Math 13 - JAM DE NHIALIC 2011

Kääŋ de Raan Cum

¹ Ëköölë guöp, ke Yecu jël ɣööt, le nyuc ë wɛ̈ɛ̈r yɔu.

² Na wën, acï kuut dït ke kɔc guëër të nu yen, ke lɔ ë abëlic, le ku nyuc, ku kääc kut ë kɔc biic ëbɛ̈n.

³ Go ke lɛ̈k kajuëc në kɛ̈ŋ, ku lueel an, “Tiëŋkï, raan ë lɔ domic le com.

⁴ Ku të wën cum en, ke kɔ̈th kɔ̈k ë ke lööny ë kueer këc, go diɛt bɛ̈n ku thölkï keek ë cäm.

⁵ Ku lööny kɔ̈th kɔ̈k të nu kur, të cïn tiɔɔm dït, agokï dap goŋ, luɔi cïn en tiɔɔm dït nu.

⁶ Na wën, acï akɔ̈l ruɛl, ke ke biɔɔr, ku yomkï, në baŋ cïn kek mei.

⁷ Ku lööny kɔ̈k ë kuɔɔth yiic, go kuɔɔth cil, ku nyiickï ke.

⁸ Ku lööny kɔ̈k ë tiɔɔm piɛthic, agokï luɔk, kɔ̈k nyin tök abï bɔt bɛ̈ɛ̈i, ku kɔ̈k nyin tök abï thiërdhetem bɛ̈ɛ̈i, ku kɔ̈k nyin tök abï thiërdiäk bɛ̈ɛ̈i.”

⁹ Raan de yïth ee yen ke piŋ, ke piŋ.

Kë Lueel ë Kääŋ

¹⁰ Na wën, ke kɔcpiööcë ë ke bɔ̈, bïk ku thiëckï an, “Eeŋö jiɛɛm yïn we keek ë käŋ?”

¹¹ Go pɔ̈k nɔm keek an, “Week, acï gäm week luɔi bä wek kacïthiaan ŋic ka ke ciɛɛŋ de paannhial, ku akënë gäm keek.

¹² Raan ëbɛ̈n raan de nɔm käŋ, ka bï gäm kɔ̈k, ku abï dɛ kajuëc arëët, ku raan ëbɛ̈n raan cïn nɔm käŋ, acakaa kë cath ke yen abï nyaai tëde yen.

¹³ Yen a jam ɛn wo keek ë kɛ̈ŋ, luɔi dɛɛi kek, ku acïkï daai, ku luɔi pïŋ kek, ku acïkï pïŋ, ku cïkï jam ee yökic.

¹⁴ Jam acï Yithaya caar ɣɔn acï aa yic ë ke yiic, jam ë lueel an, “Të ya wek piŋ, ke we bï aa piŋ, ku we cïï wël bï aa yök yiic anandun. Ku të ya wek daai, ke we bï aa daai, ku we cïï käŋ bï aa gɔɔk anandun.

¹⁵ Kɔckë acïk piɔ̈ɔ̈th guɔ cuai, ku ayek piŋ ë pïŋ ë miŋ ë keyïth, ku acïk kenyïïn niɛɛn, Ke ke cïï bï aa daai ë kenyïïn, ku cïkï bï aa piŋ ë keyïth, ku cïkï wël bï yök yiic ë kepiɔ̈ɔ̈th, Agokï kepiɔ̈ɔ̈th puk, Aguɔ keek tɔ dem.

¹⁶ Ku thieithieei ë wenyïïn, luɔi dɛɛi kek, ku thieithieei ë weyïth luɔi pïŋ kek.

¹⁷ Wek yɔ̈ɔ̈k ëyic an, “Tït juëc ku kɔc piɛthpiɔ̈ɔ̈th juëc acïk kɔɔr ë kepiɔ̈ɔ̈th luɔi bï kek käŋ tïŋ ka wɔikï, ku akënkï ke tïŋ, ku akɔɔrkï luɔi bï kek käŋ piŋ ka piɛŋkï, ku akënkï ke piŋ.

Yecu Awaar Kääŋ de Raan Cum Yic

¹⁸ Jakï kääŋ piŋ kääŋ de raan ë cum.

¹⁹ Të piŋë raan jam de ciɛɛŋ, ku cïï ë yökic, ke jɔŋ dïït rac bɔ̈, ago kë cï com ë yepiɔ̈u gɔp. Kë cï com ë kueer këc ka.

²⁰ Ku kë cï com të nu kur, yen aye raan piŋ jam, go dap gam ënɔnthiinë ke mit piɔ̈u,

²¹ ku acïn meeidɛn nu ë yepiɔ̈u, ee tɔ̈u tëthiinakäŋ tei, na miäk, të cï këril dhal en rɔ cak ayï yöŋ yɔŋ ë ye në biäk de jam, ke jɔ piɔ̈u dap diu.

