Math 27 - JAM DE NHIALIC 2011

Yecu Aleerë Pilato Nɔm

¹ Na ɣɔn amiäk aruu piny, ke bänydït ke kake Nhialic kedhie ku röördït ë kɔc yiic ke ke mɛ̈t kethook Yecu kapäc an, bïk tɔ näk.

² Na, wën, ke dutkï, ku thelkï, yïnkï bɛ̈ny Pontio Pilato.

Thon de Judath

³ Na wën, ke Judath, raan ë nyiin en, të cï en tïŋ nɔn cï löŋde guɔ teem an, bï nɔ̈k, ke dɔm tiëël, go atek kathiërdiäk bɛ pɔ̈k nïïm bänydït ke ka ke Nhialic ku röördït’

⁴ Go lueel an, “Yɛn ë këdäŋ wööc, ë luɔi cän riɛm de raan nyiɛɛn raan cïn kërɛɛc cath ke yen!” Gokï lueel an, “Eeŋöda thïn? Ee këdu yïn yïtök!”

⁵ Go atek dɛɛny piny Luaŋdït yic, ku jël, le rɔt nöök.

⁶ Go bänydït ke ka ke Nhialic riët nööm, ku luelkï an, “Acïkï röŋ ë luɔi bï ë ke tääu të ye wëu ke Luaŋdït kueet thïn, luɔi ee kek wëu ke riɛm.”

⁷ Agokï kethook mat, ku ɣɔckï dom në keek, dom de raan ë töny cuëëc an, bï kɔc lei aa thiɔ̈k thïn.

⁸ Yen aye domë tɔ ye “Dom de Riɛm” aɣët cï ee köölë.

⁹ Go jam aa yic jam ɣɔn lueel ë tiët Jeremia an, “Agokï atek kathiërdiäk nööm, ke ye ɣööc de raan wään cï ë ɣööcde lueel ë kɔc ke Yithriɛl,

¹⁰ ku gɛmkï keek ë këde dom de raan ë töny cuëëc, cït man cï Bɛ̈nydït e lɛ̈k ɛn.”

Pilato Alop Yecu

¹¹ Na wën, ke Yecu ë kääc ë bɛ̈ny nɔm, go bɛ̈ny thiëëc an, “Ye melik de Judai?” Go Yecu lueel an, “Yen ka kë cï lueelë.”

¹² Ku të cï e gaany ë bänydït ke ka ke Nhialic ku röördït, go ciën kë cï bɛ̈ɛ̈r.

¹³ Go Pilato thiëëc an, “Kɛ̈në ë ka gɔɔny kek yïn piŋ?”

¹⁴ Ku acïn kë cï bɛ̈ɛ̈r, acakaa jam tök aliu, arëk abï bɛ̈ny gäi arëët.

Yecu Acï Kuöm Thuɔɔu

¹⁵ Ku ciɛɛŋ aa nu ɣɔn ëköölë ë Dhuëëŋ an, bï bɛ̈ny raan töŋ cï mac aa luöny kut ë kɔc, raan nu ë kepiɔ̈ɔ̈th.

¹⁶ Ku ade raan cï mac ë aköölkë raan cï rin tïc, cɔl Barabath.

¹⁷ Na wën, aacï kɔc guiëër, ke ke thiëëc Pilato an, “Eeŋa nu ë wepiɔ̈ɔ̈th raan bä luöny week? Ee Barabath, ku ye Yecu, raan cɔl Kërtho?”

¹⁸ Acï ŋic ëgɔk nɔn ee yen tiɛɛl yen ë yïn kek e yen.

¹⁹ Na wën, të rëër en ë thööny de guiëërëlöŋ nɔm, ke thok bɔ̈ tëde tiiŋde an, “Du de kë luöiyë raan piɛthpiɔ̈uwë, yɛn ë kajuëc guum ëköölë në baŋde ke ya nyuöth.”

²⁰ Go bänydït ke ka ke Nhialic ku röördït agokï kut ë kɔc wëŋ an, bïk Barabath lip, ku tɔkï Yecu näk.

²¹ Go bɛ̈ny bɛ̈ɛ̈r, thiëëc keek an, “Ee raanou nu ë wepiɔ̈ɔ̈th ë keyiic kaarou, raan bä luöny week?” Gokï lueel an, “Barabath.”

²² Go Pilato ke thiëëc an, “Eeŋö bä jɔ luöi Yecu, raan cɔl Kërtho?” Gokï lueel kedhie an, “Tɔ piëëtë ë tim cï rïïu nɔm kɔ̈u!”

²³ Go bɛ̈ny de luk ke thiëëc, an, “Ee käŋö, ee kërɛɛc ŋö cï looi?” Gokï cööt arëët awär cɔ̈t awën an, “Tɔ piëëtë ë tim cï rïïu nɔm kɔ̈u!”

