Math 23 - JAM DE NHIALIC 2011

Yecu Ayöök Kɔc në Biäk de Kɔc ee Löŋ Gɔ̈ɔ̈r ku Parithai

¹ Na wën, ke Yecu yöök kuut ke kɔc, ku yöök kɔckɛn ë piööcë,

² an, “Kɔc ë löŋ gɔ̈ɔ̈r ku Parithai ayek rëër ë thöny ë Mothe nɔm.

³ Yen mɔ̈k wek käŋ kedhie ka luelkï, ku jakï keek aa looi, ku duökï luɔiden dɔmic, ayek käŋ lueel, ku acïkï keek ë looi.

⁴ Ayek kathiek duut, kathiek bï kɔc doony, ku tɛ̈ɛ̈ukï keek ë kɔc këët, ku keek gup ayek ke rɛɛc jak ë kecin, acakaa ciin töŋ thiinë.

⁵ Ayek luɔiden looi ëbɛ̈n ke ke bï tïŋ ë kɔc, ayek wɛlkɛn yek cieŋ tɔ lääu yiic, ku tɔkï lupɔɔken dït thook.

⁶ Ku anhiaarkï tëpiɛth ee kɔc rëër ëkööl ë këcamdït, ayï tëpiɛth ye kɔc rëër ë ɣööt ke Nhialic yiic,

⁷ ku nhiaarkï thiëc ee kɔc röt thiëëc ë thuk yiic, ku kɔɔrkï luɔi bï keek aa cɔɔl ë kɔc, an ‘Rabi, Rabi.’

⁸ Ku week, duökï röt ë tɔ cɔl an, ‘Rabi,’ në biäk dɛ wek nïïm Bɛ̈nyduön tök ee wëët, yen aye Kërtho, ku wek ee mïth ke raan tök wedhie.

⁹ Ku ë cïn raan yak tɔ ye ‘Wuöördun’ ë piny nɔm, në biäk dɛ wek nïïm ‘Wuöördun’ tök, yen aye Raan nu paannhial.

¹⁰ Ku duökï röt ë tɔ cɔl, an, ‘Bɛ̈nydït,’ në biäk dɛ wenïïm Bɛ̈nyduön dït tök, yen aye Kërtho.

¹¹ Ku raan dït ë weyiic abï aa raan ë kakun looi.

¹² Raan ë rɔt tɔ dït, yen abï tɔ koor, ku raan ë rɔt tɔ koor, yen abï tɔ dït.

Yecu Agäk Luɔidɛn de Yic Aguk

¹³ “Amawoou në week, wek kɔc ë löŋ gɔ̈ɔ̈r ku Parithai, kɔc de yäc aguk! Wek ë kɔc guöör biic ë Ciɛɛŋ de paannhial, wegup wek cie lɔ thïn, ku kɔc kɔɔr lɔ thïn acäkï ke ye päl lɔ thïn ayadäŋ.

¹⁴ Amawoou në week wek kɔc ë löŋ gɔ̈ɔ̈r ku Parithai kɔc de yäc aguk! We ye ɣööt ke diëërthum cam, ku jakï käŋ aa moony në lɔ̈ŋduön aa wek lɔ̈ŋ, lɔ̈ŋ bäär, yen abä wek këtuc gök yök ëkööl ë guiëërëlöŋ.

¹⁵ “Amawoou në week, wek kɔc ë löŋ gɔ̈ɔ̈r ku Parithai, kɔc de yäc aguk! We ye Wɛ̈ɛ̈r caathic ku caathkï piny nɔm luɔi bä wek raan tök tɔ puk epiɔ̈u ë wëëtdun, ku të cï en epiɔ̈u puk, ke yak tɔ ye wën ë giɛna awär week arëët!

¹⁶ “Amawoou në week, wek cöör ë kɔc wat kueer, ayak lueel an, ‘Raan luel gutguut në Luaŋdït, ee ke cïn naamde, ku raan luel gutguut në adhääp nu ë Luaŋdïtic, ke këdäŋ anu ë yeyeth.’

¹⁷ Wek dhän ku cöör! Ee kënou de dït ë keyiic, adhääp en dït, ku dït Luaŋdït, eeŋö ë adhääp tɔ ɣeric?

¹⁸ Ku yak lueel aya an, ‘Raan luel gutguut në yïïŋ de läm, ee kë cïn naamde, ku raan luel gutguut në kë cï gäm Nhialic kë nu ë yïïŋ de läm nɔm, ke këdäŋ anu ë yeyeth.’

¹⁹ Wek dhän ku cöör! Ee kënou dït ë keyiic, ee kë cï gäm Nhialic yen dït, ku dït yïïŋ de läm, ee kë cï gäm Nhialic tɔ ɣeric?

²⁰ Yen tëde ka, raan luel gutguut në yïïŋ de läm, aluel gutguut në yen, ku në ka nu ë yenɔm kedhie aya,

²¹ ku raan luel gutguut në Luaŋdït, aluel gutguut në yen, ku në Raandïït ë rëër thïn aya.

