Math 12 - JAM DE NHIALIC 2011

Thiëc në Biäk de Thabath

¹ Na wën, ke Yecu lɔ cath ë dum yiic ëkööl ë thabath, ku kɔckɛn ë piööcë acï cɔk ke nɔ̈k, agokï rap gɔl ë dhuŋ, ku camkï ke.

² Na wën, aacï Parithai ke tïŋ, ke ke yöök an, “Tïŋ, kɔckuön ë piööcë aloikï kë cï pɛ̈n kɔc ëkööl ë Thabath!”

³ Go ke yɔ̈ɔ̈k an, “Kɛ̈nkï kueen ë awerekic në kë cï Debid looi, ɣɔn nɛ̈kë cɔk en, ayï kɔc cath në yen,

⁴ luɔi le yen ɣön ë Nhialic, le ku ciɛm kuïn cï pam ɣeric cï gäm Nhialic, ku akënë päl en luɔi duëër en ke cam, ayï kɔc cath në yen, ee ka ke bäny ke ka ke Nhialic kapäc?

⁵ Ku kɛ̈nkï kueen ë löŋic ayadäŋ an, “Ëkööl ë Thabath bäny ke ka ke Nhialic bäny nu Luaŋdït ayek löŋ de Thabath dhɔ̈ŋic, ku acïn kë yek wööc?

⁶ Ku wek yɔ̈ɔ̈k an, Raan kï eenë, raan wär Luaŋdït ë dït?

⁷ Ku tëë we cï jamë ŋic thar an, “Ee kokdepiɔ̈u yen kaar, ku acie kë bï nɔ̈k yen kaar, adï kɛ̈nkï kɔc jɔ̈ɔ̈ny kɔc cïn kë cïk wööc.

⁸ Wën ë Raan ee Bɛ̈nydïït ë Thabath aya.”

Raan cï Ciin Riɔu

⁹ Na wën, acï jäl ëtɛ̈ɛ̈n, ku le ɣön ë Nhialic,

¹⁰ ku ade raan cï cin riɔu ëtɛ̈ɛ̈n. Gokï thiëëc an, “Cï päl kɔc an, bïk kɔc aa tɔ dem ë akööl ke Thabath?” Kɔɔr kek luɔi bï kek e gaany.

¹¹ Go ke yɔ̈ɔ̈k an, “Ee raanou nu ë weyiic, raan de amäl tök, ku të lööny en ë adhum thuthic ëkööl ë Thabath, ke cïï bï dɔm, ku jöt bei?

¹² Ku piath ë raan awär piath ë amääl aläl? Yen tëde ka, luɔi ee raan këpiɛth looi aye päl kɔc ë kööl ke Thabath.

¹³ Na wën, ke yöök raan an, “Riɛnyë yïcin tueŋ.” Go riɛny tueŋ, ago bɛ piath acït ciindɛn däŋ.

¹⁴ Go Parithai lɔ biic, lek löŋ guiir kapäc në këde, në luɔi bï kek e nɔ̈k.

Awun cï Lɔc në Nhialic

¹⁵ Na wën, acï Yecu e ŋic, ke ric rɔt ëtɛ̈ɛ̈n, ago kuany cök ë kuut dïït ke kɔc, go ke tɔ dem kedhie,

¹⁶ ku jɔ ke lom thook, ke cïkï bï tɔ ŋic kɔc,

¹⁷ luɔi bïï jam aa yic jam ë lueel tiët Yithaya ɣɔn an,

¹⁸ “Tiëŋkï awundï, raan cä lɔc, Mɛnhdiën nhiaar, yɛn mit piɔ̈u wokë yen, Wëikï abä ke tääu ë yeguöp, ku abï löŋ yic guiëër juöör.

¹⁹ Acï bï aa teer, ku cie cööt, ku acïn raan bï e piŋ röl ë kuɛɛr yiic.

