Math 14 - JAM DE NHIALIC 2011

Thon de Jɔn Baptith

¹ Ɣɔn ë aköölkë, ke Ɣerod bɛ̈ny ë piŋ rin ke Yecu,

² go bänyke yɔ̈ɔ̈k an, “Raanë ee Jɔn Baptith, acï rɔ jɔt ë kɔc cï thou yiic, yen a looiyë luɔi rilkë në yen.”

³ Ɣerod aacï Jɔn dɔm, ku duut, go tääu ë aloocic në biäk de Ɣerodiath, tiiŋ de Pilip mänhë.

⁴ Acï Jɔn lɛ̈k en an, “Akënë päl yïn, luɔi bï en rëër ke yïn.”

⁵ Ku aa de piɔ̈u luɔi nɛ̈k en en, ku aa riɔ̈c ë kut ë kɔc tei, aye kɔc tɔ ye tiët yen Jɔn.

⁶ Na wën, acï akööl ë dhiëëthë Ɣerod tɔ ye aliith, ke nyan ë Ɣerodiath cɔ̈ŋ ë kɔc nïïm, go Ɣerod piɔ̈u miɛt.

⁷ Na wën, ke lëk en lëk gutguut an, “Na de kë bä lip, ka bä gam yïn!”

⁸ Ku nyanë, të cï ë kɔn wɛ̈ɛ̈t ë man, ke lueel an, “Gämë yɛn nɔm de Jɔn Baptith ee tënë ë atɛ̈nyic!”

⁹ Na wën, ke melik dhiau piɔ̈u, ku në baŋ de gutguut wën cï lueel, ku në baŋ de kɔc rɛ̈ɛ̈r ë yen ëtök tëde cäm, ke yöök, an, bï gam en.

¹⁰ Go raan tooc, an le Jɔn kiɛp nɔm wei ë aloocic.

¹¹ Go nɔmde bɛ̈ɛ̈i atɛ̈nyic, gɛ̈më duet, go jɔ lɛɛr të nu man.

¹² Go kɔckɛn ë piööcë bɛ̈n, bïk ku nömkï guöp, lek tɔ̈ɔ̈u, na wën, ke ke jɔ lɔ lek lɛ̈k Yecu.

Yecu Aciëëm Kuutdïït ë Kɔc

¹³ Na wën, acï Yecu ë piŋ ke jël ëtɛ̈ɛ̈n ë abël, le ë jɔ̈ɔ̈ric ëtök, ku të cï kuut ke kɔc ë piŋ, ke biɔthkï cök, ke ke bɔ̈ bei ë wuötiic aciɛthkï ë kecök.

¹⁴ Go Yecu lɔ biic, ku tïŋ kut dïït ë kɔc, ago piɔ̈u kok ke keek, ku tɔ kɔc dem kɔc tök ë keyiic.

¹⁵ Na ɣɔn thëën, ke kɔckɛn ë piööcë ë ke bɔ̈ tëde yen, bïk ku luelkï, an, “Ëtënë ee jɔ̈ɔ̈ric, ku akɔ̈l ë guɔ thëi, yɔ̈ɔ̈kë kut ë kɔc, an, bïk jäl, lek ë bɛ̈i yiic, lek rö ɣɔ̈c këcam.”

¹⁶ Go Yecu ke yöök an, “Acïkï bï dhil jäl, week, miackï keek ë këcamkï.”

¹⁷ Gokï lueel an, “Wok de kuïïn cï pam kadhïc tei ee tënë, ku rec kaarou.”

¹⁸ Go lueel an, “Yiënkï ke yɛn.”

¹⁹ Go kut ë kɔc yɔ̈ɔ̈k an, “Bïk nyuc ë wal nïïm, ku nöm kuïïn cï pam kadhïc, ku rec kaarou, go nhial lieec, ku lueel, an, “Thieithieei, go kuïïn wääk yiic, ku gëm ke kɔcpiööcë, go kɔcpiööcë ke gäm kut ë kɔc.

²⁰ Gokï cam kedhie, abïk kuɛth. Ku kuanykï ka lɔ thueithuei, ka cï kɔc both, agokï diööny thiɔ̈ɔ̈ŋ kathiëër ku rou.

²¹ Kɔc wën cäm aake cït agum kadhïny de röör, ku nu diäär ku mïth ayadäŋ.

Yecu Acath ë Pïïu Nïïm

²² Na wën, ke Yecu dhil kɔckɛn ë piööcë tɔ lɔ ë abëlic ënɔnthiinë, bïk lɔ lɔŋtui ë yenɔm tueŋ, të löök en kuut ke kɔc tɔ jël.

²³ Na wën, acï kuut ke kɔc tɔ jël, ke lɔ nhial ë kuurdït nɔm ëtök, le lɔ̈ŋ. Na ɣɔn thëën, ke tɔ̈u ëtɛ̈ɛ̈n ëtök.

²⁴ Ku nu abël ë wɛ̈ɛ̈ric cil ënɔɔnë, ë lɔ jäŋjäŋ në apiöök, apëën yom.

²⁵ Na wën, të kɔɔrë piny nɔn ŋeep en rɔt, ke Yecu lɔ të nu keek ke cath ë pïïu nïïm.

²⁶ Na wën, acï kɔcpiööcë ye tïŋ ke cath ë pïïu nïïm, ke ke päu piɔ̈ɔ̈th, agokï lueel, an, “Ee jɔk,” agokï kiu në riɔ̈ɔ̈c.

²⁷ Go Yecu jam ke keek ënɔnthiinë, lueel an, “Pälkï röt piny, ee yɛn, duökï riɔ̈c!”

²⁸ Go Petero puk nɔm an, “Bɛ̈ny, tën ee yen yïn, ke yï yöök ɛn ke ya bï lɔ tëde yïn ë pïïu nïïm.”

²⁹ Go lueel an, “Bä. Na wën, acï Petero bɛ̈n biic ë abëlic, ke cath ë pïïu nïïm, an, le tëde Yecu.

³⁰ Na wën, acï yom tïŋ adït, ke riɔ̈c, go duɛ̈ɛ̈r dïïr, ku jɔ cööt, an, “Bɛ̈nydït, luäk ɛn.”

³¹ Go Yecu ecin riny ënɔnthiinë, dɔm, ku yöök an, “Yïn ee raan dɛk ë gäm, eeŋö ë yïn piɔ̈u wïl ë kaamic?”

³² Na wën, acïk bɛ̈n abëlic, ke yom kääc.

³³ Go kɔc nu ë abëlic bɛ̈n bïk ku lamkï, luelkï an, “Ee yic, yïn ee Wën ë Nhialic.”

Yecu Atɔ Kɔc de Gup Juäi Waar në Genetharet

³⁴ Ku të cï kek ɣet lɔɔk, ke ke bɔ̈ piny de Genetharet.

³⁵ Na wën, acï kɔc ke paanë e ŋic, ke ke tooc kɔc ë pinyë nɔm ëbɛ̈n, lek kɔc tök bɛ̈ɛ̈i të nu yen kedhie,

³⁶ agokï lɔ̈ŋ nɔn bï kek lupɔde jak thok tei, go kɔc ëbɛ̈n kɔc ë jak en agokï gup waar ëliŋliŋ.