Math 26 - JAM DE NHIALIC 2011

Kiɛɛr Rɛɛc Luiyë Yecu

¹ Na wën, aacï Yecu wëlke thöl kedhie, ke yöök kɔckɛn ë piööcë an,

² “Aŋiɛckï nɔn bï Dhuëëŋ looi të cï nïn thök kaarou, Dhuëëŋ cɔl Winythok, ku Wën ë Raan abï nyiɛɛn, go piäät ë tim cï rïïu nɔm kɔ̈u.”

³ Go bänydït ke ka ke Nhialic ku kɔc ë löŋ gɔ̈ɔ̈r ku röördït ë kɔc yiic, agokï guëër ë kalic kal ë bɛ̈nydïït ë kake Nhialic bɛ̈ny cɔl Kayapath,

⁴ lek kethook mat ë luɔi bï kek Yecu dɔm ë cuëër, ku bïk nɔ̈k.

⁵ Ku yek lueel an, “Acuku bï dɔm ëkööl ë Dhuëëŋ, ke kɔc ë ke cïï bï lɔ waawaa.”

Yecu acï Tɔc ë Bethani

⁶ Na wën, të nu Yecu Bethani, ɣön ë Thimon raan de guöp wɛth.

⁷ Ke tik bɔ̈ tëde yen acath ke aguun cï cuëëc ë kuur cɔl alabatha, aguun deyic miök cï tuöm, ɣööcde atuc, go luööŋ ë yenɔm, të rëër en tëde cäm.

⁸ Na wën, aacï kɔckɛn ë piööcë e tïŋ, ke ke diu piɔ̈ɔ̈th arëët, luelkï an, “Ee käŋö thiëi ë käŋ wei?

⁹ Miökë adï cï ɣaac ë wëu juëc, ku gëm ë ke kɔc kuanynyïïn!”

¹⁰ Na wën, aacï Yecu e piŋ, ke ke yöök an, “Eeŋö juöt wek tiiŋë? Acï ya luöi këpiɛth.

¹¹ We bï dɛ kɔc kuanynyïïn ë weyiic ecaŋdun, ku yɛn cïï bï tɔ̈u ë weyiic anandï.

¹² Kë luuŋ en miök ë yaguöp, ee këde täu bï a tɔ̈ɔ̈u, yen a looi en en.

¹³ Wek yɔ̈ɔ̈k ëyic an, “Baai ëbɛ̈n të bï wëlpiɛthkë aa guiir thïn ë piny nɔm ëbɛ̈n, ayï kënë aya kë cïï tiiŋë looi abï lueel në täŋ bï kɔc këde aa tak.”

Judath Acï Gam ë Luɔi Bïï Yen Yecu Nyiɛɛn

¹⁴ Na wën, ke raan töŋ ë kɔc kathiëër ku rou jël, raan cɔl Jadath Yithkariɔt, le tëde bänydït ke ka ke Nhialic,

¹⁵ le ku thiëëc keek an, “Bäk a gäm ŋö ke bä lɔ nyiën week?” Gokï wëu giim në yen ëtök, riët kathiërdiäk.

¹⁶ Na wën, ëkööl manë guöp, ke jɔ kööl piɛth kɔɔr, kööl bï en e nyiɛɛn.

Yecu Acam Këcam de Winythok kekë Kɔckɛn ë Piööcë

¹⁷ Na wën, ëkööl tueŋ ë akööl ke Dhuëëŋ de Kuïn Cïnic Luɔu, ke kɔcpiööcë ë ke bɔ̈ tëde Yecu, bïk ku thiëckï an, “Ee tënou nu ë yïpiɔ̈u të bï wo käŋ guik, të bï yïn Winythok cam thïn?”

¹⁸ Go lueel an, “Lakï pänydït të nu ŋadï, ku jakï yɔ̈ɔ̈k an, “Acï Bɛ̈ny ë wëët lueel an, ‘Kööldï ë guɔ thiɔ̈k, yɛn bï Winythok lɔ looi ɣöndu wokë kɔckiën ë piööcë.”’

¹⁹ Go kɔcpiööcë lɔ looi acït man cï Yecu ye lɛ̈k keek, gokï Winythok guiir.

²⁰ Na ɣɔn thëën, ke nyuc tëde cäm kekë kɔckɛn piööcë kathiëër ku rou.

