Malakai 4 - JAM DE NHIALIC 2011

Kööl ë Bɛ̈nydït Abɔ̈

¹ Piɛŋkï kë lueel ë Bɛ̈nydït de rɛm an, “Kööl abɔ̈ ë yic, kööl bï tuöc arëët cït many ë tim cï riɔu. Ee kööl bän kɔc ee kenïïm ɣääc nyuɔp piny kedhie abïk dëp cït man aɣɔ̈l, ayï kɔc ee karɛc looi. Abïk dëp kedhie taitai abï ciën raan tök në keyiic.

² Ku na week, wek kɔc ee rinkï riëëu, wek bä yiɛ̈n piathëpiɔ̈u ku rëër lɔ dïu cït man ye akɔ̈l thok bɛ̈n. Wek bï nïïm lääu, ku miɛtkï piɔ̈ɔ̈th cït man ë dɛɛu cï luöny bei kɛl.

³ Piɛŋkï kë lueel ë Bɛ̈nydït de rɛm an, Kɔc ë karɛc looi abäk keek dum yiic në wecök në ee köölë. Abïk aa abuui tei në wecök kööl lan ee kakë looi.

⁴ Takkï wenïïm në lööŋkï, lööŋ ɣɔn gäm awundiën Mothe në kuur ë Thinai, në biäk bïï kɔc ke Yithriɛl ke riëëu kedhie.

⁵ Të ŋoot ë kööldïït ë Bɛ̈nydït wei, kööl tuc thok, wek bä tuöc tiët Elija.

⁶ Abï mïth bɛ̈n määt në wärken, ku mɛ̈ɛ̈t wärken ë mïth në mïthken. Na cie yen, pinydun abä bɛ̈n riɔ̈ɔ̈k në aciɛɛn.