Math 22 - JAM DE NHIALIC 2011

Kääŋ de Dhuëëŋ de Thiëëk

¹ Go Yecu bɛ̈ɛ̈r, ku be jam në kääŋ, lueel an,

² “Ciɛɛŋ de paannhial, acït melik tök, melik cï thiëŋ de wënde lueel,

³ go lïïmke tooc lek kɔc cɔɔl kɔc cï kɔn lɛ̈k thiëëk, gokï rɛɛc bɛ̈n.

⁴ Na wën, ke be lïïm kɔ̈k tooc, lueel an, “Lɛ̈kkï kɔc cï kɔn lɛ̈k thiëëk an, ‘Tiëŋkï, yɛn ë këcamdït guik, miöörkï ku ɣɔ̈kkiën cuai kɔ̈k acï ke nɔ̈k, ku käŋ acïk thök kedhie, bäkï ë thiëëkic!’

⁵ Gokï lueel an, “Eeŋöda thïn, ku jëlkï, lɔ tök domde, ku lɔ tök tëdɛn ë ɣööc,

⁶ go kɔc cï döŋ gokï lïïmke dɔm, ku kurkï keek, ku näkkï keek.

⁷ Na wën, acï melik e piŋ, ke göth, go remdɛn ë tɔŋ tooc, lek kɔc ee kɔc nɔ̈kë nɔ̈k, ku nyop pänydɛndït ë mac.

⁸ Na wën, ke yöök lïïmke an, “Thiëëk acï guik, ku kɔc wään cï lɛ̈k cïï röŋ ë bɛ̈n bï kek bɛ̈n.

⁹ Yen la wek ë kuɛɛr dït yiic, ku kɔc bäk yök ëbɛ̈n, jakï ke cɔɔl ë thiëëkic.

¹⁰ Agokï lɔ biic kek lïïmke, lekï ë kuɛɛr dït yiic, agokï kɔc kut kɔc cïk yök kedhie, kɔc rac ayï kɔc piɛth, go thiëëk jɔ thiäŋ ke kamaan.

¹¹ Na wën, acï melik bɛ̈n ɣöt bï kamaan bɛ̈n tïŋ, ke tïŋ raan ëtɛ̈ɛ̈n raan kën lupɔ de thiëëk tääu ë yekɔ̈u,

¹² go thiëëc an, “Mäth, eeŋö bï yïn eenë, ke yï cïn lupɔ de thiëëk?” Go lɔ lik.

¹³ Na wën, ke melik yöök lïïmke an, “Duötkï cök ku yecin, ku jatkï, cuatkï tëcol biic ya, dhiëëu abï nu ëtɛ̈ɛ̈n kekë ŋëny de lec.”’

¹⁴ Kɔc cï cɔɔl ajuëckï, ku kɔc cï lɔc alikï.

Thiëc në Biäk de kun de Athölbö

¹⁵ Go Parithai jäl lek löŋ kiëët kapäc ë luɔi bï kek ë deep ë jamic.

¹⁶ Gokï kɔckɛn ë piööcë tuöc en, në kɔc ke Ɣerod ëtök, agokï lueel an, “Bɛ̈ny de wëët, yïn ŋicku nɔn ee yïn yic, ku nɔn ee yïn kɔc wɛ̈ɛ̈t në kueer ë Nhialic ë yic, ku acïn raan bï yïn riɔ̈ɔ̈c ë yen, yïn cïï kɔc ë woi gup biic.

¹⁷ Yen lëk yïn wook, ke luel ë yïpiɔ̈u. Cï päl wook nɔn bï wok Kaithar aa kuöt athölbö, ku cie yen?”

¹⁸ Go Yecu rac de kepiɔ̈ɔ̈th ŋic, go lueel an, “Eeŋö thɛm wek ɛn, wek kɔc de yäc aguk?

¹⁹ Nyuöthkï yen wënh ye athölbö kut.” Gokï wënh cɔl denariɔn bɛ̈ɛ̈i yïnkï yen.

²⁰ Go keek thiëëc an, “Raan cï gɔ̈ɔ̈rë eeŋa, ku jam cï gɔ̈ɔ̈r ee këde ŋa?”

²¹ Gokï bɛ̈ɛ̈r an, “Ee Kaithar.” Go ke yɔ̈ɔ̈k an, “Yak Kaithar yiɛ̈n ka ke Kaithar, ku yak Nhialic yiɛ̈n ka ke Nhialic.”

²² Na wën, aa cïk e piŋ, ke ke gäi, ku pälkï, ku jëlkï.