²⁴ Na wën, aacï Pilato e tïŋ nɔn cïn en luɔi bï en e lëu, ku duëër anuɔɔn bɛ̈ɛ̈i tei, ke nöm pïïu, ku piny ecin ë kut ë kɔc nïïm, ku lueel an, “Yɛn liu ë riɛm ë raanë yic, raan cïn kërɛɛc cath ke ye! Ee këdun wapäc!”

²⁵ Go kɔc bɛ̈ɛ̈r kedhie an, “Në riɛmde nu ë woyiëth, ayï mïthkuɔ yiëth!”

²⁶ Na wën, ke luny Barabath keek, ku jɔ Yecu tɔ dui ë waat, ku yïn kɔc, bïk lɔ piäät ë tim cï rïïu nɔm kɔ̈u.

Alathkëër Abuikï Yecu Guöp

²⁷ Go alathkëër ke bɛ̈ny Yecu dɔm, ku leerkï ë alooc nu ë kal ë bɛ̈ny yic, ku kutkï rem de alathkëër ëbɛ̈n ë yenɔm.

²⁸ Gokï lupɔɔke luöny bei, ku yïkkï kɔ̈u alulut thith bäär.

²⁹ Na wën, aa cïk göl ë kuɔɔth nai, ke tueelkï ë yenɔm, ku tɛ̈ɛ̈ukï wai de aruöör ë ciin cuënyde, ku tukkï kemiɔl ë yenɔm, buikï, luelkï an, “Thieithieei, Melik de Judai!”

³⁰ Gokï ŋuööt guöp, ku nömkï aruöör, yupkï nɔm.

³¹ Na wën, aa cïk en geet, ke ke jɔ alulut wën luöny bei ë yekɔ̈u, ku bekï lupɔɔke tääu, ku thelkï biic lek piäät ë tim cï rïïu nɔm kɔ̈u.

Yecu Acï Piäät ë Tim Cï Rïïu Nɔm Kɔ̈u

³² Na wën, alek biic, ke ke yök raan ë Kurene, cɔl Thimon, gokï dhil tɔ jɔt timdɛn cï rïïu nɔm.

³³ Të cï kek ɣet të cɔl Golgotha, yen aye, “Tëde apet ë thoŋda.”

³⁴ Gokï Yecu miɔc ë mɔ̈n ë wac, cï liääp kekë keth, na wën, aacï thiëëp, ke reec dëk.

³⁵ Gokï piäät ë tim cï rïïu nɔm kɔ̈u, ku tekkï lupɔɔke, në deeny deeny kek gɛk, luɔi bï jam aa yic jam ɣɔn cï lueel ë tiët an, acïk lupɔɔkï tɛ̈k röt kapäc, ku deenykï gɛk ë këde alulutdï.

³⁶ Gokï nyuc piny, ku titkï ëtɛ̈ɛ̈n.

³⁷ Ku tueelkï gɔnyde nhial, gɔny cï ëye gaany, acï gɔ̈ɔ̈r alë an, “Kënë ee Yecu Melik de Judai.”

³⁸ Ku ade kɔc cï piäät ë yen ëtök Kaarou, kɔc ë käŋ rum, tök ë baŋ cuëc, ku tök ë baŋ cam.

³⁹ Go läät ë kɔc wën ee tëëk ëtɛ̈ɛ̈n, ke ke lek kenïïm,

⁴⁰ luelkï an, “Yïn ë mɛnh ee Luaŋdït dhuöör piny, ku bɛ ë yïk ë nïn kadiäk! Luäk rɔt! Tën ee yïn Wën ë Nhialic! Ke yï bɔ̈ piny ë tim cï rïïu nɔm kɔ̈u!”

⁴¹ Ku get guöp në bänydït ke kake Nhialic aya, kekë kɔc ee löŋ gɔ̈ɔ̈r ku röördït, luelkï an,

⁴² “Ë kɔc kɔ̈k luök, ku cïï rɔt lëu në luäk. Na ye melik de Yithriɛl, në bɔ̈ piny ënɔɔnë ë tim cï rïïu nɔm kɔ̈u, ka buk gam!

⁴³ Ee Nhialic ŋɔ̈ɔ̈th, në luɛ̈k ënɔɔnë, të kɔɔr en en, në luɛl ee yen e lueel an, Yɛn ee Wën ë Nhialic.”

⁴⁴ Ayï kɔc ë käŋ rum aya, kɔc wën cï piäät në yen ëtök, acïk lat në jam töŋ manë.

Thon de Yecu

⁴⁵ Na wën, ë thaar kadhetem, ke piny jɔ guɔ cuɔl ëbɛ̈n, aɣët thaar kadhoŋuan.