²¹ Na wën, ciëm kek, ke lueel an, “Wek yɔ̈ɔ̈k ëyic an, raan tök ë weyiic abï a nyiɛɛn.”

²² Gokï piɔ̈ɔ̈th dhiau arëët, ku jɔkï Bɛ̈nydït thiëëc raan ëbɛ̈n, ë ŋɛk an, “Ee yɛn, Bɛ̈nydït?”

²³ Go puk nɔm an, “Raan gëm kekë yɛn ëtök ë aduökic, yen guöp yen abï a nyiɛɛn.

²⁴ Wën ë Raan alɔ, cït man cï e gɔ̈ɔ̈r ë këde, ku amawoou në raan bï Wën ë Raan nyiɛɛn! Aduëër ŋuɛ̈ɛ̈n tëde yen, të kënë ye dhiëëth, en ëraanë!”

²⁵ Na wën, ke Judath, raan ë nyiin en, ke thiëëc an, “Ee yɛn, Rabi?” Go Yecu bɛ̈ɛ̈r an, “Ye ka, cï lueelë.”

Këcam Thëën de Bɛ̈nydït

²⁶ Na wën, aa ciëmkï, ke Yecu ë kuany kuïn cï pam, go thieei, ku wɛ̈ɛ̈kic, ku yïn kɔcpiööcë, lueel an, “Nämkï, camkï, guöpdï kï.”

²⁷ Go bïny nööm, ku thieei, ku jɔ yiɛ̈n keek, lueel an, “Dɛ̈kkï wedhie ë yen,

²⁸ riɛmdï kï, riɛm de löŋ cï piac mac, riɛm cï lëu në baŋ de kɔc juëc, në nyiɛɛi bï karɛcken nyaai.

²⁹ Wek yɔ̈ɔ̈k ëyic, Yɛn cïï bï bɛ dek në mïth ke enapkë, aɣët të bï akööl bɛ̈n, akööl bän dëŋde bɛ gɔl wokë week ëtök ë ciɛɛŋ de wääric.”

³⁰ Na wën, aa cïk din ë Nhialic kiit, ke ke lɔ biic lekkï kuur ë Olip.

Yecu Acaar Jai de Petero

³¹ Go Yecu ke yɔ̈ɔ̈k an, “We bï nïïm mum wedhie ë baŋdï ëlë wakɔ̈u, acï gɔ̈ɔ̈r an, ‘Yɛn bï raan ë tïït yup, go luny ë thök thiëi roor.’

³² Ku na miäk, të cän rɔt bɛ jɔt, ke yɛn bï kɔn lɔ tueŋ ë week Galili.”

³³ Go Petero puk nɔm, lueel an, “Na cak kɔc nïïm mum kedhie në baŋdu, ke yɛn cïï nɔm bï mum anandï!”

³⁴ Go Yecu lɛ̈k en an, “Yïn yɔ̈ɔ̈k ëyic an, ëlë wakɔ̈u guöp, të ŋoot ajïth ke kën kïïu, ke yïn bï a jai ë taiwei raandiäk.”

³⁵ Go Petero lueel an, “Na ya cak dhil thou wokë yïn ëtök, ke yïn cä bï jai ë taiwei!” Ku yen aa lueel kɔcpiööcë kɔ̈kkë kedhie ayadäŋ.

Yecu Aläŋ ë Gethemane

³⁶ Na wën, ke Yecu bɔ̈ të cɔl Gethemane kekë keek ëtök, ku yöök kɔcpiööcë an, “Yɔ̈kkï ë we rɛ̈ɛ̈r ee tënë, yɛn lɔ lɔ̈ŋ ëtɛ̈ɛ̈n.”

³⁷ Go Petero nööm kekë wɛ̈ɛ̈t ke Dhebedayo kaarou, ku jɔ piɔ̈u dhiau abï piɔ̈u jiɛth arëët.

³⁸ Go keek yɔ̈ɔ̈k an, “Yɛn dhiau piɔ̈u arëët, aɣët të bän thou, rɛ̈ɛ̈rkï eenë, ku yiɛ̈nkï në yɛn ëtök.”

³⁹ Go rɔt cuɔt tueŋ ëmääth, ku gut enɔm piny, ku lɛ̈ŋ an, “Yïn wäär, na lëu rɔt, tɔ bïnyë waan ɛn! Ku acie këde piɔ̈ndï, ee këde piɔ̈ndu.”

