Math 15 - JAM DE NHIALIC 2011

Wɛ̈ɛ̈t de Kɔc Thɛɛr

¹ Na wën, ke Parithai kekë kɔc ee löŋ gɔ̈ɔ̈r ë ke bɔ̈ të nu Yecu ë Jeruthalem, bïkkï ku thiëckï, an,

² “Eeŋö ye kɔckuön ë piööcë löŋ dhɔ̈ŋic, löŋ cï yiɛ̈n wook ë röördït? Acïkï kecin ee piny, të ciɛm kek kuïn!”

³ Go pɔ̈k nɔm keek, an, “Ku week, eeŋö ya wek löŋ de Nhialic dhɔ̈ŋic aya në löŋduön thɛɛr?

⁴ Acï Nhialic lueel an, “Ye wuur riëëu kekë moor, ku an, ‘Raan ë jam rac lueel ë këde wun ayï man, në thou ë thonde.’

⁵ Ku week ayak lueel an, ‘Raan yöök wun ayï man an, kën adï cï yök tëde yɛn, acä gäm Nhialic,’

⁶ ka cïn kë cï wööc, të cïï en wun ee riëëu ayï man. Yen acä wek jam ë Nhialic tɔ ye ɣɔ̈ric në löŋduön thɛɛr.

⁷ Wek kɔc de yäc aguk, ee yic ee kë lueel Yithaya në këdun an,

⁸ “Jurë ee rɔt cuöt tëthiɔ̈k ke yɛn në keliëp, ku yek a riëëu ë kethook, Ku piɔ̈nden amec kek yɛn.

⁹ Läm lɛm kek ɛn ee këɣɔ̈ric tei, Na wëët ee kek kɔc wɛ̈ɛ̈t ë lööŋ ke kɔc tei.

Kake ee Raan tɔ Rac

¹⁰ Na wën, acï kut ë kɔc cɔɔl, ke yöök keek, an, “Piɛŋkï, a bäk yök ë wepiɔ̈ɔ̈th,

¹¹ an, kë ye lɔ ë raan thok acie yen ee raan tɔ rac, ee kë ye bɛ̈n bei ë raan thok, yen aye raan tɔ rac.”

¹² Go kɔckɛn ë piööcë bɛ̈n të nu yen, bïk ku yöökkï an, “Ŋic nɔn cï Parithai piɔ̈ɔ̈th diu, wën cï kek jamë piŋ?”

¹³ Go bɛ̈ɛ̈r an, “Wäl ëbɛ̈n wɛ̈ɛ̈l kënë piith ë wäär nu paannhial abï wöth bei kekë meeide.

¹⁴ Pälkï keek, ayek cöör thel cöör. Ku të thelë cɔɔr, cɔɔr ka bïk lööny ë adhumic keek kaarou.”

¹⁵ Go Petero bɛ̈ɛ̈r an, “Wɛ̈ɛ̈rë wook kääŋë thar.”

¹⁶ Go Yecu lueel an, “Ŋuɔɔtkï ke we cïï käŋ ŋic ayadäŋ?

¹⁷ Ŋuɔɔtkï ë we kuc cöökë an, “Këdäŋ ëbɛ̈n ke lɔ ë raan thok ë jɔ lɔ yiëëc, ke jɔ cuat biic.

¹⁸ Ku ka bɔ̈ bei ë raan thok ayek bɛ̈n bei ë raan piɔ̈u, ku keek aye raan tɔ rac.

¹⁹ Kak ee bɛ̈n bei ë raan piɔ̈u kï, karɛc ee raan ke tak, näŋ de raan, kɔ̈ɔ̈r ë diëër lei, dhööm, kuël, ciëkë thok, lɛ̈ɛ̈t rac.

²⁰ Kak ee raan tɔ rac ka, ku cäm ciëmë raan ke kën e cin piny, acïï yen ee tɔ rac.”

Gäm de Tik

²¹ Go Yecu jäl ëtɛ̈ɛ̈n, le piny biäk de Tayer kekë Thidon.

