Math 20 - JAM DE NHIALIC 2011

Kɔc Lui Domic

¹ Ciɛɛŋ de paannhial athöŋ ke raan ee bɛ̈ny de baai, raan cï riɛɛl biic miäk ëtɛ̈ɛ̈n, le kɔc kɔɔr, kɔc bï luui ë wëu ë domde yic, dom ë tim cɔl enap.

² Na wën, aacï wëu giim kekë kɔc lui an, “Kööl tök ke raan abï dɛ denariɔn tök, (yen acït gïrïïc kadiäk), ke ke tɔ lɔ domic.

³ Go bɛ lɔ biic të cït thaar kadiäk aköl, ku tïŋ kɔc kɔ̈k akɛ̈ɛ̈ckï ë thuuk thok, ke ke cïn nïïm luɔi,

⁴ go ke yɔ̈ɔ̈k an, “Lakï domic ayadäŋ ke we bä miɔɔc në kapiɛth. Gokï lɔ.

⁵ Na wën, ke be lɔ biic të cït thaar kadhetem aköl, ayï të cït thaar kadhetem, ku jɔ looi ke cït kën awën.

⁶ Na ɣɔn thëën, të cït thaar kathiëër ku tök aköl, ke lɔ biic, le ku yök kɔc kɔ̈k akɛ̈ɛ̈ckï ke ke cïn nïïm luɔi, go ke thiëëc an, ‘Eeŋö kääc wek eenë ëcaŋawën, ke we cïn nïïm luɔi?’

⁷ Gokï bɛ̈ɛ̈r an, “Ee luɔi cïn en raan cï wo tɔ lui wëu. Go ke yɔ̈ɔ̈k an, “Lakï domic week, ke we bï miɔɔc ë këpiɛth.

⁸ Na wën, acï akɔ̈l lɔ piny, ke bɛ̈ny de dom yöök wukilde an, ‘Cɔl kɔc lui, ku gämë keek ariöpden, abä gɔl në kɔc ë bɔ̈ ciëën, le guööt ë kɔc ë bɔ̈ tueŋ.’

⁹ Na wën, ke kɔc ë ke bɔ̈, kɔc wën ë cak luɔi të cït thaar kathiëër ku tök, ku jɔ ke gäm denariɔn tök raan ëbɛ̈n.

¹⁰ Na wën, ke kɔc ë kɔn lɔ ë luɔi yic ke ke bɔ̈, ayek lueel ë kepiɔ̈ɔ̈th an, bïï ke miɔɔc në kë wär këde kɔc awën, go ke gäm denariɔn tök tei raan ëbɛ̈n.

¹¹ Na wën, acïk kaken nööm, ke ke dok ë ke yäc në bɛ̈ny de baai.

¹² Luelkï an, ‘Kɔc ë bɔ̈ ciëën aake lui ë thaar tök tei, ku acï ke kiëët ë wook, wok kɔc cï akɔ̈l guum, ayï tuöc de piny!’

¹³ Go bɛ̈ɛ̈r, yöök raan tök ë keek an, ‘Mäth, yïn kɛ̈n cam, ë wo kën jam giim wën në këde denariɔn tök?

¹⁴ Nöm këdu, ku lɔ, yɛn de piɔ̈u luɔi bän raan ë bɔ̈ ciëën miɔɔc, acït man miaac ɛn yïn aya.

¹⁵ Kënë päl ɛn nɔn bän kë nu ë yapiɔ̈u looi në kakï? Ku cï tiɛɛl yï dɔm, në baŋ de piath ë yɛn piɔ̈u?”’

¹⁶ Yen tëde ka, kɔc ë bɔ̈ ciëën abïk wɛɛn tueŋ, ku wëën kɔc ë bɔ̈ tueŋ ciëën. Kɔc cï cɔɔl ajuëckï, ku kɔc cï lɔc alikï.