⁴⁰ Go bɛ̈n të nu kɔcpiööcë, ku yök keek a nin, go Petero thiëëc an, “Ee käŋö cäkï thaar tök duëër lëu në yïn në yɛn ëtök?

⁴¹ Yiɛ̈nkï ku läŋkï, ke we cïï bï lɔ ë thëmic, wëi aye lɔ thïn ëyic, ku ye guöp en akɔ̈c.”

⁴² Go bɛ jäl raanrou, le lɔ̈ŋ an, “Wäär, na cïï ee bïnyë dhal ë luɔi bï en a waan, të kɛ̈n ɛn kɔn dek ë ye, ke yï tɔ këde piɔ̈ndu loi.”

⁴³ Go bɛ̈n ku be ke yök anin, acïï nïn ke nɔ̈k.

⁴⁴ Go ke nyääŋ piny, ku be jäl, le lɔ̈ŋ raandiäk, ku jiɛɛm ë jam awën.

⁴⁵ Na wën, ke bɔ̈ të nu kɔckɛn ë piööcë, bï ku yöök keek an, “Yɔ̈kkï ë we nin tëthiinakäŋ, abäk lɔ̈ŋ, tiëŋkï! Thaar ë guɔ thiɔ̈k, ke Wën ë Raan ë nyiinë ku yïnë kɔc ë kërac looi.

⁴⁶ Jatkï röt, lokku, raan nyiin ɛn kï, acï ɣëët!”

Döm de Yecu

⁴⁷ Na wën, të ŋoot en ke jam, dï, ke Judath bɔ̈, ee raan töŋ de kɔc kathiëër ku rou, ku bɔ̈ kut dïït ë kɔc në yen ëtök, amukkï abätɛ̈ɛ̈u ku thieec, abïkï tëde bänydït ke ka ke Nhialic ku röördït ë kɔc yiic.

⁴⁸ Na wën, ke raan wën bï e nyiɛɛn, ke gëm keek kïn bï kek e ŋic, lueel an, “Raan bä ciim, ka ee yen guöp, cök ë dam wek en.”

⁴⁹ Go bɛ̈n tëde Yecu ënɔnthiinë, bï ku lueel an, “Thieithieei ë yïn, Rabi,” go ciim arëët.

⁵⁰ Go Yecu yɔ̈ɔ̈k an, “Mäth, loi kën ë bïï yïn.” Na wën, ke ke bɔ̈, bïk ku pɛ̈ɛ̈rkï Yecu ë döm.

⁵¹ Na wën, ke raan töŋ de kɔc cath në Yecu, ke riny ecin, wëëth abätäude bei, go lïm tök yup, lïm de bɛ̈nydïït ë kake Nhialic, kip yïc wei.

⁵² Go Yecu yɔ̈ɔ̈k an, “Pɔ̈kë abätäudu tëde, kɔc kedhie kɔc ë abätäu nööm abïk thou në abätäu.

⁵³ Ë ye lueel ë yïpiɔ̈u nɔn cän Wäär duëër lëu ë lɔ̈ŋ ënɔɔnë, ku bï ɛn gäm rɛm ke tuucnhial wär thiëër ku rou?

⁵⁴ Ku kacïgɔ̈ɔ̈r duëërkï aa yith adï, kë luel en an, bï käŋ dhil nu aya?”

⁵⁵ Ee thaar manë guöp, ke Yecu yöök kuut ke kɔc, an, “Ë we bɔ̈ biic cït man ë ka yïn raan tɔŋ, raan ë käŋ rum, ke we muk abätɛ̈ɛ̈u ku thieec, bäk a bɛ̈n dɔm? Ë aköölnyïïn kedhie yɛn ë rëër wo week ëtök Luaŋdït, ke ya wɛ̈ɛ̈t, ku wek kën a dɔm.

⁵⁶ Ku kakë acïk tïc kedhie, luɔi bï kacïgɔ̈ɔ̈r aa yith, ka ke tït.” Na wën, ke nyiëëŋ ë kɔcpiööcë piny kedhie, ku kɔtkï.

Yecu Anu në Akut Nɔm

⁵⁷ Na wën, ke kɔc wën dɔm Yecu, ke thelkï leerkï të nu Kayapath, bɛ̈nydïït ë kake Nhialic, të cï kɔc ë löŋ gɔ̈ɔ̈r guëër thïn ayï röördït.

