Math 17 - JAM DE NHIALIC 2011

Yecu Acï Waar Guöp

¹ Na wën, aacï nïn lɛɛr kadhetem, ke Yecu nöm Petero, ku Jakop, ku Jɔn mänhë, ku leer keek ë kuurdït nɔm kapäc, kuurdïït bäär,

² go yeguöp puk aye guöp däŋ ë kenïïm, go nyin lɔ riauriau cït man ë akɔ̈l, ku ɣer lupɔde ëwic cït ɣɛɛrëpiny.

³ Na wën, ke Mothe ku Elija ë ke tul tëde keek, ke ke jam ë yen.

⁴ Go Petero bɛ̈ɛ̈r, yöök Yecu an, “Bɛ̈nydït, apiɛth nɔn tɔ̈u wok eenë, të cï yïn gam, ke wo bï kɛ̈ɛ̈t yïk kadiäk ëtënë, tök ee këdu yïn, ku tök ee këde Mothe, ku tök ee këde Elija.”

⁵ Na wën, të ŋoot en ke jam, ke luän ɣer ëwic kum ke piny, ku jɔ röl bɛ̈n ë luätic röl luel en an, “Wëndiën nhiaar kï, wëndiën mit ë yapiɔ̈u arëët, yak kake piŋ!”

⁶ Na wën, aacï kɔcpiööcë e piŋ, ke ke gut kenïïm piny, acïk piɔ̈ɔ̈th päu.

⁷ Go Yecu bɛ̈n, bï ku jiɛk keek, lueel an, “Jatkï röt, duökï riɔ̈c!”

⁸ Të cï kek kenyïïn jat nhial, go ciën raan tïŋkï, ee Yecu etök.

⁹ Na wën, aa bïk piny ë kuurdït nɔm, ë ke lom Yecu thook an, “Duökï de raan lɛ̈kkï kë cäk tïŋ, aɣët të bïï ë Wën ë Raan rɔt jɔt ë kɔc cï thou yiic.”

¹⁰ Go thiëëc ë kɔcpiööcë an, “Eeŋö ye kɔc ë löŋ gɔ̈ɔ̈r e lueel an, “Bï Elija dhil kɔn bɛ̈n?”

¹¹ Go Yecu pɔ̈k nɔm keek an, “Elija abï dhil kɔn bɛ̈n ëyic, ago käŋ bɛ puk tɔ ke piɛth kedhie.”

¹² Ku wek yɔ̈ɔ̈k an, “Elija acï guɔ bɛ̈n, ku akuckï, agokï luöi këde piɔ̈nden ëbɛ̈n. Yen acït guöm bï Wën ë Raan käŋ guum ka bïk luöi yen aya.”

¹³ Ago kɔcpiööcë ŋic nɔn jiɛɛm en në këde Jɔn Baptith.

Yecu Atɔ Mɛnh de Guöp Jɔŋ rac Dem

¹⁴ Na wën, aa cïk bɛ̈n të nu kut ë kɔc, ke raan tök bɔ̈ tëde yen, bï ku tuk emiɔl ë yenɔm, lueel an,

¹⁵ “Bɛ̈nydït, tɔ yïpiɔ̈u kok we wëndï, ade guöp nok, ku acï kiët guöp arac, ee cool ë wïïk mɛɛc, ku cool ë wïïk ë pïïu yiic.

¹⁶ Ku acä yiɛ̈n kɔckuön ë piööcë, ku akënkï lëu ë luɔi bï kek en tɔ dem.”

¹⁷ Go Yecu bɛ̈ɛ̈r an, “Rem cïn gäm oou, rem ë löŋ yalic oou! Bä rëër ë weyiic ë run kadï? Bä kakun guum ë run kadï? Bɛ̈ɛ̈ikï tëde yɛn!”

¹⁸ Go Yecu jɔŋ rac jɔ̈ɔ̈ny, go jäl ë yeguöp, go meth guöp waar ënɔnthiinë guöp.

¹⁹ Na wën, ke kɔcpiööcë ë ke bɔ̈ tëde Yecu kapäc, bïk ku thiëckï an, “Eeŋö kën wok e lëu në ciëc ciëëc wok e bei?”

²⁰ Go ke yɔ̈ɔ̈k an, “Në baŋ de ciën gämdun, ku wek yɔ̈ɔ̈k ëyic an, “Të dɛ wek gäm cït nyin töŋ ë wɛ̈ɛ̈l cɔl matharda, ke we duëër kuurdïïtë yɔ̈ɔ̈k an, ‘Cuɔtë rɔt ciëën ya,’ ku aduëër rɔt cuɔt. Ku acïn kë cäkï duëër looi.

²¹ Ku jɔŋlɛn cït ee kënë ee lɔ biic rɛɛc, ee lɔ̈ŋ etök kekë rɛɛc reec ë raan cäm, yen ee ye lëu.”

Yecu Abe Jam në Biäk de Thonde

²² Na wën, të rëër kek ë Galili, ke ke yöök ë Yecu, an, “Wën ë Raan abï nyiɛɛn yïnë kɔc,

²³ ku abïk nɔ̈k, go rɔt bɛ jɔt ëkööl ee kek diäk.” Agokï piɔ̈ɔ̈th dhiɛɛu wei arëëtdïïtë.

Athölbö ye Kut Luaŋdït

²⁴ Na wën, aa cïk bɛ̈n Kapernaum, ke kɔc ee wëu ke Nhialic tɔ kut ke ke bɔ̈ tëde Petero, bïk ku thiëckï an, “Bɛ̈nydun cïï wëu ke Luaŋdït ee kut?”

²⁵ Go, an, “Ɣɛɛ, aye ke kut.” Na wën, aacï bɛ̈n ɣöt ke Yecu kɔn thiëëc an, “Ye luel wudï, Thimon? Ee yïŋa ee meliik ke pinynɔm kuöt athölbö ayï guaaric? Ee kɔcken, ku ye alɛi tei?”

²⁶ Go Petero bɛ̈ɛ̈r an, “Ee alɛi.” Go Yecu puk nɔm an, “Ku kɔcken acïkï ee kut, cie yen?

²⁷ Ku ënɔɔnë, ke ke cuku bï tɔ diu piɔ̈ɔ̈th, lɔ wïïr, dɛɛnyë alabithɔ, ku nöm rɛ̈c cï kɔn dɔm, ku të cï yïn e liep thok, ke yïn bï rialdït yök. Nöm, ku gämë keek, abï aa këdï yɛn ku këdu yïn aya.”