Math 25 - JAM DE NHIALIC 2011

Kääŋ de Dhueec Kathiëër

¹ “Ee köölë, ciɛɛŋ de paannhial abï jɔ thɔ̈ɔ̈ŋ ke dhueec kathiëër dhueec cï mɛ̈ckɛnkealath nööm, ku lekï biic lek monythiëk loor.

² Ku dhïc ë keyiic apelkï nïïm, ku dhïc ayek dhän.

³ Duet dhän acïk mɛ̈ckɛnkealath nööm, ku cïn miök mukkï,

⁴ ku duet pelnïïm amukkï miöök ë aguutken yiic kekë mɛ̈ckɛnkealath ëtök.

⁵ Na wën, ke monythiëk gääu, ku näk nïn keek kedhie, agokï niin.

⁶ Na wën, ë wɛ̈ɛ̈ric cil, ke raan cöt an, ‘Tiëŋkï, monythiëk ka bɔ̈yë! Lakï biic lak luɔɔrkï.’

⁷ Gokï röt jɔt kek dhueec kedhie, ku cothkï mɛ̈ckɛnkealath.

⁸ Na wën, ke duet dhän yöök duet pelnïïm an, ‘Miackï wook në miöökkun, mɛ̈ckuɔnkealath akɔɔrkï liu.’

⁹ Go duet pelnïïm puk nɔm, luelkï an, ‘Ei, käŋ abïk wo dak në week ëtök, aŋuän luɔi bä we lɔ tëde kɔc ë käŋ ɣaac, lak röt ɣɔ̈ɔ̈c.’

¹⁰ Na wën, aa lek ɣööc, ke monythiëk bɔ̈, go kɔc wën cï röt coc gokï lɔ ë thiëëkic në yen ëtök, go ɣöt gäär.

¹¹ Na wën, ë kake cök, ke dhuec kɔ̈k ë ke bɔ̈ ayadäŋ bïk ku luelkï an, ‘Bɛ̈ny, bɛ̈ny, liëpë wo ɣöt.’

¹² Go puk nɔm an, ‘Wek yɔ̈ɔ̈k ëyic, wek kuöc.’

¹³ Yen tiɛɛt wek röt, wek kuc akööl ayï thaar bï Wën ë Raan bɛ̈n.

Kääŋ de Lïïm Kadiäk

¹⁴ Acït man ë raan ë keny paan mec, ago lïïmke cɔɔl, lïïm ke yenguöp, ku tɛ̈ɛ̈u wëuke ë kecin.

¹⁵ Go raan tök gäm aguum kadhïc ke wëu, ku gëm raanë aguum kaarou ke wëu, ku gëm raanë agum töŋ de wëu, acï ke gäm raan ëbɛ̈n në këde deerde, ku jɔ keny.

¹⁶ Na wën, ke raan wën cï gäm aguum kadhïc, ke lɔ, go käŋ ɣɔɔc në keek, ago aguum kadhïc ke wëu kɔ̈k yök ayadäŋ ë ɣööcic.

¹⁷ Ayï raan cï gäm rou aya, ke yök ren kɔ̈k ayadäŋ.

¹⁸ Ku lɔ raan cï gäm tök, le piny wec, ku thiɛɛn wëu ke bɛ̈nyde.

¹⁹ Na wën, aacï akööl juëc lɛɛr, ke bɛ̈ny de lïïmke bɔ̈, ku jɔ wëu kueen kekë keek.

²⁰ Go raan cï gäm aguum kadhïc ke wëu bɛ̈n ke muk aguum kadhïc kɔ̈k, go lueel an, ‘Bɛ̈ny, yïn cï aguum kadhïc ke wëu tääu ë yacin, tïŋ, yɛn cï aguum kadhïc kɔ̈k yök ayadäŋ.’

²¹ Go bɛ̈nyde yɔ̈ɔ̈k an, ‘Apiɛth, yïn ee lïm piɛth ŋic käŋ döt, yïn ë kalik döt apiɛth, yïn bä tääu ë kajuëc yiic, yïn bï piɔ̈u miɛt wekë bɛ̈nydu ëtök.’

²² Go raan cï gäm aguum kaarou ke wëu bɛ̈n aya, bï ku lueel an, ‘Bɛ̈ny, yïn cï aguum kaarou ke wëu tääu ë yacin, tïŋ, yɛn cï aguum kaarou ke wëu kɔ̈k yök ayadäŋ.’

²³ Go bɛ̈nyde yɔ̈ɔ̈k an, ‘Apiɛth, yïn ee lïm piɛth ŋic käŋ döt, yïn ë kalik döt apiɛth, yïn bä tääu ë kajuëc yiic, yïn bï piɔ̈u miɛt wekë bɛ̈nydu ëtök!’

²⁴ Na wën, ke raan bɔ̈ raan cï gäm agum töŋ de wëu, bï ku lueel an, ‘Bɛ̈ny, yïn cä ŋic nɔn ee yïn raan ril, yïn ee tem të kën yïn kɔn com thïn, ku yïn ee kuany të kën yïn kɔn pok thïn,

²⁵ aguɔ riɔ̈ɔ̈c, guɔ lɔ ku thiaan agumdu piny, ŋö dï, këdu kï.’