²² Ku kë cï com ë kuɔɔth yiic, yen aye raan piŋ jam, na wën ke diɛɛr ë ka ke pinyë nɔm, ku mɛth ee juëc de wëu raan math, ke ke nyiic jam, go cïï lok.

²³ Ku kë cï com ë tiɔɔm piɛthic, yen aye raan piŋ jam, ago yökic, go luɔk, kɔ̈k nyin tök abï bɔt bɛ̈ɛ̈i, ku kɔ̈k nyin tök abï thiërdhetem bɛ̈ɛ̈i, ku kɔ̈k nyin tök abï thiërdiäk bɛ̈ɛ̈i.

Kääŋ de Wɛ̈ɛ̈l Roor

²⁴ Go ke lɛ̈k kääŋ däŋ an, “Ciɛɛŋ de paannhial aye thɔ̈ŋ raan cï kɔ̈th piɛth wɛɛr ë domde yic,

²⁵ na wën, të niin ë kɔc, ke raan de ater ke yen bɔ̈, go wɛ̈ɛ̈l röör wɛɛr ë agamɔ yic cil, ku jël.

²⁶ Na wën, aacï agamɔ cil, ku guɛ̈thkï, ke wɛ̈ɛ̈l röör tiëc aya.

²⁷ Go lïïm ke bɛ̈ny de baai bɛ̈n tëde yen, bïk ku thiëckï an, “Bɛ̈ny, kɛ̈në kɔ̈th piɛth wɛɛr ë domdu yic? Wɛ̈ɛ̈l röör ë jɔ bɛ̈n tënou?”

²⁸ Go keek yɔ̈ɔ̈k, an, “Raan de wok ater yen aa loi ee kënë.” Go lïïm thiëëc, an, “De yïpiɔ̈u luɔi bï wok ke lɔ kuɛny bei?”

²⁹ Go jai, an, “Ei, të kuɛ̈ny wek wɛ̈ɛ̈l röör bei, ke we bï agamɔ wöth bei kekë wäl ëtök.

³⁰ Pälkï ë ke cil ëtök kedhie aɣet kööl ë tëm, ku kööl ë tëm, ke yɛn bï kɔc tëm yɔ̈ɔ̈k, an, Kankï wɛ̈ɛ̈l röör kuɛ̈ny bei, ku duötkï keek abï ke nyop, ku dhɛ̈ɛ̈thkï agamɔ ë adhaandï yic.”

Kääŋ de Nyin töŋ de Matharda

³¹ Go ke lɛ̈k kääŋ däŋ, lueel, an, “Ciɛɛŋ de paannhial acït nyin töŋ de matharda, cï raan nööm, ku com domic,

³² ku ye nyin koor ë nyin ëbɛ̈n, ku na miäk, të cï en cil, ke ye gök awär wal kedhie, ago ya tim, aye diɛt nhial bɛ̈n ku yek nyuc ë kërke.”

Kääŋ de Luɔu

³³ Go ke lɛ̈k kääŋ däŋ an, “Ciɛɛŋ de paannhial acït luɔu cï ë tik nööm, go ke liääp kekë aköp wac, cït aduuk kadiäk aɣet të bï en tuak ëbɛ̈n.”

Yecu ee Jam në Kɛ̈ŋ

³⁴ Kake kedhie acï Yecu ke lɛ̈k kuut ke kɔc ë kɛ̈ŋ, ku jam cïnic kääŋ acïn kë cï lɛ̈k keek,

³⁵ luɔi bï jam aa yic, jam cï lueel ë tiët an, “Yɛn bï käŋ lueel ka cï moony të ɣɔn ciɛkë piny.”

Yecu Awer Kääŋ de Wɛ̈ɛ̈l Roor Yic

³⁶ Na wën, acï Yecu kut ë kɔc tɔ jël, ke lɔ ɣöt, go kɔckɛn ë piööcë bɛ̈n të nu yen, bïk ku luelkï an, “Wɛ̈ɛ̈rë wook kääŋ thar, kääŋ ë wɛ̈ɛ̈l röör cï wɛɛr domic.”

³⁷ Go pɔ̈k nɔm keek an, “Raan ë weer kɔ̈th piɛth ee Wën ë Raan,

³⁸ ku dom yen aye piny nɔm, ku kɔ̈th piɛth kek aye mïth ke ciɛɛŋ, ku wɛl röör kek aye mïth ke jɔŋ dïït rac,

³⁹ ku raan de ater raan ë weer keek ee jɔŋdït rac, ku kööl ë tëm yen aye thök de piny de ënɔɔnë, ku kɔc tëm kek aye tuunynhial.

