Math 6 - JAM DE NHIALIC 2011

Wëët në Biäk de Kuɔɔny

¹ “Yak röt tiit, duökï luɔiduön piɛth ë looi ë kɔc nïïm, ke bï tïŋ, na luɔikï wäklë, ke we cïn nïïm ariöpdun tëde wuöörduön nu paannhial.

² “Yen ka, të miɔɔc yïn kɔc ë dhuëëŋdu, ke yï du kaaŋ tɔ koth ë yïnɔm tueŋ, cït man ë luɔi de kɔc de yic aguk, ë ɣööt ke Nhialic yiic ku kuɛɛr yiic, ke ke bï leec ë kɔc. Wek yɔ̈ɔ̈k ëyic an, “Acïk ariöpden guɔ yök.

³ Ku yïn, të miɔɔc yïn kɔc ë dhuëëŋdu, du ciin camdu ee tɔ ŋic këduön ë looi ë ciin cuënydu,

⁴ ago dhuëëŋduön ee yïn kɔc miɔɔc ago ya këcïmoony, na miäk, ke Wuöördun, raan ee këcïmoony tïŋ, ka bï yïn cuööt ë kɔc nïïm.

Wëët në Biäk de Lɔ̈ŋ

⁵ Ku tën ee yïn lɔ̈ŋ, yïn cïï bï ciët kɔc deyiic aguk, anhiaarkï kɔ̈ɔ̈c kɛ̈ɛ̈c kek ë ɣööt ke Nhialic yiic ku aguuk ke kuɛɛr, të ye kek lɔ̈ŋ, ke ke bï tïŋ ë kɔc. Wek yɔ̈ɔ̈k ëyic an, “Acïk ariöpden guɔ yök.

⁶ Ku yïn, të lɛ̈ŋ yïn, ke yï lɔ ɣönduön ee yïn lɔ̈ŋ thïn, ku të cï yïn ɣöt thiöök, ke yï läŋ wuöördun raan ë kë cï thiaan tïŋ, ka bï yï cuööt ë kɔc nïïm.

⁷ Ku të läŋ wek, duökï wël ë nyɔ̈ɔ̈kic në ɣɔ̈ric, cït man ë juöör kuc Nhialic, ayek lueel ë kepiɔ̈ɔ̈th an, bï këden aa piŋ në baŋ de jam juëc luelkï.

⁸ Yen duö wek röt ee tɔ cït keek, wuöördun aŋic kë dak week të ŋuɔɔt wek ke we kën en lip.

⁹ Yen aa wek lɔ̈ŋ wäklë: Wääda nu paannhial, Tɔ rinku riëëuwë.

¹⁰ Tɔ ciɛɛŋdu bɔ̈, Tɔ këdu piɔ̈ndu ee looi ë piny nɔm, Acït man ë ye looi paannhial.

¹¹ Miɔc wook ëköölë në këcam kɔɔrku,

¹² Ku ye wook päl käny cath ë wook, Acït man pɛ̈l wok kɔc cath ë känykuɔ.

¹³ Ku du wook ë lɛɛr ë themic, Ye wo luök në kërac, Ciɛɛŋ ee këdu, riɛl ee këdu, Dhuëëŋ ee këdu, aɣet athɛɛr. Amiin.

¹⁴ Ku na yak kɔc päl ka cïk wööc, ke wuöörduön nu paannhial abï week aa pɔ̈l aya.

¹⁵ Ku të cä wek kɔc ee päl ka cïk wööc, ayï wuöördun aya acïï we bï aa päl ka cäk wööc.

Wëët në Biäk de Reec de Cäm

¹⁶ “Ku cöök däŋ, të ya wek cäm rɛɛc, duökï wenyïïn ë kuaany cït man ë kɔc deyiic aguk, ayek kenyïïn tɔ rac, ë luɔi bï kek aa tïc ë kɔc nïïm nɔn ee kek kɔc reec cäm. Wek yɔ̈ɔ̈k ëyic an, “Acïk ariöpden guɔ yök.