⁴⁶ Ku të cït thaar kadhoŋuan, ke Yecu cöt ë röl dït an, “Eli, Eli, lama tha bakthani?” Yen aye, “Nhialicdï, Nhialicdï, eeŋö pɛ̈l yïn a wei?”

⁴⁷ Na wën, ke kɔc kɔ̈k ë kɔc kääc ëtɛ̈ɛ̈n, të cï kek e piŋ, ke luelkï an, “Raanë acɔl Elija!”

⁴⁸ Go raan tök ë keek däŋ kat, ku nööm kën ee pïïu jooc, ku jool ë mɔ̈n cï wac, ku tɛ̈ɛ̈u ë wai aruöör nɔm, yïn en le dek.

⁴⁹ Go kɔc kɔ̈k lueel an, “Jɔ pɔ̈l, jɔku woi nɔn bï Elija bɛ̈n bï bɛ̈n luök!”

⁵⁰ Na wën, aacï Yecu bɛ cööt ë röl dït, ke jɔ wëike pɔ̈l, thöök.

⁵¹ Ku ja lupɔ dïït nu Luaŋdït rɛɛt ërou, gɔl nhial ɣeet piny, go piny rɔt niɛŋ, go kuurdït yiic pak,

⁵² ku liep rɛ̈ŋ röt, go gup juëc röt jɔt, gup ke kɔc ɣerpiɔ̈ɔ̈th kɔc cï thou.

⁵³ Na wään cï Yecu rɔt jɔt, ke ke bɔ̈ bei ë rɛ̈ŋ yiic, lek pänydïït ɣeric lek ku tulkï ë kɔc juëc nïïm.

⁵⁴ Na wën, ke bɛ̈ny de rem, kekë kɔc cath në yen, kɔc tit Yecu, të cï kek niɛŋ cï piny rɔt niɛŋ tïŋ, ku tïŋkï ka cï looi, agokï riɔ̈ɔ̈c arëët, ku luelkï an, “Ee yic, kënë ee Wën ë Nhialic!”

⁵⁵ Ku nu diëër juëc ëtɛ̈ɛ̈n adɛɛikï tëmec, diëër wën cï Yecu biaath cök Galili, ke ke ye këde looi.

⁵⁶ Diëër de yiic Meri Magdalene, ku Meri man Jakop kekë Jothep, ku man wɛ̈ɛ̈t ke Dhebedayo.

Täu de Yecu

⁵⁷ Na wën, aacï akɔ̈l thëi, ke raan juëc ë käŋ bɔ̈, raan de Arimathia, cɔl Jothep, ku ye raanpiööcë Yecu aya.

⁵⁸ Go lɔ të nu Pilato, le guöp de Yecu lip. Go Pilato kɔc yɔ̈ɔ̈k an, bïï guöp gäm en.

⁵⁹ Na wën, aacï Jothep guöp nööm, ke jɔ deer ë lupɔ ɣer cɔl linɔn,

⁶⁰ ku le tɔ̈ɔ̈u ë raŋ de yenguöp, raŋ ë piɛc wec ë kuur lɔ giliu yic, go kuur dït tök lɔɔr tɛ̈ɛ̈u ë raŋ thok, ku jɔ jäl.

⁶¹ Ku nu Meri Magdalene ëtɛ̈ɛ̈n, kekë Meri däŋ, ke ke rɛ̈ɛ̈r ë raŋ nɔm.

Kɔc Tït Tɔ̈u ë Raŋ Nɔm

⁶² Na ɣɔn amiäk, ë kööl ë Guiɛɛk cök, ke bänydït ke ka ke Nhialic ku Parithai ke ke guëër ë Pilato nɔm,

⁶³ luelkï an, “Bɛ̈ny, acuk tak nɔn cï aluenhë ye lueel wään ŋoot en ke pïïr an, ‘Ee nïn kadiäk, ke yɛn bï rɔt bɛ jɔt.’

⁶⁴ Jɔ kɔc thɔn ënɔɔnë, bïk raŋ aa tiit apiɛth, aɣët kööl ee kek diäk, ke kɔckɛn ë piööcë ke ke cïï bï bɛ̈n, bïk bɛ̈n kual, ku yöökkï kɔc, an, “Ë rɔt jɔt ë kɔc cï thou yiic, ke mɛnh ciëën abï mɛth tueŋ wään wuöör.”

⁶⁵ Go Pilato ke yɔ̈ɔ̈k an, “Wek cath we kɔc ee tïït, lakï cök ë dɔ̈t wek en, ë dön ŋiɛckï.”

⁶⁶ Gokï lɔ, lek raŋ tɔ cök ë dötëye, ku botkï kuur thok, ku tɛ̈ɛ̈ukï kɔc ee tïït ëtɛ̈ɛ̈n aya.