⁵⁸ Go Petero kuany cök tëmec aɣëët en kaldïït ë bɛ̈nydïït ë kake Nhialic, ku le thïn, le nyuc kekë kɔc cath ë bɛ̈ny cök, ke bï thök bï jam thök bɛ̈n tïŋ.

⁵⁹ Na wën, ke bänydït ke ka ke Nhialic ku röördït ku kɔc nu ë löŋic kedhie, ke ke kɔɔr cäätɔɔ aluɛth an, bïk Yecu cäk thok, ke bï nɔ̈k,

⁶⁰ ku acïn kë cïk yök, ciɛk an, de cäätɔɔ juëc cï bɛ̈n, ka yek aluɛth, acïn kë cïk yök. Na wën, ke cäätɔɔ aluɛth ë ke jɔ bɛ̈n kaarou ciëën,

⁶¹ bïk ku luelkï an, “Acï mɛnhë lueel an, ‘Yɛn cath wo riɛl duɛ̈ɛ̈r ɛn Luaŋdït jäp piny, ku be yïk ë nïn kadiäk.”’

⁶² Go bɛ̈nydïït ë kake Nhialic rɔt jɔt, ku lueel an, “Cïn kë bɛ̈ɛ̈rë? Eeŋö ee kë jiëëny ë cäätɔɔkë yïn?”

⁶³ Go Yecu mim. Na wën, ke lueel bɛ̈nydïït ë kake Nhialic an, “Yïn ta luel gutguut në rin ke Nhialic pïïr, lɛ̈kë wook nɔn ee yïn Kërtho guöp, Wën ë Nhialic.”

⁶⁴ Go Yecu lueel an, “Acï tiiŋic, ku wek yɔ̈ɔ̈k aya an, Ëkööl wadäŋ, ke we bï Wën ë Raan tïŋ arɛ̈ɛ̈r ë baŋ cuëny de Riɛldït, ku bïï ë luäät nïïm luäät nhial!”

⁶⁵ Na wën, ke bɛ̈nydïït ë kake Nhialic ke ret lupɔɔke yiic, ku lueel an, “Acï Nhialic lat! Eeŋö däŋ köörku cäätɔɔ kɔ̈k! Tiëŋkï, wek cï lɛ̈tde piŋ, lɛ̈t lɛ̈ɛ̈t en Nhialic!

⁶⁶ Luɛlkï wäkdiaa?” Gokï bɛ̈ɛ̈r an, “Acï wäc, arɔ̈ŋ ke thuɔɔu.”

⁶⁷ Gokï ŋuööt nyin, ku guutkï ë kecin, ku mɛŋ kɔc kɔ̈k ë kecin,

⁶⁸ ku luelkï an, “Cäär ë wonïïm, yïn Kërtho! Eeŋa ë biäk yïn!”

Petero Ajiɛi Yecu

⁶⁹ Ku rɛ̈ɛ̈r Petero biic ë kaldïtic, go nyan lïm tök bɛ̈n tëde yen, bï ku lueel an, “Yïn aya, yïn aa nu wekë Yecu de Galili.”

⁷⁰ Go jai ë kɔc nïïm kedhie an, “Akuöc yen kë luel.”

⁷¹ Na wën, aacï lɔ biic le ë kät thar, ke tïŋ nyan lïm däŋ, go lɛ̈k kɔc nu ëtɛ̈ɛ̈n an, “Yen ee raanë aa nu kekë Yecu de Nadhareth ayadäŋ.”

⁷² Go bɛ jai ke luel gutguut an, “Raanë akuöc.”

⁷³ Na wën, ee tëthiinë, ke kɔc kääc ëtɛ̈ɛ̈n ke ke bɔ̈ tëde Petero, bïk ku luelkï, an, “Ee yic, yïn ee raan töŋde aya, yïn cïï thoŋdu nyuɔɔth!”

⁷⁴ Go mël jɔ cam, ku jɔ kuëëŋ an, “Raanë akuöc!” Na wën, ke ajïth ë kiiu ënɔnthiinë,

⁷⁵ go Petero jam de Yecu tak, jam wën cï lueel an, “Të ŋoot ajïth ke kën kiiu, ke yïn bï a jai ëtaitai raandiäk.” Go lɔ biic, le dhiau ë dhiën tuc.