Math 18 - JAM DE NHIALIC 2011

Eeŋa Yen Dït?

¹ Ë köölë guöp, ke kɔcpiööcë ke ke bɔ̈ tëde Yecu, bïk ku thiëckï an, “Eeŋa dït ë ciɛɛŋ de paannhialic?”

² Go Yecu mɛnhthiinakäŋ cɔɔl, ku tɛ̈ɛ̈u ë keyiic cil,

³ ku lueel an, “Wek yɔ̈ɔ̈k ëyic an, ‘Të kɛ̈n wek röt puk, abäk ciët mïththiaakäŋ, ke we cïï bï lɔ ë ciɛɛŋ de paannhialic.

⁴ Yen ka, raan ëbɛ̈n raan ë rɔt tɔ koor cït man ë mɛnhthiinë, yen adït ë ciɛɛŋ de paannhial.

⁵ Ku raan dɔm mɛnhthiin töŋ cït ëmɛnhë në rinkï, ke dɔm ɛn,

Thëm de Kërac

⁶ “Ku raan bï mɛnh tök ë mïththiikë yiic tɔ loi kërac, mïth cï a gam, aduëër ŋuän tëde yen, të cï pil ë guär mac ë yeyeth, ku jɔ mou wïïr ë aluŋic.

⁷ Amawoou ë kɔc ke piny nɔm në biäk de ka ye kɔc tɔ loi kërac! Ka ye kɔc tɔ loi kërac abïk dhil bɛ̈n, ku amawoou ë raanë raan ee këdäŋ bɛ̈ɛ̈i kë ye kɔc tɔ loi kërac!

⁸ Ku na yïciin ku nɔn ee yen yïcök, na cï yï tɔ loi kërac, ke tëëmë bei, cuatë wei, luɔi bï yïn lɔ të nu pïïr, acakaa yïn ee ŋɔl ku yï cath we ciin tök, yen aŋuän tëde yïn, në luɔi bï yï cuat mɛɛc many bï dëp aɣet athɛɛr, ke yï cath we cin kaarou ku cök kaarou.

⁹ Ku yïnyin, të cï en yï tɔ loi kërac, ke ŋuöötë bei, ku cuatë wei, luɔi bï yïn lɔ të nu pïïr, ke yï cath we nyin tök, yen aŋuän tëde yïn, në luɔi bï yï cuat ë giɛna de yic mac, ke yï cath we nyïïn kaarou.

Kääŋ de Amɛ̈l cï Määr

¹⁰ Tiëŋkï röt, ke we cïï mɛnh tök ë mïththiikë yiic bï kuöc theek, wek yɔ̈ɔ̈k an, “Tuuckɛn nhial ayek wäär woi nyin ëcaŋɣɔn wäär nu paannhial.

¹¹ Wën ë Raan aa bɔ̈ bï kë cï määr bɛ̈n kony wëi.

¹² Yak lueel wäkdï? Na de raan de thök kabɔt, ku mär tök ë keek roor, ke raanë cïï thök kathiërdhoŋuan ku dhoŋuan bï nyääŋ piny, ku le ë kurdït nïïm, le kë cï määr kɔɔr?

¹³ Ku na të le yen e yök, wek yɔ̈ɔ̈k ëyic an, “Abï piɔ̈u miɛt në biäk de thɔ̈ɔ̈kë awär miɛt mit en piɔ̈u në biäk de thiërdhoŋuan ku dhoŋuan kën määr.

¹⁴ Yen acït Wuöörduön nu paannhial, aliu ë yepiɔ̈u luɔi bï mɛnh tök määr ë mïththiikë yiic.

Mɛnhkui ku Nɔn ee Nyankui cï Wäc

¹⁵ Ku na mɛnhkui, të cï en yï wäc këdäŋ, ke yï lɔ, lɛ̈kë yen kë cï wööc tëdun waarou, të cï en yï piŋ thok, ke we ye wepiɔ̈ɔ̈th jɔ yök wekë mɛnhkui.

¹⁶ Ku të reec en yï piŋ thok, ke yï lɔ wekë raan tök ayï kɔc kaarou, ago jam lɔ gɔk ëbɛ̈n ë cäätɔɔ kaarou ayï diäk.