²² Ku raan luel gutguut në paannhial, aluel gutguut në thööny de Nhialic, ku në Raandïït ë rëër ë yenɔm aya.

²³ Amawoou në week, wek kɔc ë löŋ gɔ̈ɔ̈r ku Parithai, kɔc de yäc aguk! We ye wal juaar, yï mint, ku anith, ku kumin, ku we ye ka ke löŋ pɔ̈l, ka cït guiëërëlöŋ, ku kokdepiɔ̈u, ku gäm, ka de naamden awärkï wɛl awën, kake adï cäk ke dhil aa looi, ku cäkï kak awën ee pɔ̈l ayadäŋ.

²⁴ Wek cöör ë kɔc wat kueer, kɔc ee kɔ̈m dhiɛɛm wei, ku yak thɔ̈rɔ̈l liek.

²⁵ “Amawoou në week, wek kɔc ë löŋ gɔ̈ɔ̈r ku Parithai, kɔc de yäc aguk! We ye abïny rɔɔth kɔ̈u ayï aduök abïk piath, ku keyiic thïn acïk thiäŋ ë cäm de kalei, ku kuny ee raan rɔt kuöc muk.

²⁶ Yïn Parithai cɔɔr! Kɔn abïny cothic thïn ayï aduök abïk piath, ke ke bï kɔ̈ɔ̈th jɔ piath ayadäŋ.

²⁷ Amawoou në week, wek kɔc ë löŋ gɔ̈ɔ̈r ku Parithai kɔc de yäc aguk! Wek cït rɛ̈ŋ cï coth kɔ̈ɔ̈th ë wɛ̈ɛ̈l ɣer, rɛ̈ŋ cï tɔc kɔ̈ɔ̈th ë ka cï läkëläk biic, ku keyiic acïk thiäŋ ë yom ke kɔc cï thou, kekë kënhiany ëbɛ̈n.

²⁸ Ayï week aya, wek ee röt tɔ ye kɔc piɛthpiɔ̈ɔ̈th ë kɔc nïïm ë baŋ biic, ku weyiic thïn, wek ë yäc thiäŋ ë ruëëny kekë reec aa wek löŋ rɛɛc piŋ.

Yecu Acaar Kuöm bïï ë Keek Kuum

²⁹ “Amawoou në week, wek kɔc ë löŋ gɔ̈ɔ̈r ku Parithai, kɔc de yäc aguk! Wek ee rɛ̈ŋ ke tït yïk, ku yak rɛ̈ŋ ke kɔc piɛthpiɔ̈ɔ̈th looi abïk läk,

³⁰ ku yak lueel an, ‘Të ë wo nu të wään nu kuarkuɔ, adï kënku mat në keek ëtök në lëu de riɛm de tït.

³¹ Luɛl luɛɛl wek en aya, yen aya wek röt tɔ ye cäätɔɔ në këde nɔmdun, luɔi aa wek kɔ̈th ke kɔc ɣɔn kur tït!

³² Kën ë ye kuarkun them, jakï thiɔ̈ɔ̈ŋ nɔm week.

³³ Wek karɛc, wek mïth ke deŋakook! Bäk poth wäkdï ë löŋduön cï guiir, ke we cïï bïï tääu ë giɛna yic?

³⁴ Yen tëde ka, tiëŋkï, yɛn, tuc tït week, ku röör pelnïïm, ku kɔc ë löŋ gɔ̈ɔ̈r, ku we bï kɔ̈k ë keek nɔ̈k abäk ke piäät ë tiim cï rïïu nïïm kɔ̈ɔ̈th, ku we bï kɔ̈k ë keek dui ë wɛt ë ɣöötkuön ë Nhialic yiic, ku yaŋkï keek në pänydït tök ku lakï ë pänydït däŋë.

³⁵ Luɔi bï riɛm piɛthic ëbɛ̈n riɛm cï lëu ë piny nɔm, luɔi bï ye kut nɔm ë weyiëth, gɔl ë riɛm de Abel raan piɛthpiɔ̈u aɣët riɛm de Dhekaria wën ë Barakia raan cäk nɔ̈k ë kaam de tëɣeric kekë yïk.

³⁶ Wek yɔ̈ɔ̈k ë yic an, Kake kedhie abï ke kut nïïm ë remë yeth!

Yecu Anhiaar Jeruthalem

³⁷ “Agäi Jeruthalem oou, Jeruthalem oou, wun ë tït nɔ̈k, ku ye kɔc biɔ̈ɔ̈k ë kur, kɔc cï tuöc yïn! Nïn yekdï nïn ë dɛ yɛn piɔ̈u luɔi bän mïthku kum cït man ye ajïth mïthke kum ë yewuök, ku rɛɛckï!

³⁸ Tiëŋkï, ɣöndun acï nyäŋ week ke cï riääk.

³⁹ Wek yɔ̈ɔ̈k an, “We cïï a bï bɛ tïŋ, aɣët të bä wek e lueel an, ‘Thieithieei ë raan bɔ̈ ë rin ke Bɛ̈nydït.”’