²² Na wën, ke tik bɔ̈ ë piny biäkë, tiiŋ de Kanaan, bï ku cööt an, “Tɔ yïpiɔ̈u kok we yɛn, Bɛ̈nydït, Yïn Wën ë Debid, nyandï acïï jɔŋ rac dɔmë döm rac.”

²³ Ku acïn kë cï bɛ̈ɛ̈r, acakaa jam tök aliu. Go kɔckɛn ë piööcë bɛ̈n ku läŋkï an, “Ciec, akuany wocök ke cöt!”

²⁴ Go bɛ̈ɛ̈r an, “Yɛn aa cïï tucë kɔc kɔ̈k, yɛn a tucë amɛ̈l cï määr amɛ̈l ke baai de Yithriɛl tei, keek kapäc.”

²⁵ Na wën, ke tik bɔ̈ ku lɛm an, “Bɛ̈nydït, kony ɛn.”

²⁶ Go bɛ̈ɛ̈r an, “Acïï piɛth të nööm wok kuïn ë mïth, ku dënyku jɔ̈k.”

²⁷ Go lueel an, “Ee yic, Bɛ̈nydït, ku jɔ̈k ayek cam në kak athueithuei cï lööny piny të ye bänyken cam thïn.”

²⁸ Go Yecu puk nɔm an, “Yïn ë tiiŋë, gämdu adït, yïn cï këde piɔ̈ndu yök.” Go nyande guöp waar ë thaar manë guöp.

Yecu Atɔ Kɔc Juëc Dem

²⁹ Go Yecu jäl ëtɛ̈ɛ̈n, le tëthiɔ̈k ke Baar ë Galili, go lɔ ë kuurdït nɔm, le ku le nyuc piny ëtɛ̈ɛ̈n.

³⁰ Go kuut dït ke kɔc bɛ̈n të nu yɛn, aciɛthkï në aduɛɛny, ku cöör, ku mïŋ, ku ŋöl, ku kɔc juëc kɔ̈k, agokï ke tääu piny ë Yecu cök, go ke tɔ dem,

³¹ arëk abï kut ë kɔc gäi, të cï kek mïŋ tïŋ ajamkï, ku tïŋkï ŋöl acïk piath, ku aduɛɛny aciɛthkï, ku cöör adɛɛikï gokï Nhialic de Yithriɛl leec.

Yecu Aciëëm Kuutdïït ë Kɔc Kɔ̈k

³² Go Yecu kɔckɛn ë piööcë cɔɔl, ku lueel an, “Yɛn ë piɔ̈u kok wokë kut ë kɔc, ë luɔi cï kek tɔ̈u në yɛn ënɔɔnë ë nïn kadiäk, ku acïn kë cïk cam, ku luɔi bän keek tɔ jël ë cɔk aliu ë yapiɔ̈u, ke ke cïï cɔk bï tiaam kueer.”

³³ Go kɔcpiööcë thiëëc an, “Buk kuïn dït yök tënou ë jɔ̈ɔ̈ric, kuïn bï kut dïït pëk ëtɛ̈ɛ̈n tɔ kueth?”

³⁴ Go Yecu ke thiëëc an, “Ee kuïïn cï pam kadï kek cath në week?” Gokï bɛ̈ɛ̈r an, “Ayek dhorou, ku rec thii töktöök.”

³⁵ Go Yecu kut ë kɔc yɔ̈ɔ̈k bïk nyuc piny.

³⁶ Na wën, ke nöm kuïïn cï pam kadhorou, ku rec, ku jɔ lëk Nhialic thieithieei, ku wɛ̈ɛ̈k ke yiic, ku gëm keek kɔckɛn ë piööcë, go kɔcpiööcë ke yiɛ̈n kut ë kɔc.

³⁷ Gokï cam kedhie abïk kuɛth, ku kuanykï kak athueithuei cï lööny piny ka cïï kɔc both, ku thiäŋkï diööny kadhorou.

³⁸ Ku kɔc wën cï cam ayek agum kaŋuan ke röör, ku nu diäär ku mïth ayadäŋ.

³⁹ Na wën, ke tɔ kut ë kɔc jël, ku le e abëlic, ago bɛ̈n piny ë Magadan thok.