Yecu Ajam në Jam de Diäk ë Biäk ë Thonde

¹⁷ Na wën, aa ciɛth ke lɔ Jeruthalem, ke Yecu cɔl kɔcpiööcë kathiëër ku rou, ku yöök keek an,

¹⁸ “Tiëŋkï, wo lɔ Jeruthalem, ku Wën ë Raan abï nyiën bänydït ke ka ke Nhialic ku kɔc ee löŋ gɔ̈ɔ̈r. Ku abïk yiëk yeth gääk, ke bïï nɔ̈k,

¹⁹ ku yïnkï Juöör lek geet, ku lek dui ë waat, ku lek piäät ë tim cï rïïu nɔm kɔ̈u, ku ëkööl ee kek diäk abï rɔt bɛ jɔt.”

Thiëc de Man Wɛ̈ɛ̈t ke Dhebedayo

²⁰ Na wën, ke man wɛ̈ɛ̈t ke Dhebedayo bɔ̈ të nu yen kekë wɛ̈ɛ̈tke, bïï ku tuk emiɔl ë yenɔm, ade kë kɔɔr tëde yen.

²¹ Ago thiëëc an, “Eeŋö kɔɔr?” Go lueel an, “Tɔ wɛ̈ɛ̈tkiënë kaarou rëër ë ciɛɛŋdu yic, tök ë baŋ cuënydu, ku tök ë baŋ camdu.”

²² Go bɛ̈ɛ̈r an, “Wek kuc ke liɛpkï. Duɛ̈ɛ̈rkï dek lëu ë bïny bän dek ë ye, ku duɛ̈ɛ̈rkï baptith lëu baptinh bï a baptith?” Gokï bɛ̈ɛ̈r an, “Aduëërku lëu.”

²³ Go ke yɔ̈ɔ̈k an, “We bï dek ë bïnydï në yic, ku we bï baptith ë baptinh cï a baptith, ku rëër ë baŋ cuënydï ku baŋ camdï acie këdiën bä yiɛ̈n kɔc, ee këde kɔc cïï wäär kɔn lueel an, bï aa këden.”

²⁴ Na wën, acï kɔc kathiëër e piŋ, ke ke diu piɔ̈ɔ̈th ë wɛ̈ɛ̈tkë kaarou.

²⁵ Go Yecu ke cɔɔl të nu yen kedhie, ku lueel an, “We ŋic bänydït ke Juöör, ayek kɔckɛn cieŋ ë ciɛɛŋ ril, ayï kɔckɛn dït, ayek keek cieŋ.

²⁶ Ku acïï bï tɔ̈u aya në weyiic: ku raan ëbɛ̈n raan kɔɔr luɔi bï en dït ë weyiic, ë tɔ rɔt ë raan ë kakun looi,

²⁷ ku raan ëbɛ̈n raan kɔɔr luɔi bï en lɔ tueŋ ë weyiic, ë tɔ rɔt ë lïmdun,

²⁸ cït man ë Wën ë Raan, aa cïï bɔ̈ luɔi bï yen aa luöi käŋ, ee luɔi bï en ka ke kɔc aa looi, yen aa bï yen, ku luɔi bï en wëike gam ë wëër bï en kɔc juëc wɛ̈ɛ̈r bei.”

Yecu Atɔ Cöör Kaarou Dem

²⁹ Na wën, aa jëlkï ë Jeriko, ke kuany cök ë kut dïït ë kɔc.

³⁰ Ku de cöör kaarou rɛ̈ɛ̈r ë kueer këc, na wën, acïk e piŋ nɔn tëëkë Yecu kueer, ke ke cöt an, “Tɔ yïpiɔ̈u kok we wook, yïn Bɛ̈nydït, wën ë Debid!”

³¹ Ago ke jɔ̈ɔ̈ny ë kut ë kɔc an, miɛmkï, agokï cööt awär cɔ̈t awën, luelkï an, “Tɔ yïpiɔ̈u kok we wook, yïn Bɛ̈nydït, wën ë Debid!”

³² Go Yecu keek thiëëc an, “Eeŋö kaarkï kë bä luöi week?”

³³ Gokï lueel an, “Bɛ̈nydït, ë luɔi bï yïn wo liep nyïïn!”

³⁴ Go Yecu piɔ̈u kok kekë keek, ku jɛk kenyïïn, agokï dap yïn ënɔnthiinë, ku kuanykï cök.