Math 2 - JAM DE NHIALIC 2011

Kaman bɔ̈ të lɔ Aköl Amiäk

¹ Na wën, aacï Yecu guɔ dhiëëth ë Betheleɣem de Judaya në akööl ke Ɣerod melik, ke röör pelnïïm ke ke jɔ bɛ̈n të lɔ aköl amiäk, abïkï Jeruthalem,

² bïk ku thiëckï an, “Nu ënou en ë mɛnh wën cï dhiëëth an, ee melik de Judai? Wok ë ciëërde tïŋ të lɔ aköl amiäk, ku wok ë bɔ̈ buk bɛ̈n lam.

³ Na wën, aacï melik Ɣerod ee kënë piŋ, go piɔ̈u diɛɛr, ku diɛɛr Jeruthalem ëbɛ̈n në yen ëtök.

⁴ Na wën, aacï bänydït ke kake Nhialic tɔ kut kenïïm kedhie kekë kɔc ë löŋ gɔ̈ɔ̈r në kɔc yiic, ke ke thiëëc an, “Ee tënou yen bï Kërtho dhiëëth thïn?”

⁵ Agokï bɛ̈ɛ̈r an, “Ee Betheleɣem de Juda, yen acï tiët gɔ̈ɔ̈r ɣɔn alë an,

⁶ ‘Ku yïn Betheleɣem, yïn koor ë bäny ke Juda yiic, Bɛ̈nydït abï bɛ̈n bei në yï yic, Bɛ̈ny bï kɔckiën ë Yithriɛl aa tiit.”’

⁷ Go Ɣerod röör pelnïïm cɔɔl ke kuc kɔc, ku jɔ ke cök ë thiëëc en keek ë akööl ë tulë ciëër.

⁸ Go ke tuɔɔc Betheleɣem, lueel an, “Lak cök ë luɔp wek ee mɛnhthiinë, ku të cä wek ye yök, ke we tɔ ya yïnë thok, ke yɛn duëër bɛ̈n bä bɛ̈n lam ayadäŋ.”

⁹ Na wën, acïk këde melik piŋ, ke ke jël, ku jɔ ke wat ë ciëër wään cïk tïŋ të lɔ aköl amiäk, be ke wat tueŋ, ale yen kɔ̈ɔ̈c ë ɣöt nɔm nhial të nu meth thïn.

¹⁰ Të cï kek ciëër tïŋ, ke ke jɔ piɔ̈ɔ̈th miɛt arëët diitë.

¹¹ Na wën, acïk bɛ̈n ɣöt, ke ke tïŋ mɛnhthiinë kekë Meri man, agokï röt cuat piny, ku lamkï, ku të cï kek wëuken liep nïïm, ke miɔckï ë käŋ, adhääp ayï wal ŋïr, ayï mer.

¹² Na wën, acï ke wɛ̈ɛ̈t ë Nhialic në nyuöthic an, cïkï kenïïm be dhuöny të nu Ɣerod, ke ke jɔ jäl lek paanden tëkkï ë kueer däŋ.

Kat ke lɔ Rip

¹³ Na wën, aa cïk jäl dï, ke tunynhial ë Bɛ̈nydït tul tëde Jothep ke ye nyuöth, lueel an, “Jɔt rɔt, nöm mɛnhthiinë kekë man, kɔt lɔ paan ë Rip, ku tɔ̈uwë ëtɛ̈ɛ̈n aɣet të bän yï yiɛ̈n thok, Ɣerod abï mɛnhthiinë kɔɔr luɔi bï en e nɔ̈k.”

¹⁴ Go rɔ jɔt, ku jɔt mɛnhthiinë kekë man ɣɔn akɔ̈u, jël le Rip,

¹⁵ Ku jɔ tɔ̈u ëtɛ̈ɛ̈n athouwë Ɣerod, luɔi bï jam aa yic jam ɣɔn cïï Bɛ̈nydït lueel në thoŋ de tiët an, “Rip yen acän wëndï cɔɔl thïn.”

Nääk de Mïththiaakäŋ

¹⁶ Na wën, acï Ɣerod ë tïŋ nɔn cï ë geet në röör pelnïïm, go gɔ̈th agönh rac, go kɔc tooc, ku tɔ mïthwät nu Betheleɣem näk kedhie, ayï mïth nu bɛ̈i ruup kedhie, cak në mïth cï runken aa rou ayï mïth lɔ ë kecök, cït man cï en ë cök ë lop en en tëde röör pelnïïm.

¹⁷ Ago kënë guɔ aa yic ke cï lueel ë tiët Jeremia, an,

¹⁸ “Röl aye piŋ ë Rama, Akiëëu ku dhiëëu ku dhuöör dït, Racel ee mïthke dhiëëu, ku reec luŋ lukë ye, luɔi liiu kek.

Bɛ̈n Ciëën në Rip

¹⁹ Na wën, acï Ɣerod guɔ thou, ke tunynhial ë Bɛ̈nydït tul të Jothep ke ë nyuöth ë Rip,

²⁰ Ku yöök an, “Jɔt rɔt, jɔt mɛnhthiinë kekë man, lɔ paan ë Yithriɛl, kɔc wään kɔɔr näŋ nɛ̈k kek mɛnhthiinë acïk guɔ thou.”

²¹ Go rɔ jɔt, ku jɔt mɛnhthiinë kekë man, ku bïk paan ë Yithriɛl.

²² Na wën aacï piŋ nɔn ceŋ Arkeleo piny ë Juda ë nyin ë wun Ɣerodic, ke riɔ̈c ë lɔ ëtɛ̈ɛ̈n, ku acïï Nhialic wɛ̈ɛ̈t tei ë nyuöth, go enɔm bɛ pɔ̈k piny biäk de Galili,

²³ bï ku tɔ̈u pänydït cɔl Nadhareth, luɔi bï jam aa yic jam cï lueel ë tït an, “Abï cɔl raan ë Nadhareth.