Math 7 - JAM DE NHIALIC 2011

Jäny de Kɔc Kɔ̈k

¹ Duökï kɔc ë jɔ̈ɔ̈ny, ke we cïï bï aa jɔ̈ɔ̈ny.

² Jäny aa we kɔc jɔ̈ɔ̈ny, yen abï wek aa jɔ̈ɔ̈ny aya, ku thëm aa wek käŋ them, yen, abï week aa them aya.

³ Ku eeŋö woi yïn wɛ̈ɛ̈lthiin nu ë mɛnhkui nyin, ku cïï tim dït ë tïŋ tim nu ë yïnyin guöp?

⁴ Ku bä mɛnhkui yɔ̈ɔ̈k adï an, “Tɔ ya mïït wɛ̈ɛ̈lthiin nu ë yïnyin bei, ku tïŋ, tim dït ka ë yïnyin guöp?

⁵ Yïn ee raan deyic aguk, kɔn tim dït nu ë yïnyin bɛ̈ɛ̈i bei, na ëlë, ke yïn bï daai ëgɔk ku yïn duëër wɛ̈ɛ̈lthiin nu ë mɛnhkui nyin dap bɛ̈ɛ̈i bei.

⁶ “Këpiɛth ɣeric duökï ee yiɛ̈n jɔ̈k, ayï waŋguurkuön tuc ë ɣööcden duökï keek ë cuat kudhuur nïïm, ke ke cïï ke bï dum ë kecök, agokï kenïïm bɛ puk, guutkï week.

Liëpë, Kɔ̈ɔ̈rë, Tɔŋ

⁷ Yak lip, ke we bï miɔɔc, yak köör, ku abäk yök, yak ɣöt tɔɔŋ thok, ku abï liëp week.

⁸ Raan ëbɛ̈n raan ë këdäŋ lip, ke yök, raan ë këdäŋ kɔɔr, ke yök, ku raan tɔŋ ɣöt thok, ke liëpë yen.

⁹ Ee raanou në weyiic, të lipë mɛnhde kuïn tëde yen, ke bï gäm kɔɔi?

¹⁰ Ku na lip rɛ̈c, ke bï gäm kërac?

¹¹ Ku të ŋiɛc wek mïthkun miɔɔc ë kapiɛth, ku wek rac, ku na wuöörduön nu paannhial cïï kɔc lip en bï miɔɔc në kapiɛth awär week arëët?

¹² Yen tëde ka, käŋ kedhie ka kaarkï nɔn bï kɔc keek aa luöi week, ke wek aya yak ke luööi wäklë, kënë ee löŋ ku ye tït.

Thoŋ Koor

¹³ Tɛ̈kkï ë kal thok, thoŋ kooric, kal adït thok, ku kueer alääuwic kueer lɔ të nu riääk, ku kɔc ee tëëk thïn ajuëckï.

¹⁴ Ku kal akoor thok, ku kueer ajonyic, kueer lɔ të nu pïïr, ku kɔc ë ye yök alikï.

Tim kekë Mïthke

¹⁵ Yak röt tiit në tït aluɛth, kɔc ee bɛ̈n tëde week ke ke ceŋ dël ke thök, ku keyiic thïn ayak aŋuööth cï wäth.

¹⁶ Abäk ke ŋic në kakɛn yek kek luɔk. De kɔc ë enap yök ë kuɔɔth yiic, ku yek mïth ke ŋaap yök ë thilic?

¹⁷ Yen aye tim piɛth ëbɛ̈n luɔk ë mïth piɛth, ku lok tim rac në mïth rac.

¹⁸ Tim piɛth acïï duëër luɔk ë mïth rac, ayï tim rac, acïï duëër luɔk ë mïth piɛth.

¹⁹ Tim ëbɛ̈n tim cie luɔk ë mïth piɛth, ke yepë piny, ku cuɛtë mɛɛc.

²⁰ Yen abä wek keek aa ŋic në kakɛn ee kek ke luɔk.

Wek Kuöc Anandï

²¹ Acie raan ëbɛ̈n raan ee ye lueel, an, Bɛ̈nydït, Bɛ̈nydït, yen bï lɔ ë ciɛɛŋ de Nhialic, ee raan ë këde piɔ̈u ë wäär looi, wäär nu paannhial yen abï lɔ.

²² Kɔc juëc abïk ɛn yɔ̈ɔ̈k ëköölë an, “Bɛ̈nydït, Bɛ̈nydït, kënku cɔ̈ɔ̈r në rinku, ku kënku jɔɔk rac cieec në rinku, ku kënku luɔi ril looi në rinku?”

²³ Ku abä keek yɔ̈ɔ̈k an, “Wek kuöc anandï, jatkï ë yalɔ̈ɔ̈m, wek kɔc ee kërac looi.”

Kɔc Kaarou ë Yïk Ɣööt

²⁴ Yen ka, raan ëbɛ̈n raan ë wëlkiënë piŋ, ku ye ke looi, yen abä thɔ̈ɔ̈ŋ kekë raan pelnɔm, raan ë ɣönde yïk ë kuur nɔm,

²⁵ na miäk, ke deŋ lɔ piny, ku bɔ̈ amool, ku put yom dït, abïk wït ee ɣönë, go cuö wiëëk, en ë ɣönë, luɔi cï këërkëërde wec abï ɣet ë kuur nɔm.

²⁶ Ku raan ëbɛ̈n raan ë wëlkiënë piŋ, ku cïï keek ë looi, yen abä thɔ̈ɔ̈ŋ kekë raan piɔlpiɔ̈u, raan ë ɣönde yïk ë liɛɛt nɔm,

²⁷ go deŋ lɔ piny, ku bɔ̈ amool, ku put yom dït, abïk wït ee ɣönë, ago wïïk ë wïïk dït.

Riɛl de Yecu

²⁸ Na wën, acï Yecu wëlkë thöl, ke kɔc ë ke gäi në wëëtde,

²⁹ aye keek wɛ̈ɛ̈t cït man ë raan cath ke riɛl ku cïï cït man ë kɔc ë löŋ gɔ̈ɔ̈r.