc kɔckɛn ë piööcë, an, “Eeŋö ciëmë Bɛ̈nyduön ë wëët kekë kɔc ë athölbö tɔ kut ku kɔc rac?”

¹² Na wën, acï Yecu e piŋ, ke ke yöök an, “Kɔc piɔl gup acïkï akïïm ee kɔɔr, ee kɔc tök gup tei.

¹³ Lakï tei, kaarkï cöökë thar abäk yök, Yɛn kɔɔr kokdepiɔ̈u, acie kë bïï nɔ̈k en kaar, yɛn ë cïï bɔ̈ bä kɔc piɛth piɔ̈ɔ̈th bɛ̈n cɔɔl, bïk kepiɔ̈ɔ̈th puk, ee kɔc ë kërac looi kek aa bä bɛ̈n cɔɔl.”

Thiëc në Biäk de Reec de Këcam

¹⁴ Na wën, ke kɔcpiööcë Jɔn ke ke bɔ̈ të nu yen, bïk ku luelkï an, “Eeŋö ye wok cool ë reec cäm, wok wokë Parithai, ku kɔckuön ë piööcë acïkï cäm ee rɛɛc?”

¹⁵ Go Yecu ke yɔ̈ɔ̈k an, “Duëër wɛ̈ɛ̈t riëëc ë monythiëk aa dhiau, të ŋootë monythiëk ke tɔ̈u ke keek? Akööl abïk bɛ̈n, akööl bï monythiëk jɔt ë keyiic, yen abï kek cäm rɛɛc.

¹⁶ “Acïn raan ee lupɔ cï piac ɣɔɔc kaac ë lupɔ thɛɛr kɔ̈u, na loi yen aya, kë cï piac ɣɔɔc abï lupɔ thɛɛr tɔ rɛɛt, ago të cï rɛɛt go dït awär man wään.

¹⁷ Ayï mɔ̈n cï piac dhiim acie tääu ë athep thɛɛr yiic, na loi yen aya, ke atheep abïk yiic rɛɛt, ago mɔ̈u lɔ wei, ku riääk atheep, mɔ̈u cï piac dhiim aye tääu ë atheep cï piac looi yiic, agokï tɔ̈u apiɛth kedhie.”

Nyan de Bɛ̈ny de Alathkëër ku Tiiŋ Wään Jak Lupɔ de Yecu

¹⁸ Na wën, aguïïr keek ee kakë, ke bɛ̈ny tök bɔ̈, ku gut enɔm piny ë yenɔm, ku lueel an, “Nyandï acï thou ënɔnthiin wënë, ku bä tei, thanyë yïcin ë yeguöp, ku abï bɛ ɣɔ̈ɔ̈r.

¹⁹ Go Yecu rɔt jɔt, ku kuɛny cök, ayï kɔckɛn ëpiööcë aya.

²⁰ Na wën, ke tik bɔ̈, tiiŋ ë riɛm cool ee kuëër ë yeguöp ë run kathiëër ku rou, go bɛ̈n ë yekɔ̈u ciëën, bï ku jiɛk lupɔde thok,

²¹ aye lueel ë yepiɔ̈u an, “Të jak ɛn lupɔde tei, ke yɛn bï dem.”

²² Go Yecu rɔt puk, na wën, aacï e tïŋ, ke lueel an, “Rom yïpiɔ̈u, nyanë, gämdu acï yï tɔ piɔl.” Go tiiŋë dem ë thaar manë guöp.

²³ Na wën, acï Yecu bɛ̈n ɣön ë bɛ̈ny awën, ke tïŋ kɔc ë kɛŋ kooth ku kut ë kɔc awou,

²⁴ go ke yɔ̈ɔ̈k an, “Nyaikï, nyanthiinë akën thou, anin tei.” Agokï dɔl guöp.

²⁵ Na wën, aacï kut ë kɔc ciɛɛc biic, ke lɔ ɣöt, le ku dɔm ciin, go nyanthiinë rɔt jɔt.

²⁶ Go jamë tɛɛi ë pinyë nɔm ëbɛ̈n.

Yecu Atɔ Cöör Kaarou Waar

²⁷ Na wën, acï Yecu jäl ëtɛ̈ɛ̈n, ke cöör kaarou ke ke biɔth ecök, ke ke cöt, luelkï an, “Wën ë Debid, tɔ yïpiɔ̈u kok wekë wook.”

²⁸ Na wën, acï bɛ̈n ɣöt, ke cöör ë ke bɔ̈ të nu yen, go Yecu ke thiëëc an, “Gamkï nɔn duɛ̈ɛ̈r ɛn ee kënë lëu ë luɔi?” Gokï lueel an, “Ɣɛɛ, Bɛ̈nydït.”

²⁹ Go ke jak nyïïn, ku lueel an, “Acït man ë gämduön cä wek gam, ë tɔ̈u tëde week.”

³⁰ Go ke liep nyïïn. Na wën, ke ke lom Yecu thook arëët an, “Duökï lëk raan däŋ mäthdhiëën.”

³¹ Ku keek, të cï kek jäl, ke ke tɔ rinke tɛɛi ë pinyë nɔm ëbɛ̈n.

Yecu Atɔ Raan cïï Jam Lëu Waar

³² Na wën, ajëlkï, ke ke bïï raan të nu yen raan cïn ethok tën ee jam, ku ade guöp jɔŋ rac.

³³ Ku të cï jɔŋ rac ciëëc bei ë yeguöp, ke jam en raan wën cïn ethok tën ee jam: go kuut ke kɔc gäi, luelkï an, “Akënë kɔn tïŋ en kë cït ee kënë paan ë Yithriɛl.”

³⁴ Acï Parithai lueel tei an, “Aye jɔɔk rac ciëëc bei në riɛl ë bɛ̈nydït ë jɔɔk rac.”

Yecu Akok Piɔ̈u kekë Kɔc

³⁵ Go Yecu pɛ̈ɛ̈nydït lɔ caath yiic kedhie ayï bɛ̈i kedhie, aye kɔc wɛ̈ɛ̈t ë ɣöötkɛn ke Nhialic yiic, ku ye wëlpiɛth ke ciɛɛŋ guiir, ku ye juäi tɔ dem ë kɔc yiic ëbɛ̈n, ayï jɔɔk nu ë kɔc gup ëbɛ̈n.

³⁶ Na wën, acï kuut ke kɔc tïŋ, ke jɔ piɔ̈u kok kekë keek, luɔi cï kek dak, ku luɔi cï kek thiäi cït man ë thök cïn raan ee ke tiit.

³⁷ Go kɔckɛn ëpiööcë yɔ̈ɔ̈k an, “Rɛɛp cï luɔk ajuëckï, ku kɔc ë luui alikï.

³⁸ Yen läŋ wek Bɛ̈nydït ë rɛɛp cï luɔk an, bï kɔc ee luui tuɔɔc ë rap yiic rɛɛpkɛn cï luɔk.”