Math 21 - JAM DE NHIALIC 2011

Yecu Alɔ Jeruthalem ke cï Tiam

¹ Na wën, aa cïk thiɔ̈k ë Jeruthalem, ku acïk ɣet Bethpage, të lɔ kuurdïït cɔl Olip, ke Yecu toc kɔcpiööcë kaarou,

² ku yöök keek an, “Lakï paan nu ë wenïïm tueŋ, we bï muul yök ënɔnthiinë, ke mac, ku de cök mɛnhde, luɔnykï keek, ku bɛ̈ɛ̈ikï ke të nuö yɛn.

³ Ku na de raan de kë lëk week, ke luɛlkï, an, “Akɔɔr Bɛ̈nydït ke, ku abï ke tɔ lɔ ënɔnthiinë.”

⁴ Kënë acï looi ëbɛ̈n, ë luɔi bï jam aa yic, jam cï lueel ë tiët an,

⁵ “Yɔ̈ɔ̈kkï nyan de Dhiɔn an, “Tïŋ, melikdu abɔ̈ të nu yïn! Ë rɔt kuɔɔr piny, ku acath ë mul kɔ̈u, ku ciɛth ë dau kɔ̈u dan ë mul.”

⁶ Go kɔcpiööcë lɔ, lek käŋ looi acït man cï Yecu e lɛ̈k keek,

⁷ ku bïïkï muul kekë mɛnhde, ku tɛ̈ɛ̈ukï lupɔɔken ë kekɔ̈ɔ̈th, go nyuc ë kekɔ̈ɔ̈th.

⁸ Go tëdït ë kut ë kɔciic gokï lupɔɔken thiɛth kueer, ku tem kɔc kɔ̈k kër ke tiim, ku thiethkï ke kueer.

⁹ Go kut ë kɔc cath tueŋ kekë kut ë kɔc biɔth ke ciëën gokï ya cööt an, “Ɣothana ë tɔ̈u ke wën ë Debid! Thieithieei ë raan bɔ̈ në rin ke Bɛ̈nydït! Ɣothana ë tɔ̈u tënhial ya!”

¹⁰ Na wën, aacï ɣet Jeruthalem, ke pänydït lɔ waawaa ëbɛ̈n, go kɔc thiëc, an, “Eeŋa ee kënë?”

¹¹ Go kut ë kɔc lueel an, “Kënë ee Yecu, tiët de Nadhareth de Galili.”

Yecu Alɔ ë Luaŋdït Yic

¹² Go Yecu lɔ Luaŋdït de Nhialic, le ku cieec kɔc biic kedhie, kɔc ee käŋ ɣaac ëtɛ̈ɛ̈n. Ku puk pɛɛm piny pɛɛm ke kɔc ë wëu waar yiic, ayï kak ee kɔc rëër kɔc ë ajiël ke guuk ɣaac, acï ke pɔ̈k piny,

¹³ ku yöök keek an, “Acï gɔ̈ɔ̈r an, ‘Ɣöndï abï aa cɔl ɣön ë lɔ̈ŋ, ku week, acäk tɔ ye ɣön ë kɔc ee käŋ rum!”

¹⁴ Go cöör ayï ŋöl bɛ̈n të nu yen Luaŋdït, ago ke tɔ dem.

¹⁵ Na wën, aacï bänydït ke ka ke Nhialic ku kɔc ee löŋ gɔ̈ɔ̈r kadït cï looi tïŋ, ku tïŋkï mïth acötkï Luaŋdït yic, ke yek luel an, “Ɣothana ë tɔ̈u ke Wën ë Debid!” Agokï piɔ̈ɔ̈th diu arëët,

¹⁶ ku thiëckï an, “Kë lueel mïthkë cï piŋ?” Go Yecu ke yɔ̈ɔ̈k an, “Ɣɛɛ, kɛ̈nkï kɔn kueen ë awerekic anandun an, ‘Yïn ë lɛcdu tɔ ye dikëdik në mïththiikë thook ayï mïth ŋoot ë ke thuët?”’