¹⁷ Ku të reec en keek piŋ thook, ke yï lɛ̈kë ɣön ë Nhialic, ku të reec en ɣön ë Nhialic piŋ thok, ke tɔ cït jur kuc Nhialic tëde yïn ku cït raan ë athölbö tɔ kut.

Kë cï Duut ku Kë cï Dɔ̈k

¹⁸ Wek yɔ̈ɔ̈k ëyic, Të de yen kë bäk duut ë piny nɔm, ke abï duut paannhial, ku të de yen kë bäk dɔ̈k ë piny nɔm ka bï dɔ̈k paannhial.

¹⁹ Wek bɛ yɔ̈ɔ̈k an, “Na de kɔc kaarou ë weyiic kɔc mat kethook ë piny nɔm, në kë bïk lim, ka bï luöi keek në wäär nu paannhial.

²⁰ Ku të nu kɔc kaarou ayï diäk kɔc cï guëër në rinkï, ya ka, ë keyiic cil ëtɛ̈ɛ̈n.”

Kääŋ de Lïm cïn Kokdepiɔ̈u

²¹ Na wën, ke Petero bɔ̈ të nu yen, bï ku thiëëc an “Bɛ̈nydït, bï mɛnhkäi a luöi kërac raandï, ku bä pɔ̈l? Raandhorou?”

²² Go Yecu yɔ̈ɔ̈k an, “Yïn cä yöök an, raandhorou, yïn yɔ̈ɔ̈k an, ee raandhorou raanthiërdhorou.”

²³ Yen athɔ̈ŋ ciɛɛŋ de paannhial kekë melik tök, melik kɔɔr luɔi bï en wëu kueen yiic kekë lïïmke.

²⁴ Na wën, aacï kuɛ̈n gɔl, ke lïm tök bïïyë tëde yen, raan cath ke käny dït arëët, aguum juëc ke jini.

²⁵ Ku të cïn en ke cut en, ke yöök ë bɛ̈nyde an, ‘Bï rɔt ɣaac, yen ku tiiŋde ku mïthke, ku ka cath në yen kedhie, ka bï en ke käŋ cool.’

²⁶ Na wën, ke lïmë cuɛt rɔt piny, ku lɛ̈ŋ an, “Bɛ̈ny, pälë yïpiɔ̈u piny, käŋ kedhie abä ke cuöl yïn.”

²⁷ Go bɛ̈ny de lïmë go piɔ̈u kok kekë yen, ku jɔ pɔ̈l, pɛ̈l kanu.

²⁸ Na wën, ke lɔ biic, yen ee lïmë guöp, le ku yök raan töŋ ë wɛ̈ɛ̈tkɛn ee kek lïïm, raan cath ke känyde, käny baŋ, cït jini tök tei, go dɔm, ku min röl, lueel an, “Cuölë yɛn känydiën cath ke yïn.”

²⁹ Go raan wën ee kek lïïm ëtök go rɔt cuat piny ë yecök, ku lɛ̈ŋ an, “Pälë yïpiɔ̈u piny, käŋ kedhie abä ke cuöl yïn.”

³⁰ Go cuö gam, go lɔ ku tɛ̈ɛ̈u ë aloocic, aɣët të bï yen käny cool.

³¹ Na wën, ke wɛ̈ɛ̈t kɔ̈k ee kek lïïm, të cï kek kë cï looi tïŋ, ke ke diu piɔ̈ɔ̈th, gokï bɛ̈n ku lëkkï bɛ̈nyden ka cï looi ëbɛ̈n.

³² Na wën, aacï bɛ̈ny e cɔɔl, ke yöök an, “Yïn ee lïm racpiɔ̈u, yïn cä päl ee känydïïtë ëbɛ̈n, në biäk cï yïn a lɔ̈ŋ.

³³ Ku yïn, cïï piɔ̈u duëër dhil kok wekë raanduön aa wek lïïm ëtök, cït man cän piɔ̈u kok wokë yïn?’

³⁴ Go bɛ̈nyde gɔ̈th, ku gëm kɔc ë kɔc leeŋ wëi, aɣët të bï en käŋ cool kedhie, ka kɛ̈ɛ̈ny tëde yen.”

³⁵ Yen acït kë bï wäär nu paannhial luöi week, të kɛ̈n we röt pɔ̈l wapäc ë wepiɔ̈ɔ̈th thïn, ŋɛk ë mɛnhkënë päl ka cï wööc.