Math 16 - JAM DE NHIALIC 2011

Kɔc Akɔɔrkï Gök

¹ Na wën, ke Parithai bɔ̈ kekë Thadokai, bïk bɛ̈n them, akɔɔrkï gök bï bɛ̈n nhial.

² Go pɔ̈k nɔm keek an, “Të cï akɔ̈l thëi, ka yak lueel an, ‘Piny abï piath, tënhial acï thiɛth.’

³ Na miäk, ka yak lueel an, ‘Deŋ ajöt ëköölë, tënhial acï thiɛth ku ariëël anu.’ Wek kɔc de yäc aguk, we ŋic nhial woi yic aguɔkï piny ŋic täu bï en tɔ̈u, ku ŋïny bä wek täu de run ŋic adhal week!

⁴ Rem racpiɔ̈u rem ë diëër lei kɔɔr akɔɔr gök, ku acïn gök bï nyuöth en, ee këde tiët Jona tei.” Go ke nyääŋ piny, ku jël.

Luɔu de Parithai ku Thadokai

⁵ Na wën, aacï kɔckɛn ë piööcë ɣet lɔŋtui, ke ke cï kuïn cï pam ruööi.

⁶ Go Yecu ke yɔ̈ɔ̈k an, “Yak röt tiit ë luɔu de Parithai kekë Thadokai.

⁷ Gokï teer kapäc, ku luelkï an, “Ee luɔi kën wok kuïn bɛ̈ɛ̈i, en aa lueel en en.”

⁸ Na wën, aacï Yecu ye ŋic ke ke yöök an, “Wek kɔc dɛk ë gäm, eeŋö tɛɛrkï wapäc, ë luɔi cïn en kuïn cäk bɛ̈ɛ̈i?

⁹ Kɛ̈nkï käŋ guɔ ŋic, ku kɛ̈nkï wenïïm tak në kuïn cï pam kadhïc kekë agum de kɔc kadhïc, ku diööny kadï cäk kuany?

¹⁰ Ayï kuïn cï pam kadhorou kekë agum de kɔc kaŋuan, ku diööny kadï cäk kuany?

¹¹ Eeŋö cä wek e ŋic, nɔn cïï en ee këde kuïn en ë lɛ̈k ɛn e week an, “Bäk röt tiit ë luɔu de Parithai kekë Thadokai!”

¹² Na wën, ke jɔkï ŋic nɔn ë cïï en ke yöök an, bïk röt tiit në luɔu de kuïn, ee wëët en ë lueel, wëët de Parithai kekë Thadokai.

Jam de Petero ë Biäk de Yecu

¹³ Na wën, acï Yecu bɛ̈n piny de Kaitharia Pilipi, ke thiëc kɔckɛn ë piööcë an, “Ye kɔc lueel an, ya ŋa, yɛn Wën ë Raan?”

¹⁴ Gokï lueel an, “Në kɔc kɔ̈k an, Jɔn Baptith, ku në kɔ̈k an, Elija, ku në kɔ̈k, an, Jeremia, ku nɔn ee yen raan töŋ de tït.”

¹⁵ Go ke thiëëc an, “Ku na week, yak lueel an, ya ŋa?”

¹⁶ Go Thimon Petero bɛ̈ɛ̈r an, “Yïn ee Kërtho, Wën ë Nhialic pïïr.”

¹⁷ Go Yecu bɛ̈ɛ̈r, yöök, an, “Thieithieei, yïn Thimon Bar-Jona, acie raan cath kekë rïïŋ ku riɛm en ë nyuth yïn ee kënë ee Wäär nu paannhial.

¹⁸ Ku yïn yɔ̈ɔ̈k, yïn Petero, yïn ee kuur, ku yɛn bï ɣön ë Nhialicdï yïk ee kuurë nɔm, ku acïn riɛl ë paan ë thuɔɔu bï yen tiaam.

¹⁹ Ku yïn bä gäm mukthɛ̈ɛ̈r ke Ciɛɛŋ de paannhial, ku kë bä duut ë piny nɔm, abï tɔ̈u ke cï duut paannhial, ku kë bä lony ë piny nɔm, abï tɔ̈u ke cï lony paannhial, käŋ kedhie.

²⁰ Go kɔckɛn ë piööcë lom thook, ke cïkï bï lɛ̈k raan däŋ nɔn ee yen Kërtho.

Yecu Ajam në Biäk de Nuande ku Thonde

²¹ Ëköölë acï Yecu kɔckɛn ë piööcë gɔl ë nyuuth luɔi bï en dhil jäl le Jeruthalem, ku luɔi bï en kajuëc guum tëde röördït ku bänydït ke ka ke Nhialic, ku kɔc ë löŋ gɔ̈ɔ̈r, ku bï nɔ̈k abï thou, ku bï rɔt bɛ jɔt ëkööl ee kek diäk.

²² Na wën, ke Petero dɔm Bɛ̈ny cin, go jɔ jɔ̈ɔ̈ny an, “Acie yen, Bɛ̈nydït, yïn cïï kënë bï yök anandu.”

²³ Go rɔt puk, ku yöök Petero an, “Waanë rɔt ë yakɔ̈u ciëën, Catan, yɛn cï piɔ̈u rac wokë yïn, yïn kën yïpiɔ̈u tuöm ka ke Nhialic, ee ka ke kɔc tei.”

²⁴ Na wën, ke Yecu yöök kɔckɛn ë piööcë an, “Na de raan de piɔ̈u luɔi bï en a kuany cök, ke nyäŋ rɔt, ku jɔt timdɛn cï rïïu nɔm, ku biɔɔth a cök.

²⁵ Raan ëbɛ̈n raan kɔɔr luɔi bï en wëike kony, ka bï ke mɔ̈ɔ̈r, ku raan ëbɛ̈n raan mär wëike në biäkdï, ka bï ke yök.

²⁶ Të ciɛmë raan piny nɔm ëbɛ̈n, ku mɛ̈ɛ̈r wëike, ke piathde akou? Bï raan ŋö gam wɛɛr en wëike?

²⁷ Wën ë Raan abï bɛ̈n në dhuëëŋ de Wun kekë tuuckɛn nu nhial, ago raan riɔp ëbɛ̈n në kë rɔ̈ŋ në luɔide.

²⁸ Wek yɔ̈ɔ̈k ëyic an, “Ade kɔc kɔ̈k kääc ëtënë, kɔc cïï thuɔɔu bï thiëëp, të ŋoot kek ke kën Wën ë Raan tïŋ abɔ̈ ë ciɛɛŋdeyic.