Math 11 - JAM DE NHIALIC 2011

Raan cï Tooc ë Jɔn Baptith

¹ Na wën, acï Yecu kɔckɛn ë piööcë kathiëër ku rou thöl ë wëët, ke jël ëtɛ̈ɛ̈n le kɔc wɛ̈ɛ̈t ku guïïr keek wël ë pɛ̈ɛ̈nykɛndït yiic.

² Ku Jɔn, të cï en luɔi de Kërtho piŋ wään tɔ̈u en ë aloocic, ke toc kɔckɛn ë piööcë kaarou,

³ Lek Bɛ̈nydït thiëëc an, “Ee yïn ë raan wään an, bä bɛ̈n, ku de raan däŋ buk tiit?”

⁴ Go Yecu bɛ̈ɛ̈r, yöök keek an, “Lak lɛ̈kkï Jɔn ka piɛŋkï ku ka tiëŋkï:

⁵ Cöör ayïnkï, ku ŋöl aciɛthkï apiɛth, kɔc de gup wɛth acïk gup waar, mïŋ apïŋkï, kɔc cï thou acï ke jat nhial ka cïk pïïr, ku kɔc kuanynyïïn aye ke guiëër wëlpiɛth.

⁶ Ku thieithieei ë raan cïï bï tɔ diu piɔ̈u në këdï.”

⁷ Na wën, jëlkï, ke Yecu cak jam kekë kut ë kɔc në këde Jɔn an, “Ë we lɔ ë jɔ̈ɔ̈ric lak ŋö tïŋ? Ee aruöör nieŋë yom, yen ë lak tïŋ?

⁸ Ku ë we lɔ biic lak ŋö tïŋ? Ee raan ceŋ lupɔ lɔ nip? Tiëŋkï, kɔc ceŋ lupɔ lɔ nip atɔ̈ukï ë ɣööt ke meliik yiic

⁹ Ku ë we lɔ biic lak ŋö tïŋ? Ee tiët? Yeka, wek yɔ̈ɔ̈k an, Ee raan dïït wär tiët arëët.

¹⁰ Kënë ee raan cï jam gɔ̈ɔ̈r në këde, an, “Tïŋ yɛn toc tunydï ë yïnɔm tueŋ, Raan bï kueerdu looi yic apiɛth të ŋoot yïn wei.”

¹¹ Wek yɔ̈ɔ̈k ëyic an, Në kɔc cï dhiëëth ë diäär, acïn raan cï rɔ jɔt raan wär Jɔn Baptith ë dït, ku raan koor cïn naamde raan nu ë ciɛɛŋ de paannhialic yen adït awär en.

¹² Ɣɔn kɔnë Jɔn Baptith bɛ̈n aɣet cï ënɔɔnë tɔŋ ril aye lɛɛr ciɛɛŋ de paannhial, go kɔc ë tɔŋ lɛɛr ë ruprup agokï ciɛɛŋ rum.

¹³ Tït kedhie ayï löŋ aake ye kaken guiir aɣet të bï Jɔn bɛ̈n.

¹⁴ Ku na dɛkï piɔ̈ɔ̈th nɔn bä wek cöökë gam, ke raanë yen aye Elija, raan wään an, bï bɛ̈n.

¹⁵ Raan de yith ee yen ke piŋ, ke piŋ.

¹⁶ Ku bä rem de ënɔɔnë thɔ̈ɔ̈ŋ ke ŋö? Abä thɔ̈ɔ̈ŋ ke mïththii rɛ̈ɛ̈r ë thuk yiic, ke ke cɔl määthken,

¹⁷ luelkï an, “Wok ë kaaŋ kuöth week, ku wek kën cöŋ, ku wok ë dhiau ë wenïïm, ku wek kën dhuöör.

¹⁸ Jɔn ë bɛ̈n ke ye cäm rɛɛc ku reec dëk, go kɔc lueel an, “Ade guöp jɔŋ rac.”

¹⁹ Wën ë Raan ë bɛ̈n ke ye cam ku ye dek, go kɔc lueel an, “Tïŋ raanë, ee mamïth ku ye raan ë dek ë mɔ̈u arëët, ku ye mɛ̈thë ë kɔc ë athölbö tɔ kut ku kɔc ë kërac looi! Ku Pɛlënɔm aye tɔ ye yic tei në mïthke.”

Pɛ̈ɛ̈nydït cïn Gäm

²⁰ Na wën, ke jɔ pɛ̈ɛ̈nydït jɔ̈ɔ̈ny pɛ̈ɛ̈nydït cï tëdït ë luɔidɛn ril looi thïn, në reec reec kek kepiɔ̈ɔ̈th puk.

²¹ An, “Amawoou në yïn, yïn Karadhin! Amawoou në yïn, yïn Bethaida! Tëë cï luɔi ril looi ë Tayer ku Thidon, cït man cï ke looi ë weyiic, adï cïk kepiɔ̈ɔ̈th puk ɣɔn thɛɛr, ku ceŋkï cual ku rëërkï ë aropic.

²² Ku wek yɔ̈ɔ̈k an, Këtuc bï Tayer yök ayï Thidon acïï bï kït kekë këtuc bäk yök ëkööl ë guiëërëlöŋ.

²³ Ku yïn, Kapernaum, yïn cï jat nhial aɣeet yïn paannhial, ku yïn bï bɛ̈ɛ̈i piny aɣeet yïn paan ë thuɔɔu, tëë cï luɔi ril looi ë Thɔdom cït man cï ke looi ë yïyic, adï cï tɔ̈u aɣet cï ënɔɔnë.

²⁴ Ku yɔ̈ɔ̈k an, Këtuc bï piny ë Thɔdom yök acïï bï kït kekë këtuc bä yök ëkööl ë guiëërëlöŋ.”

Bäär Tënu Yɛn ke Yï bä Gäm Lɔ̈ŋ

²⁵ Ë aköölkë go Yecu bɛ̈ɛ̈r ku lueel an, “Yïn lɛc nɔm, yïn Wäär, Bɛ̈nydït ë paannhial ku piny, ë luɔi cï yïn kakë mɔ̈ny kɔc pelnïïm, ku kɔc de nïïm, ku nyuöthë ke mïththii thuët.

²⁶ Ee yic, Wäär, acï piath tëde yïn aya.

²⁷ Käŋ kedhie acï Wäär ke tääu ë yacin, ku acïn raan ŋic Wënde, ee Wäär etök, ayï Wäär acïn raan ŋic en, ee Wënde etök, ku raan nu ë Wënde piɔ̈u nɔn bï en ë nyuöth en.

²⁸ Bäkï të nuö yɛn, wek kɔc nɛ̈k luɔi ril wedhie, ayï kɔc cï duɔɔny ë kathiek ɣɛ̈ɛ̈ckï, ke we bä gäm lɔ̈ŋ bä wek lɔ̈ŋ.

²⁹ Damkï luɔidï, ku yak röt piɔ̈ɔ̈c ë yɛn, yɛn ŋic rëër ëmääth, ku yɛn ee rɔt tɔ koor, ke we bï lɔ̈ŋ yök ë wepiɔ̈ɔ̈th.

³⁰ Luɔidï ee luɔi cïï ril, ku ke ya gäm kɔc bïk ɣääc ee këpiɔl.”