Malakai 3 - JAM DE NHIALIC 2011

¹ Go Bɛ̈nydït de rɛm ke yɔ̈ɔ̈k an, “Piɛŋkï, Yɛn bï tunydï tuɔɔc tueŋ, le kueerdï kiɛm piny. Ku bïï löŋdiën cï mac bɛ̈n caal, yen tuny nhiaarkï. Ku ëtɛ̈ɛ̈n, Bɛ̈nydïïtduön kaarkï abï dap guɔ bɛ̈n Luaŋdït ëthiäu.

² Ku eeŋa bï kööl ë bɛ̈nde lëu në guöm? Ku eeŋa bï kɔ̈ɔ̈c lëu të len tuöl? Abï ciët manydïït de thɛ̈th ee yen ateek lëëŋ, ku cït athabun ril ye lupɔɔ waak abïk ɣɛɛr.

³ Abï bɛ̈n nyuc, ku guiir löŋ de kɔc cït man ye raan ateek lëëŋ. Abï Lebai bɛ̈n waak abïk lɔ wic, cït man ye adhääp lëëŋ abï lɔ bilbil. Ku ëtɛ̈ɛ̈n, keek abïk Bɛ̈nydït aa gäm miɔ̈c lɔgɔk.

⁴ Ku miɔ̈c de Jeruthalem ayï piny de Juda ëbɛ̈n abï Bɛ̈nydït keek jɔ ya gam në miɛtëpiɔ̈u cït man ɣɔn tueŋ në run ɣɔn cï tëëk.

⁵ Ku lueel ë Bɛ̈nydït de rɛm an, “Ku Yɛn bï lɔ bɛ̈n ë welɔ̈m, bä löŋdun week bɛ̈n guiir, Yɛn bï tït ke yiëth dap bɛ̈n gaany, ku kɔc ee diëër lei kɔɔr, ku kɔc ee kuëëŋ në lueth, ayï kɔc ee kɔc luui keek cam në ariöp de luɔiden, ku kɔc ee diëër cïn nïïm röör yɔŋ, ku yɔŋkï abɛɛr, ku pënkï kamaan yinyden, ku cïkï riɔ̈c në Yɛn.

Miɔ̈c de Töŋ Thiëër ë Käŋ

⁶ Kë cï Bɛ̈nydït de rɛm lueel kï an, “Yɛn cïï rɔt ee waar Yɛn Bɛ̈nydït. Yɛn kën jaai në löŋ cä kɔn mac wokë week. Ka week, wek käu de Jakop, yen kë kɛ̈n Ɛn week riɔ̈ɔ̈k ka.

⁷ Wek ë lööŋkï rɛɛc, ku cäkï keek döt, gɔl në kuarkun alee guut ë week. Puɔ̈kkï wenïïm Ɛn, ku Yɛn bï Yanɔm puɔ̈k week. Ku wek ee bɛ lop an, ‘Buk wonïïm puk adï?’

⁸ Duëër raan Nhialic kuɛ̈l? Wek ë Ya kuɛ̈l. Ku yak lop an, cuk Yïn kuɛ̈l adï? Wek ë Ya kuɛ̈l në miɔ̈c de töŋ thiëër ë käŋ, ku kuɛ̈lkï Yɛn në miɔ̈c.

⁹ Aciɛɛn anu në wegup, në luɔi cä wek Ɛn kuɛ̈l jurdun wedhie.

¹⁰ Acï Bɛ̈nydït de rɛm lueel an, Bɛ̈ɛ̈ikï miɔ̈c de töŋ thiëër ë käŋ nyïïn kedhie në Luaŋdiën dït yic, ke ɣöndï ë bï thiäŋ ke kacaam. Ku thɛmkï Yɛn, tiëŋkï na cä awëër nyïïn ke tënhial bï liep, ku luööŋ athiɛɛi piny ëbɛ̈n, abäk nïïm ciën të tääu wek ke thïn.

¹¹ Ku Yɛn cïï käm bï tɔ riäk rɛɛpkun. Ku tiimkuön yak com domic abïk duɔɔny në mïth. Yen kë cïï Bɛ̈nydït de rɛm lueel ka.

¹² Ku juöör ke piny nɔm kedhie, abïk week aa cɔɔl an kɔc cï thieei, në luɔi bï pinydun aa piny läk arëët, kë lueel ë Bɛ̈nydït de rɛm ka.

Nhialic Athɛn Kokdepiɔ̈u

¹³ Go Bɛ̈nydït lueel an, “Wek ee Yɛn jääm guöp në jam rac, ku yak bɛ lop an, eeŋö cuk luɛɛl ë Yïguöp?

¹⁴ Acäk lueel an, luɔi luui ë raan Nhialic ee kë cïn naamde, eeŋö buk yök të lueel wok en an loiku ka cï lueel an loi keek? Ku eeŋö buk yök të nyuth wok röt Bɛ̈nydït de rɛm nɔn cï wok piɔ̈ɔ̈th diu në karɛc cuk looi?

¹⁵ Cït man ye wok en tïŋ ënɔɔnë, luɔi yen kɔc ɣɛ̈ɛ̈c kenïïm kek ee röt yök cït ka cï thieei. Ku kɔc ee karɛc looi kek akueth, ku ayek Nhialic them aya në karɛckɛn yek looi, ku cïn kë yök keek.’

¹⁶ Ku ëtɛ̈ɛ̈n, kɔc ee Bɛ̈nydït riëëu acïk bɛ̈n jam në röt kapäc në baŋ de ee kakë, go Bɛ̈nydït kë luelkï piŋ. Rin ke kɔc ee Bɛ̈nydït riëëu, ku dhuëŋkï guöp acï keek gäär piny në awerekic në Bɛ̈nydït nɔm.

¹⁷ Ku lueel ë Bɛ̈nydït de rɛm an, “Abïk aa kɔc piɛthkï, në kööl bï Yɛn luɔi looi. Yɛn bï piɔ̈u kok wo keek arëët cït man ye wun meth piɔ̈u kok ke wëndɛn ee yen ŋiëc luööi.

¹⁸ Ku ëtɛ̈ɛ̈n, wek bï kë loi rɔt jɔ ŋic në kaam de raan ɣer piɔ̈u kekë raan ee karɛc looi, ku kaam de raan ee Nhialic luööi kekë raan cïï Nhialic ee luööi.