Math 28 - JAM DE NHIALIC 2011

Jönërɔt

¹ Na wën, aacï akööl ë Thabath guɔ thök, të kɔɔrë piny ruu ëkööl tueŋ wën aa kööl dhorou, ke Meri Magdalene bɔ̈ kekë Meri däŋ, bïk raŋ bɛ̈n tïŋ.

² Na wën, ke piny nieŋ rɔt arëët, ku bɔ̈ tunynhial ë Bɛ̈nydït piny paannhial, bï ku lɔɔr kuur wei ë raŋ thok, ku jɔ rëër ë yenɔm.

³ Acït nyin wilëdeŋ, ku lupɔde aɣer ë wic cït alath,

⁴ ago kɔc ë tïït ago ke lath gup në riɔ̈ɔ̈c wën cï kek riɔ̈ɔ̈c ë yen, abïk ciët kɔc cï thou.

⁵ Go tunynhial bɛ̈ɛ̈r, yöök diäär an, “Duökï riɔ̈c, aŋiɛc nɔn kaar wek Yecu, raan wään cï piäät ë tim cï rïïu nɔm kɔ̈u.

⁶ Aliu ee tënë, ë rɔt jɔt cït man wään cï en e lueel. Bäkï, tiëŋkï të wään tɔ̈ɔ̈cë Bɛ̈nydït thïn.

⁷ Ku jakï dap lɔ, lɛ̈kkï kɔckɛn ë piööcë, ‘nɔn cï en rɔt jɔt ë kɔc cï thou yiic, ku tiëŋkï, akɔn lɔ tueŋ ë week Galili, abäk lɔ tïŋ ëtɛ̈ɛ̈n!’ Takï kë cä lɛ̈k week.”

⁸ Gokï dap jäl ë raŋ nɔm, ariɔ̈ckï tei, ku amitkï piɔ̈ɔ̈th ayadäŋ, gokï kat lek jam lëk kɔckɛn ë piööcë.

⁹ Na wën, aa ciɛthkï kueer, ke ke lɔ kɔckɛn ë piööcë lɛ̈k jam, ke Yecu ë räm ke keek, go lueel an, “Thieitheei ë week!” Gokï bɛ̈n ku dɔmkï cök, lamkï.

¹⁰ Go Yecu ke yɔ̈ɔ̈k an, “Duökï riɔ̈c, lak lɛ̈kkï mïthëkɔckuɔ an, bïk lɔ Galili, tɛ̈ɛ̈n en abï kek a tïŋ.”

Kë cïï Kɔc ë Tït Nyooth

¹¹ Na wën, alekkï, ke kɔc kɔ̈k ë kɔc ë tïït ke ke bɔ̈ pänydït, bïk ku nyuthkï bänydït ke ka ke Nhialic ka cï röt looi kedhie.

¹² Na wën, aa cïk guëër në röördït ëtök, ke ke mat löŋ, gokï alathkëër gäm wëu juëc,

¹³ ku luelkï an, “Jakï lueel an, kɔckɛn ë piööcë acïk bɛ̈n wakɔ̈u, bïkkï ku kualkï guöpde, ke wo nin.

¹⁴ Ku na cï bɛ̈ny kënë piŋ, abuk wëŋ, agoku week tɔ cïn diɛɛr bä wek diɛɛr.”

¹⁵ Gokï wëu nööm, ku loikï ke cït man cïï ë ke wɛ̈ɛ̈t, ku jamë acï thiëi ë Judai yiic, ku tɔ̈u aɣët cï ee köölë.

Yecu Acï Tuöl Tëde Kɔckɛn ë Piööcë

¹⁶ Na wën, ke kɔcpiööcë kathiëër ku tök ke ke jël lek Galili, lek të nu kuurdïït cï Yecu kɔn lɛ̈k keek.

¹⁷ Na wën, aa cïk e tïŋ, ke lamkï, ku ŋït kɔc kɔ̈k piɔ̈ɔ̈th.

¹⁸ Go Yecu bɛ̈n, bïï ku yöök keek an, “Riɛl ëbɛ̈n acï gäm ɛn paannhial ayï piny nɔm.

¹⁹ Yen la wek, lak juöör aa wɛ̈ɛ̈t kedhie, abïk a kɔcpiööcë, ku luöikï keek baptith në rin ke Wäärda, ku Wënde, ku Wëidït ɣer,

²⁰ ku yak keek wɛ̈ɛ̈t, bïk käŋ aa döt kedhie ka cä thɔ̈n week, ku ya kï, yɛn ee cool ë tɔ̈u wo week ë aköölnyïïn kedhie, aɣët thök bï piny thök. Amiin.