¹⁷ Go ke nyääŋ piny, ku jël pänydït le Bethani, le niin ëtɛ̈ɛ̈n.

Yecu Acien Ŋaap

¹⁸ Na ɣɔn amiäk ëtɛ̈ɛ̈n, ke dhuny enɔm pänydït, ke cï cɔk nɔ̈k.

¹⁹ Na wën, ke tïŋ tim ë ŋaap ë kueer këc, go bɛ̈n të nu yen, go ciën kë yök ë yenɔm, ee yïth tei kapäc. Go tim yɔ̈ɔ̈k an, “Ë cïn mïth bï bɛ aa tɔ̈u ë yïnɔm athɛɛr!” Go ŋaap riɔu ënɔnthiinë.

²⁰ Na wën, aacï kɔcpiööcë e tïŋ, ke ke gäi, ku luelkï an, “Ŋaap ë go guɔ dap riɔu adï?”

²¹ Go Yecu bɛ̈ɛ̈r, yöök keek an, “Wek yɔ̈ɔ̈k ëyic, na cathkï ë gäm, ku cäkï piɔ̈ɔ̈th wiël ë kaamic, ke we cïï kënë bï looi tei, kë cï luöi ŋaap, ku na yɔ̈ɔ̈kkï kuurdïïtë aya an, ‘Tɔ rɔt nyiɛɛiyë, deenyë yï wïïr,’ ka duëërë looi.

²² Ku na de kë bäk lïm të läŋ wek ku gamkï, abäk keek aa yök.”

Thiëc në Biäk de Riɛl ë Yecu

²³ Na wën, acï bɛ̈n Luaŋdït, ke bänydït ke ka ke Nhialic kekë röördït ke kɔc yiic ke ke bɔ̈ të nu yen, të wëët en kɔc, bïk ku thiëckï an, “Ë riɛlou looi yïn ee kakë? Ku eeŋa ë gëm yïn ee riɛlë?”

²⁴ Go Yecu pɔ̈k nɔm keek an, “Ku we bä thiëc cöök tök aya, ku të cä wek e lɛ̈k ɛn, ke we bä lɛ̈k riɛl luɔɔi ɛn ee kakë.

²⁵ Yen, Baptith ë Jɔn, ë bɔ̈ ënou? Ë bɔ̈ tënhial, ku ë bɔ̈ tëde kɔc?” Gokï tɛɛr kapäc an, “Të lueel wok en an, “Aa bɔ̈ tënhial, ka bï wo thiëëc an, “Eeŋö däŋ kɛ̈n wek e gam?

²⁶ Ku të lueel wok en an, “Aa bɔ̈ tëde kɔc, wok riɔ̈c ë kut ë kɔc, ayek Jɔn tɔ ye tiët kedhie.”

²⁷ Gokï këde Yecu bɛ̈ɛ̈r, an, “Akucku.” Go ke yɔ̈ɔ̈k an, “Ayï yɛn aya, we cä bï lɛ̈k riɛldï, riɛl luɔɔi ɛn ee kakë.”

Kääŋ de Wɛ̈ɛ̈t Kaarou

²⁸ “Ku luɛlkï wäkdï, week? Ŋadï ade wɛ̈ɛ̈tke kaarou, go bɛ̈n tëde mɛnh tueŋ, bï ku yöök an, ‘Wëndï, lɔ lui domdï ëköölë, dom ë enap.’

²⁹ Go bɛ̈ɛ̈r an, ‘Yɛn cïï lɔ,’ na wën, ke löök epiɔ̈u puk, go lɔ.

³⁰ Go bɛ̈n tëde wën ciëën, bï ku yöök cït man awën. Go bɛ̈ɛ̈r an, ‘Yɛn lɔ, wäär,’ ku cïï lɔ.