²⁶ Go bɛ̈nyde puk nɔm an, “Yïn ee lïm rɛɛc adaakrɔt, yïn ŋic ɛn nɔn aa yɛn tem të kɛ̈n ɛn com thïn, ku ŋic nɔn aa yɛn kuany të kɛ̈n ɛn kɔn pok thïn,

²⁷ adï cï wëukï dhil tuɛɛl ë kɔc cin kɔc ë wëu waar yiic, na miäk, aa cä bɛ̈n, adï cä kakï yök acïk röt ŋuak.

²⁸ Jakï agum de wëëth nööm tëde yen, ku gämkï raan de aguum kathiëër.

²⁹ Raan ëbɛ̈n raan de nɔm käŋ abï gäm kɔ̈k, ago kuɛth ë käŋ, ku raan cïn nɔm käŋ acakaa kë cath ke yen abï nööm tëde yen.

³⁰ Ku lïm cïn piathdɛn cï bɛ̈ɛ̈i jakï cuat tëcol biic ya, dhiëëu abï nu ëtɛ̈ɛ̈n kekë ŋëny de lec.’

Kuöm Ciëën

³¹ Të bï Wën ë Raan ke cath kekë dhuëëŋde, ku bɔ̈ tuucnhial kedhie në yen ëtök, ka bï jɔ nyuc ë thöönyde nɔm, thöönydɛn ë dhuëëŋ,

³² go juöör kut nïïm kedhie ë yenɔm, go ke pɔ̈ɔ̈c, jurë ku jurë, cït man ë tïn ë thök tiit ee amɛ̈l poc ë bɔɔth yiic.

³³ Ku abï kɔc piɛthpiɔ̈ɔ̈th tääu ë baŋ cuënyde, ku tɛ̈ɛ̈u kɔc ee karɛc looi ë baŋ camde.

³⁴ Na ëlë, ke Melik abï kɔc nu ë baŋ cuënyde yɔ̈ɔ̈k an, “Bäkï, wek kɔc cï thieei ë wäär, bäk lakkï ciɛɛŋ cï guiëk week të ɣɔn ciɛkë piny,

³⁵ yɛn aa cïï cɔk nɔ̈k, aguɔkï a miɔɔc ë këcam, yɛn aa cï yal, aguɔkï ya tɔ dëk, yɛn aaye kaman, aguɔkï ya tääu ɣöt,

³⁶ yɛn aa cïn kɔ̈u lupɔ, aguɔkï ya gäm lupɔ ciɛŋ, yɛn aa tök, aguɔkï ya neem, yɛn aa cï mac, aguɔkï bɛ̈n tëde yɛn.’

³⁷ Ku abï kɔc piɛthpiɔ̈ɔ̈th puk nɔm, thiëckï an, ‘Bɛ̈nydït, ë yï cuk tïŋ nɛn, ke yï nɛ̈k cɔk, agoku yï miɔɔc? Ku cï yal, agoku yï tɔ dëk?

³⁸ Ë yï cuk tïŋ nɛn ke yï ye kaman, agoku yï tääu ɣöt? Ku cïnë kɔ̈u lupɔ, agoku yï gäm lupɔ ceŋ?

³⁹ Ë yï cuk tïŋ nɛn ke yï tök, ku mac yï, agoku bɛ̈n të nu yïn?’

⁴⁰ Ku abï melik puk nɔm, yöök keek an, ‘Wek yɔ̈ɔ̈k ëyic an, Nɔn cä wek e luöi raan töŋ de mïthëkɔckuɔnkë, acakaa raan koor ë keek kedhie, ka cäk luöi yɛn!’

⁴¹ Na ëlë, ka bï kɔc yɔ̈ɔ̈k aya kɔc nu ë baŋ cam an, ‘Jälkï të nuö yɛn, wek kɔc de gup aciɛɛn, lakï mɛɛc, many ë dëp athɛɛr, many cï looi në këde jɔŋdït rac kekë tuucke!

⁴² Yɛn aa cïï cɔk nɔ̈k, ku acïn këcam cäk yiɛ̈n ɛn, yɛn aa cï yal, ku wek ë kën ɛn tɔ dëk,

⁴³ yɛn aaye kaman, ku wek ë kën ɛn gäm ɣöt, yɛn aa cïn kɔ̈u lupɔ, ku wek ë kën ɛn gäm lupɔ ciɛŋ, yɛn aa tök, ku kɛ̈nkï ya neem.’

⁴⁴ Ku abïk puk nɔm aya an, ‘Bɛ̈nydït, ë yï cuk tïŋ nɛn ke yï cï cɔk nɔ̈k, ku cï yal, ku ye kaman, ku cïnë kɔ̈u lupɔ, ku tök yïn, ku mac yï, ku kënku yï kony?’

⁴⁵ Na ëlë, ka bï jɔ pɔ̈k nɔm keek an, “Wek yɔ̈ɔ̈k ëyic an, “Nɔn kɛ̈n wek e luöi raan töŋ koor ë kɔckë yiic, ka kɛ̈nkï luöi yɛn.’

⁴⁶ Ku kɔckë abïk lɔ lek këdɛn tuc yök kë bï ceŋ athɛɛr, ku lɔ kɔc piɛthpiɔ̈ɔ̈th të nu pïïr athɛɛr.”