⁴⁰ Acït man cï wɛl röör kuany ku nyop ke mɛɛc, yen abï ciët thök de piny de ënɔɔnë.

⁴¹ Wën ë Raan abï tuuckɛn nhial tooc, ku abïk käŋ kuɛ̈ny bei ë ciɛɛŋdeyic kedhie ka ye kɔc tɔ loi kërac ayï kɔc ë kërac looi.

⁴² Agokï ke cuat ë pul dëpë mac thïn, tɛ̈ɛ̈n abï dhiëëu nu thïn kekë ŋëny de lec.

⁴³ Ë aköölkë kɔc piɛthpiɔ̈ɔ̈th abïk a riauriau cït man akɔ̈l ë ciɛɛŋ de Wuöndenic. Raan de yïth ee yen ke piŋ ke pïŋ!

Kääŋ de Wëu Piɛth cï Thiaan

⁴⁴ Kääŋ däŋ, kï: Ciɛɛŋ de paannhial acït wëu piɛth cï thiaan domic, na wën, acï raan ke yök, ke ke thiɛɛn, ku jël, jɔ ka cath në yen lɔ ɣaac kedhie në miɛt mit en piɔ̈u ke keek, go domë ɣɔɔc.

Kääŋ de Guën cï Läkëläk

⁴⁵ Kääŋ däŋ kï: Ciɛɛŋ de paannhial acït man ë raan ee käŋ ɣaac, raan kɔɔr guën awaŋgur cï läkëläk,

⁴⁶ Na wën, aacï awaŋgur tuc ë ɣööcde arëët yök, ke jël, ku le ka cath në yen ɣaac kedhie, ago awaŋgur ɣɔɔc.

Kääŋ de Bɔi

⁴⁷ Kääŋ däŋ kï: Ciɛɛŋ de paannhial acït bɔi dïït cï tääu wïïr, go rec kith yiic dɔm ëbɛ̈n,

⁴⁸ Na wën, acï thiäŋ, ke thelkï biic ë wɛ̈ɛ̈r yɔu, ku jɔkï nyuc, gokï kapiɛth kuöt ë diööny yiic, ku cuɛtkï karɛc wei.

⁴⁹ Yen abï ciët thök de piny. Tuucnhial abïk bɛ̈n, agokï kɔc racpiɔ̈ɔ̈th pɔ̈c bei në kɔc piɛthpiɔ̈ɔ̈th yiic,

⁵⁰ ku cuɛtkï keek ë pulic pul dëpë mac thïn, tɛ̈ɛ̈n abï dhiëëu nu thïn kekë ŋëny de lec.

Yith ë Piac Bɛ̈n ku Yith Thɛɛr

⁵¹ Go Yecu ke thiëëc an, “Cäk kakë yök yiic kedhie?” Gokï lueel an, “Ɣɛɛ, Bɛ̈nydït.”

⁵² Go ke yɔ̈ɔ̈k, an, “Yen tëde ka, raan ëbɛ̈n raan ë löŋ gɔ̈ɔ̈r raan cï wɛ̈ɛ̈t në këde ciɛɛŋ de paannhial, yen acït raan ee bɛ̈ny de baai, raan ë käŋ bɛ̈ɛ̈i bei në wëuke yiic ayï ka cï piac yök ayï kathɛɛr.”

Yecu acï Rɛɛc ë Nadhareth

⁵³ Na wën, acï Yecu kɛ̈ŋkë thöl, ke jël ëtɛ̈ɛ̈n,

⁵⁴ bï paanden, bï ku wëët kɔc luaŋdɛn ë Nhialic, arëk abïk gäi, ku luelkï an, “Raanë ë yök pɛlënɔmë tënou, ayï luɔi rilë?”

⁵⁵ Cie wën ë atën ë tiim looi en ëraanë? Man cïï cɔl Meri? Ku mïthëkɔcken, cïkï ye yï Jakop, ku Jotheth, ku Thimon, ku Judath?

⁵⁶ Ku nyïïrëkɔcken, cïkï tɔ̈u në wook kedhie? Ku na ëraanë ë yök ee kakë kedhie tënou?

⁵⁷ Gokï piɔ̈ɔ̈th diu në yen. Go Yecu ke yɔ̈ɔ̈k an, “Tiët acïn të cïï yen ee riëëu, ee paande ëtök, ku dhiënde guöp.”

⁵⁸ Ku acïn luɔi ril juëc cï looi ëtɛ̈ɛ̈n në baŋ de rɛɛc reec kek gäm.