Math 3 - JAM DE NHIALIC 2011

Wɛ̈ɛ̈t de Jɔn Baptith

¹ Na ɣɔn ë aköölkë ke Jɔn Baptith bɔ̈, ke guiir wël ë jɔ̈ɔ̈r ë Judaya yic,

² kë ye lueel an, “Pɔ̈kkï wepiɔ̈ɔ̈th, ciɛɛŋ de paannhial ë guɔ thiɔ̈k.

³ Ku raanë ee raan wään lueel tiët Yithaya an: “Röl ë raan cöt ë jɔ̈ɔ̈ric, an, ‘Luɔikï kueer ë Bɛ̈nydït, Takï kuɛɛrke lɔ cit!’”

⁴ Ku Jɔn guöp ee lupɔ cï cuëëc ë nhiëm ë thɔ̈rɔ̈l cieŋ, ku ye yeyic duut ë thiööth, ku kën ee cam ee kɔyɔm kekë kiëc nu roor.

⁵ Go raan ëbɛ̈n lɔ biic të nu yen, Jeruthalem ayï Judaya ëbɛ̈n, ayï kɔc nu ë Jordan yɔu ëbɛ̈n,

⁶ ago ke baptith në yen ë wɛ̈ɛ̈r cɔl Jordan, agamkï karɛc cïk wööc.

⁷ Na wën, acï kɔc juëc tïŋ, kɔc ke Parithai kekë Thadokai, ke ke bɔ̈ bïï ke bɛ̈n baptith në yen, ke ke jɔ yɔ̈ɔ̈k an, “Wek mïth ke karɛc, eeŋa ë yöök week an, bäk kat e agönh bï bɛ̈n?

⁸ Yen aa wek luɔk në luɔi piɛth, luɔi bï röŋ në puŋëpiɔ̈u,

⁹ ku duökï ee lueel ë wepiɔ̈ɔ̈th an, wok de wäärda Abraɣam, Nhialic alëu bïï mïth ke Abraɣam cak në kɔikë.

¹⁰ Ku ënɔɔnë yiëp ë guɔ tääu të nu mei ke tiim, tim ëbɛ̈n tim reec luɔk në mïth piɛth aye yiɛp piny, ku cuɛtë mɛɛc.

¹¹ Yɛn dï, wek a baptith ë pïïu tei në këde puŋëpiɔ̈u, ku raan bɔ̈ ë yacök ee raan ril ë yɛn, yɛn cïï röŋ luɔi bän wɛɛr ke yencök muk, yen abï we baptith në Wëidït ɣer ku në mac,

¹² amuk kën ee yen rap kɔ̈l ë yeciin, ku abï yiɛɛude nap abï lipëlip, ago agamɔde kuöt ë adhaanic, ku nyop ayiɛl ë many cie lëu në näk.”

Jool de Yecu

¹³ Na ɣɔn, ke Yecu bɔ̈ bei ë Galili, bï Jordan të nu Jɔn, bï bɛ̈n baptith në yen.

¹⁴ Go Jɔn an, jiɛi an, “Bä të nuö yɛn, ku yɛn adï cï baptith ë yïn?”

¹⁵ Go Yecu puk nɔm an, “Päl ënɔɔnë, apiɛth alë, luɔi bï wok luɔi de piathëpiɔ̈u thöl ëbɛ̈n.” Go gam.

¹⁶ Na wën, acï guɔ baptith, ke Yecu bɔ̈ bei ë pïïu yiic ënɔɔnthiinë, na wën, dï, ke tënhial liep eyic en, ago wëi ke Nhialic tïŋ ke ke lööny piny ke cït guöp guuk, bï ku nyuuc ë yenɔm,

¹⁷ ku bɔ̈ röl paannhial, röl lueel en an, “Wëndiën nhiaar kï, ee kënë, wën miɛt ɛn piɔ̈u wo yen.”