²⁰ Aruöör cï nyiɛɛcic acïï bï dhoŋ kɔ̈u, ku alanh tol acïï bï tɔ liu, Aɣet të bï en guiëërëlöŋ tɔ bɔ̈, ago tiam.

²¹ Ku rinke abï juöör ke aa ŋɔ̈ɔ̈th.”

Yecu ku Beeldhebub

²² Na wën, ke raan de guöp jɔŋ rac bïï yë të nu yen, ku ye cɔɔr, ku cïn ethok të jam, ago tɔ dem, arëk abï raan wën cï cɔɔr ku cïn ethok të jam abï jam ku dɛɛi.

²³ Go kut ë kɔc gäi kedhie, luelkï an, “Cie Wën ë Debid ee kënë?”

²⁴ Na wën, aacï Parithai e piŋ, ke luelkï, an, “Raanë ee jɔɔk rac ciëëc bei në riɛl ë Beeldhebub tei, yen bɛ̈nydïït ë jɔɔk rac.”

²⁵ Go Yecu kë cïk tak ŋic, ku yöök keek an, “Ciɛɛŋ ee gɔ̈m etök ee riääk abï aa jɔ̈ɔ̈ric, ku pänydït ayï ɣöt, të gɔ̈m en etök, ka cïï bï kɔ̈ɔ̈c,

²⁶ ku Catan, të cï en Catan ciëëc bei, ka ye gɔ̈m etök, bï ciɛɛŋdɛn cieŋ jɔ kɔ̈ɔ̈c adï?

²⁷ Ku të ciëëc ɛn jɔɔk rac bei në riɛl ë Beeldhebub, ku na mïthkun, yek ke ciëëc bei në ŋa? Yen abï kek aa bänykuön ë week jɔ̈ɔ̈ny.

²⁸ Ku tën aa yɛn jɔɔk rac ciëëc bei në Wëi ke Nhialic, ke ciɛɛŋ de Nhialic acï bɛ̈n tëde week.

²⁹ Duëër raan lɔ ɣön ë raan ril adï, le ku yiɛk kake, të ŋoot en ke kën raan ril kɔn duut? Aduëër kɔn duut ku jɔ ɣönde yak.

³⁰ Raan reec mät ke yɛn, ka de ater ke yɛn, ku raan reec kuëny kekë yɛn ëtök, ka thiëi käŋ wei.

³¹ Yen aa yɔ̈ɔ̈k ɛn week an, “Kërɛɛc ee kɔc wööc ëbɛ̈n ku lɛ̈t ee kɔc lueel ëbɛ̈n abï päl kɔc, ee lɛ̈t ee kɔc Wëidït ɣer lat etök yen acïï bï päl kɔc.

³² Ku raan lëk Wën ë Raan jam rac, ka bï päl en, ku raan lëk Wëidït ɣer jam rac, ka cïï bï päl en, ayï ë pinyë nɔm, ayï piny bï lɔ̈ɔ̈k bɛ̈n.”

Tim ku Mïthke

³³ Yak tim tɔ piɛth, ku takï mïthke piɛth ayadäŋ, ku be an, “Cäk e tïŋ, ke we tɔ tim nhiany, ku takï mïthke nhiany ayadäŋ, tim aye ŋic në mïthke.

³⁴ Wek mïth ke karɛc, duɛ̈ɛ̈rkï kapiɛth aa lueel adï, ku yak kɔc rac piɔ̈ɔ̈th? Kë ye piɔ̈u thiɔ̈ɔ̈ŋ nɔm yen aye thok lueel.

³⁵ Raan piɛth piɔ̈u ee kapiɛth bɛ̈ɛ̈i bei në kakɛn piɛth nu ë yepiɔ̈u, ku bïï raan rac piɔ̈u karɛc bei në kakɛn rac nu ë yepiɔ̈u.”

³⁶ Ku wek yɔ̈ɔ̈k an, “Jam ɣɔ̈ric ëbɛ̈n jam bï kɔc aa lueel, këden abïk lueel ëkööl ë guiëërëlöŋ.