Thiëc në Biäk de Jönërɔt ë Thuɔɔuwic

²³ Ë kööl manë guöp, ke Thadokai ke ke bɔ̈ të nu yen, kɔc ë ye lueel an, acïn jön bï kɔc röt jɔt nu, gokï thiëëc,

²⁴ an, “Bɛ̈ny de wëët, acï Mothe lueel an, të thouwë raan, ke cïn mïth, ke mɛnhkënë abï tiiŋde lɔ̈ɔ̈k thiaak, go mɛnhkënë dhiëëth nɔm.

²⁵ Ku ënɔɔnë, mïth kadhorou aake nu ë woyiic, wɛ̈ɛ̈t ke raan tök, na wën, ke wën dït thiëk, ku jɔ thou, ke cïn meth, go tik nyäŋ mänhë.

²⁶ Ayï wën lɔ ë yecök aya, ayï wën ee kek diäk aya, aɣët wën ee kek dhorou, acïk thou kedhie, ke ke cïn mïth.

²⁷ Na wën, ke tik löök thou aya ë kecök ciëën kedhie.

²⁸ Ku ënɔɔnë, ëkööl ë jönërɔt ë kɔc, ke tiiŋë bï aa tiiŋ de raanou ë keyiic kadhorou? Acï aa këden kedhie.”

²⁹ Go Yecu pɔ̈k nɔm keek an, “Acäk wööc, në kuny kuöc wek kacïgɔ̈ɔ̈r, ku kuöckï riɛldïït ë Nhialic aya.

³⁰ Ë kööl ë jönërɔt ë kɔc, kɔc acïkï ye thiëëk, ku cïï ke ye thiaak, ayek ciët tuuc ke Nhialic paannhial.

³¹ Ku në këde jön bï kɔc cï thou röt jɔt, kɛ̈nkï jam kueen jam cï lɛ̈k week, ë Nhialic an,

³² “Yɛn ee Nhialic de Abraɣam, ku ya Nhialic de Yithaak, ku ya Nhialic de Jakop? Nhialic acie Nhialic de kɔc cï thou, ee Nhialic de kɔc pïïr.”

³³ Na wën, acï kuut ke kɔc e piŋ, ke ke gäi në wëëtde.

Löŋdït

³⁴ Na wën, aacï Parithai e piŋ nɔn cï en Thadokai tɔ mim, ke ke kut kenïïm.

³⁵ Go raan tök ë keek, ee bɛ̈ny de löŋ, go thiëc käŋ, them en en an,

³⁶ “Bɛ̈ny de wëët, cöök dïït ë löŋic ee cöökou?”

³⁷ Go Yecu yɔ̈ɔ̈k an, “Nhiaar Bɛ̈nydït Nhialicdu në piɔ̈ndu ëbɛ̈n, ku në wëiku ëbɛ̈n, ku në nɔmdu ëbɛ̈n.

³⁸ Cöök tueŋ ka, cöök dïït ë löŋ.

³⁹ Ku kë lɔ ë yecök acït en an, ‘Nhiaar raan rɛ̈ɛ̈r ke yïn cït man nhiɛɛr yïn rɔt.’

⁴⁰ Lööŋ ëbɛ̈n kekë tït anöökkï ë cökkë kaarou kɔ̈ɔ̈th.”

Thiëc në Biäk de Kërtho

⁴¹ Na wën, aacï Parithai kenïïm kut, ke ke thiëëc Yecu keek,

⁴² an, “Eeŋö yak lueel në biäk de Kërtho? Ee wën ë ŋa?” Gokï lueel an, “Ee wën ë Debid.”

⁴³ Go Yecu ke thiëëc an, “Ka eeŋö ye Debid ye tɔ ye ‘Bɛ̈nydït’ në riɛl ë Wëidït? Go Debid lueel an,

⁴⁴ “Bɛ̈nydït acï Bɛ̈nydiëndït yɔ̈ɔ̈k an, ‘Rɛ̈ɛ̈rë ë ciin cuënydï, Aɣët të bän kɔc dɛ wek ater tɔ ye kë bï yïn yïcök aa dhɔ̈ɔ̈r.’

⁴⁵ Ku ënɔɔnë, të ye Debid ye tɔ ye ‘Bɛ̈nydït,’ ka eeŋö duëër ë Kërtho aa wën de Debid?”

⁴⁶ Ku acïn raan cï këde Yecu bɛ̈n lëu ë bëër, ku gɔl ëkööl manë guöp lee tueŋ acïn raan cï ye bɛ thiëc käŋ.