³¹ Ee mɛnhou ë keyiic kaarou, mɛnh ë loi këde piɔ̈n ë wuönden?” Gokï lueel an, “Ee mɛnh tueŋ.” Go Yecu ke yɔ̈ɔ̈k an, “Wek yɔ̈ɔ̈k ëyic an, kɔc ë athölbö tɔ kut kekë akɔɔrröör kek a kɔn lɔ ë ciɛɛŋ de Nhialicic ë week.

³² Jɔn ë bɛ̈n tëde week ë kueer ë piathëpiɔ̈u, ku rɛɛckï gam, ku gäm kɔc ë athölbö tɔ kut ayï akɔɔrröör, ku week, të cä wek e tïŋ, ke wek kën wepiɔ̈ɔ̈th bɛ puk, abäk gam.

Kääŋ de Raan de Dom ku Kɔc cï Kuɛ̈i Dom

³³ Piɛŋkï kääŋ däŋ an, “Raan anu ke ye bɛ̈ny de baai, na wën, ke pith dom ë tim cɔl enap, go geeu ë kal, ku wec të bï mɔ̈u aa dhiim thïn, ku yïk aloocdïït bäär, go kuɛ̈i kɔc bï en aa tiit, ku jɔ keny paan mec.

³⁴ Na wën, acï luɔk de tiim thiɔ̈k, ke toc lïïmke tuc ke kɔc ë dom tiit an, bïk ka cï luɔk nööm tëde keek.

³⁵ Na wën, ke kɔc ë dom tiit ke ke dɔm lïïmke, duikï tök, ku näkkï tök, ku biöökë tök ë kur.

³⁶ Na wën, ke be lïïm kɔ̈k tooc, lïïm juëc awärkï kɔc awään, gokï luöi keek acït man awään.

³⁷ Na wën, ciëën, ke tuc wënde keek, lueel an, ‘Abïk wëndï riëëu.’

³⁸ Ku të cïï kɔc ee dom tiit wënde tïŋ, ke luelkï kapäc an, ‘Wën bï käŋ lɔ̈ɔ̈k lak kï, bäk näkku, agoku këdɛn an, bï lɔ̈ɔ̈k lak, agoku nööm bïï aa këda!’

³⁹ Gokï dɔm, cuɛtkï biic domic, ku näkkï.

⁴⁰ Na miäk, abɔ̈ bɛ̈ny de dom, bï ŋö luöi kɔc ë dom tiitë?”

⁴¹ Gokï lueel an, “Abï ke nɔ̈k ë näŋ tuc, kek kɔc racpiɔ̈ɔ̈thë, ago domdɛn ë enap tääu ë kɔc kɔ̈k cin, kɔc bï dom aa tiit, kɔc bï yen aa yiɛ̈n mïth ke tiim ëkööldɛn ee kek luɔk.”

⁴² Go Yecu ke yɔ̈ɔ̈k an, “Kɛ̈nkï kɔn kueen ë kacïgɔ̈ɔ̈r yiic anandun an, ‘kuur cïï kɔc yïk alooc rɛɛc, Yen guöp aye tɔ ye kuur ë aguk nɔm, Ee luɔi de Bɛ̈nydït ee kënë, ku ye kën ë wo tɔ gäi!’

⁴³ Yen a yɔ̈ɔ̈k ɛn week an, “Ciɛɛŋ de Nhialic abï nyaai tëde week, ago gam jur däŋ, jur ë luɔk ë mïth röŋ në yen.”

⁴⁴ Ku raan bï lööny ë kuurë nɔm abï dhuɔŋ, ku raan bïï kuurë lööny ë yenɔm, abï mot abï ciët abuui.

⁴⁵ Na wën, ke bänydït ke ka ke Nhialic kekë Parithai, të cï kek kääŋë piŋ, ke ke ŋic nɔn jiɛɛm en ë këden.

⁴⁶ Na wën, akɔɔrkï döm dɔm kek en, ke ke riɔ̈c ë kuut ë kɔc, ë luɔi ee kek ë tɔ ye tiët.