³⁷ Wëlku kek abï yï tɔ cin yeth gääk, ku wëlku kek abï yï tɔ yïkë yeth gääk.”

Köör de Gök

³⁸ Na wën, ke kɔc kɔ̈k në kɔc ë löŋ gɔ̈ɔ̈r ku Parithai ke bëërkï an, “Bɛ̈ny ee wëët, wok kɔɔr gök buk tïŋ tëde yïn.”

³⁹ Go bɛ̈ɛ̈r ku yöök keek an, “Rem rac piɔ̈u ë diëër lei kɔɔr akɔɔr gök bï tïŋ, ku acïn gök bï gäm en, ee gök ë tiët Jona tei.

⁴⁰ Acït man ë tɔ̈uwë Jona ë rɛ̈c dït yäc ë cool yiic kadiäk ku wɛ̈ɛ̈rwakɔ̈u yiic kadiäk an, “Acït täu bï Wën ë Raan tɔ̈u ë pinyic ë cool yiic kadiäk ku wɛ̈ɛ̈rwakɔ̈u yiic kadiäk.

⁴¹ Kɔc ke Ninebe abïk röt jɔt ëkööl ë guiëërëlöŋ kekë rem de ënɔɔnë, agokï yiëk yeth gääk, acïk kepiɔ̈ɔ̈th puk në guëër cï Jona ke guiëër wël, ku tiëŋkï, raan kï eenë, raan wär Jona.

⁴² Tiiŋ melik nu të lɔ wöuwic abï rɔt jɔt kekë rem de ënɔɔnë ëkööl ë guiëërëlöŋ, ago yiëk yeth gääk, acï bɛ̈n ë piny thar bï pɛl ë Tholomon nɔm bɛ̈n piŋ, ku tiëŋkï, raan kï eenë, raan wär Tholomon.

Bɛ̈n Ciëën de Jɔŋ rac

⁴³ Jɔŋ rɛɛc col, të cï en bɛ̈n bei ë raan guöp, ke cath të cïn pïïu, akɔɔr të bï en lɔ̈ŋ, ku cïï yöök.

⁴⁴ Na wën, ke lueel an, “Yɛn bï a nɔm dhuöny ɣöndiën wään bä yɛn bei thïn. Na wën, aacï bɛ̈n, ke yök akënë ɣap, ku cï napic ku cï yic dikëdik.

⁴⁵ Go lɔ, le jɔɔk kɔ̈k diëc kadhorou jɔɔk wär en ë rac, agokï bɛ̈n, ku lekkï ë raan guöp, ku jɔkï ɣap thïn, ago täu de raanë täudɛn ciëën ago rac awär täudɛn tueŋ wään. Yen abï ciët täu de rem de ënɔɔnë rem rac piɔ̈u.

Man Yecu ku Mïthëkɔcken

⁴⁶ Na wën, të ŋoot en ke jam kekë kut ë kɔc, ke man ku mïthëkɔcken ke ke kääc biic, akɔɔrkï jam bï kek jam ë yen.

⁴⁷ Go raan tök yɔ̈ɔ̈k an, “Tïŋ, moor kï kekë mïthëkɔckun akɛ̈ɛ̈ckï biic, akɔɔrkï jam bï kek jam ë yïn.”

⁴⁸ Go bɛ̈ɛ̈r ku yöök raan jam ke yen an, “Eeŋa ee maar? Ku ee yïŋa ee mïthëkɔckuɔ?”

⁴⁹ Go yecin riɛny tueŋ të nu kɔckɛn ë piööcë, ku lueel an, “Maar kï! Ku mïthëkɔckuɔ kï!

⁵⁰ Raan ëbɛ̈n raan bï këde Wäär piɔ̈u aa looi, Wäär nu paannhial, yen aye mɛnhkäi, ku ye nyankäi, ku ye maar.”