Math 8 - JAM DE NHIALIC 2011

Yecu Atɔ Raan Waar

¹ Na wën, acï bɛ̈n piny ë kuur nɔm, ke kuut dït ke kɔc ke ke biɔth yecök.

² Na wën, ke raan cïï wɛth dɔm ke bɔ̈, bïï ku gut enɔm piny ë yenɔm, ku lueel an, “Bɛ̈nydït, të de yïn piɔ̈u luɔi tɔ yïn a waar, ke yïn duëër ɛn tɔ waar.”

³ Go Yecu yecin riɛny tueŋ, jiɛk, ku lueel an, “Anu ë yapiɔ̈u, waar guöp.” Go wɛnhde waar ënɔnthiinë.

⁴ Go Yecu lom thok an, “Du lëk raan däŋ mäthdhiëën, jël tei, lɔ nyuöthë rɔt bɛ̈ny ë ka ke Nhialic, ku gam ke cï Mothe luel, an, bï aa gam an bï aa ŋïny bï kek e ŋic.”

Yecu Atɔ Lïm de Bɛ̈ny Alathkëër tɔ Waar

⁵ Na wën, acï Yecu lɔ Kapernaum, ke bɛ̈ny de cök alathkëër kabɔt bɔ̈ tëde yen, bï ku lɛ̈ŋ,

⁶ an, “Bɛ̈nydït, lïm ee ya luööi adhɔt piny ɣööt, ke cï duany, acï cuil guöp arëët.”

⁷ Go lueel an, “Yɛn bï lɔ bä lɔ tɔ dem.”

⁸ Go bɛ̈ny alathkëër bɛ̈ɛ̈r an, “Bɛ̈nydït, yɛn cie raan röŋ wokë luɔi bï yïn lɔ ɣöndï, lueel tei ë yïthok, ke lïmdï bï dem.

⁹ Ku yɛn ee raan nu ë bɛ̈ny cök aya, ku dɛ alathkëër ë yacök, aguɔ ŋɛk yɔ̈ɔ̈k an, ‘Lɔɔr’, ke lɔ, ku yɔ̈ɔ̈k däŋ an, ‘Bäär,’ ke bɔ̈, ku yɔ̈ɔ̈k lïmdï an, ‘Loi kënë,’ ago looi.”

¹⁰ Na wën, acï Yecu e piŋ, ke gäi, ago kɔc kuany ecök yɔ̈ɔ̈k an, “Wek yɔ̈ɔ̈k ëyic, an, “Acakaa Yithriɛl nɔm ëbɛ̈n, yɛn kën gäm dïït cït ee kënë kɔn yök.

¹¹ Ku alɛ̈k week an, “Kɔc juëc abïk bɛ̈n të lɔ aköl amiäk, ku të lɔ aköl athɛ̈i, bïk ku nyuckï piny në Abraɣam ëtök, ku Yithaak, ku Jakop, ë ciɛɛŋ de paannhialic.

¹² Ku wɛ̈ɛ̈t ke ciɛɛŋ abïï ke cuat tëcool nu biic ya, tɛ̈ɛ̈n abï dɛ dhiëëu ku ŋëny de lec.”

¹³ Go Yecu bɛ̈ny alathkëër yɔ̈ɔ̈k an, “Lɔ, cït man cï yïn ë gam, ë tɔ̈u aya tëde yïn.” Ago lïmde dem ë thaarë guöp.

Yecu Atɔ Kɔc Juëc Waar

¹⁴ Na wën, acï Yecu bɛ̈n ɣön ë Petero, ke tïŋ dhiɔm de Petero adhɔt piny ke juäi.

¹⁵ Na wën, ke jiɛk cin, go juäi päl piny, go rɔt jɔt, le keek luöi këcam.

¹⁶ Na ɣɔn thëën, acï akɔ̈l lɔ piny, ke ke bïï kɔc juëc tëde yen, kɔc de gup jɔɔk rac, go jɔɔk cieec ë kɔc gup në jam de yenthok, ku tɔ kɔc tök dem kedhie,

¹⁷ ago jam aa yic jam ɣɔn cï lueel ë tiët Yithaya an, “Yen guöp acï tëtöökuɔ nööm, ku acï juɛ̈ikuɔ jɔt.”