¹⁷ Ku yïn, të ee yïn cäm rɛɛc, ke yï tɔc yïnɔm ë miök, ku piny yïnyin,

¹⁸ ke yïn cïï bï aa tïc ë kɔc nïïm nɔn ee yïn raan reec cäm, yïn bï tïc ë wuöördun nɔm tei, wuöördun raan ee kë cï thiaan tïŋ, abï yïn cuööt ë kɔc nïïm.

Kuɛth nu Paannhial

¹⁹ “Duökï röt ë kuɛ̈t wëukun ë piny nɔm, të ye kɔ̈m keek riɔ̈ɔ̈k ku yek keth, ku të ye cuɛ̈ɛ̈r ɣöt pil kɔ̈u ku kuëlkï.

²⁰ Yak röt kuɛ̈t wëukun paannhial, të cïn kɔ̈m bï ke riɔ̈ɔ̈k ku cïkï ye keth, ku të cïn cuɛ̈ɛ̈r bï ɣöt pil kɔ̈u ku kuëlkï,

²¹ të nu wëukun, yen abï piɔ̈ndun nu thïn aya.

Ɣɛɛr de Guöp

²² Many ee guöp riaau yen aye nyin, ku na piɛth nyindu, ke yïn ɣer guöp ëbɛ̈n.

²³ Ku na rac nyindu, ke yïn col guöp ëcut. Ku na tëɣeer nu ë yïguöp, të cool en, ke cuɔl ë yïnguöp bï ciët ŋö?

Nhialic ku Wëu

²⁴ Acïn raan duëër rɔt tɔ ye lïm de bäny kaarou, ka bï tök maan, ku nhiaar tök, ku abï tök dɔm ku tɔ tök cïn naamde. Wek cïï röt duëër tɔ ye lïïm ke Nhialic ku lïïm ke wëu ayadäŋ.

²⁵ Yen a yɔ̈ɔ̈k ɛn week an, Duökï ë diɛɛr ë wëikun në ke bäk aa cam, ku në ka bäk aa dek, ku duökï ë diɛɛr ë wegup, në ke bäk aa cieŋ, wëi cïkï piɛth awärkï këcam, ku raan guöp cïï piɛth awär lupɔ?

²⁶ Wɔikï diɛt nhial, acïkï ee com, ku acïkï ee tem, ku acïkï rap ee kuöt ë adhɛn yiic, ku wuöörduön nu paannhial yen aye keek tɔ cäm. Ku week, cäkï ŋuän ë keek arëët?

²⁷ Ku eeŋa ë weyiic, raan duëër bɛ̈ɛ̈rde ŋuak ë kaam tök, në diɛɛr ee yen diɛɛr?

²⁸ Ku eeŋö diɛɛr wek ë këde lupɔ? Wɔikï agurbiök nu roor, cil ciil kek, acïn luɔi loikï, ku acïn alɛɛth wikï,

²⁹ ku wek yɔ̈ɔ̈k an, “Acakaa Tholomon kekë dhuëëŋde ëbɛ̈n akën rɔ piɔ̈th cït man ë tök ë kakë yiic.

³⁰ Ku na ye Nhialic wɛ̈ɛ̈l roor piɔ̈th ale, wɛ̈ɛ̈l nu ëköölë, ku miäk ke cuɛtë mɛɛc, cïï we bï piɔ̈th ë piöth wär piöthden arëët, wek kɔc dɛk ë gam?

³¹ Yen duö wek ë diɛɛr an, “Buk ŋö cam? Ku an, “Buk ŋö dek? Ku an, “Buk ŋö cieŋ?

³² Kake kedhie aye juöör ke kɔɔr, ku aŋic wuöörduön nu paannhial nɔn kaar wek kake kedhie.

³³ Kankï ciɛɛŋ de Nhialic aa kɔɔr, kekë piath ë yenpiɔ̈u, ku kakë kedhie abï ke ya juak nyïïn tëde week.

³⁴ Yen duö wek ë diɛɛr në këde miäk, miäk abï diɛɛr ë ka ke yenguöp. Kööl tök abï kuɛth ë jam rɛɛcde yetök.