Kɔc bïï Aa Kɔc Kuany Yecu Cök

¹⁸ Na wën, cï Yecu kuut dït ke kɔc tïŋ ë yeŋeŋ, ke yöök kɔc an, Jëlku lok lɔŋtui.

¹⁹ Na wën, ke raan tök bɔ̈, raan ë löŋ gɔ̈ɔ̈r, bï ku yöök an, “Bɛ̈ny ë wëët, yïn bä kuany cök, të de yen të le yïn thïn.”

Kɔc bïï Aa Kɔc Kuany Yecu Cök

²⁰ Go Yecu yɔ̈ɔ̈k an, “Awɛn adekï ɣöötkɛn cï wec piny, ku diɛt nhial adekï ɣööt, ku Wën ë Raan acïn të kɛn en enɔm.”

²¹ Ku yöök ë raan däŋ ë kɔckɛn ë piööcë yiic an, “Bɛ̈nydït, päl ɛn ë ya kɔn lɔ la waar tɔ̈ɔ̈u.”

²² Go Yecu yöök an, “kuany a cök, päl kɔc cï thou ë ke thiäk kɔckɛn cï thou.”

Yecu Atɔ Apiöök lɔ Dïu

²³ Na wën, acï lɔ ë abëlic, ke kuany cök ë kɔckɛn ë piööcë.

²⁴ Na wën, ke gök dïït ë amaŋ jɔt rɔt wiir, arëk abï abël kum ë apiöök, ku anin.

²⁵ Go kɔckɛn ë piööcë bɛ̈n tëde yen, bïk ku päckï, lueelkï an, “Bɛ̈nydït, kony wook, wok thou.”

²⁶ Go keek yɔ̈ɔ̈k an, “Eeŋö riääc wek, wek kɔc dɛk ë gam?” Na wën, ke jɔt rɔt, go yom dït jɔ̈ɔ̈ny ku jiëëny wɛɛr, gokï lɔ dui arëët.

²⁷ Go kɔc gäi, luelkï an, “Ee raan cït ŋö ee kënë, acakaa yom ayï wɛ̈ɛ̈r ke ke piŋ löŋde?”

Yecu Atɔ Röör Kaarou Waar Röör de Gup Jɔɔk rac

²⁸ Na wën, acï ɣet lɔŋtui, të nu piny de kɔc ke Gadaren, ke räm kekë kɔc kaarou kɔc de gup jɔɔk rac, abïkï bei ë rɛ̈ŋ yiic, ee kɔc gäi piɔ̈ɔ̈th arëët, an a cïn en raan duëër tëëk ë kueerë.

²⁹ Na wën, ke ke cöt an, “Eeŋöda në yïn, yïn Yecu, Wën ë Nhialic? Cï bɛ̈n eenë ke akööl ë ke ŋoot, bä wo bɛ̈n leeŋ piɔ̈ɔ̈th?”

³⁰ Ku de luny dïït ë kudhuur ëtɛ̈ɛ̈n, amec ke keek ëmääth, ke ke nyuäth.

³¹ Go jɔɔk rac lɔŋ an, Të cieec yïn wook biic, päl wook, buk jäl ke wo lɔ ë luny ë kudhuuric.”

³² Ago keek yɔ̈ɔ̈k an, “Lakï. Na wën, acïk bɛ̈n bei, ke ke lɔ ë luny ë kudhuuric, ku jɔ luny ë kudhuur ëbɛ̈n riŋ ërïpïp ke ke lɔ piny agör yɔu, lek röt dɛɛny wiir, agokï thou ë pïïu yiic.

³³ Go kɔc wën ë keek tiit gokï kat jëlkï lek pänydït, lek käŋ guiir kedhie, ku guiirkï ka ke kɔc de gup jɔɔk.

³⁴ Na wën, ke pänydït ëbɛ̈n ke ke lɔ biic bïk bɛ̈n rɔ̈m në Yecu, na wën, acïk tïŋ, ke läŋkï an, bï jäl pinyden.