Malakai 2 - JAM DE NHIALIC 2011

¹ Ku wek bäny ke kake Nhialic.

² Aluɛɛl yɛn Bɛ̈nydït de rɛm an, “Wek yɔ̈ɔ̈k an, të kɛ̈n wek jamdï piŋ, ku kɛ̈nkï tääu në wepiɔ̈ɔ̈th ëgɔk, ago rinkï dhuëëŋ yök, we bä cieen, ku ciɛɛn kapiɛth ye kɔc ke yiɛ̈n week ɣön ë Nhialic. Ku ë yic, acä ke guɔ cieen, në luɔi kën kek jamdï tääu në kepiɔ̈ɔ̈th.

³ Piɛŋkï, Yɛn bï mïthkun luöi këtuc. Wek bä rɔɔth gup ë wɛi de thök yak näk Ɛn, yäär Ɛn week, ku dɛɛny we wei ë dhuur nɔm në wɛi ëtök.

⁴ Yen abä wek en jɔ ŋic ë gɔk nɔn cän we yɔ̈ɔ̈k, ke löŋdï ë cï bï dhoŋ kɔ̈u, löŋ wään cä mac wokë käu de Lebai, kë lueel ë Bɛ̈nydït de rɛm ka.

⁵ Ku lueel ë Bɛ̈nydït de rɛm an, “Yɛn aa mac löŋdï wokë Lebai. Ku löŋ ë macku aaye löŋ de pïïr, ku mät. Yen löŋ ë gäm keek ka, ke ke bï Ya aa riëëu. Agokï Yɛn bɛ̈n aa riëëu guöp, ku dhuëŋkï rinkï.

⁶ Aake ye wëët në yith, ku acïn lueth ë yek töör. Aake ye cath në Yɛn apiɛth, ku loikï yith. Agokï kɔc juëc tɔ päl karɛcken.

⁷ Ku bäny ke kake Nhialic kek arɔ̈ŋ bïk kɔc aa wɛ̈ɛ̈t në yith ke Nhialic. Ku kɔc aröŋkï bïk lɔ piŋ në wëët de wël ke Nhialic tëde keek, në luɔi ye kek tuny de Bɛ̈nydït de rɛm.

⁸ Acï Bɛ̈nydït de rɛm lueel an, “Ku ënɔɔnë, wek bäny ke kake Nhialic, wek ë röt yal wei në kueer yic yic. Ku wëëtdun ë kɔc juëc thɛl ë luɔi de karɛc yiic. Wek ë löŋ wään cä mac wokë kuarkun Lebai dhoŋ kɔ̈u.

⁹ Yen acän week tɔ biɔɔn ë kɔc gup kedhie, ku ta keek dhäl wegup. Në biäk kɛ̈n wek kuɛɛrkï kuany yiic ëgɔk, ku në luɔi ya wek lööŋkï kuɛ̈ɛ̈ny yiic në wëëtdun yic.

Kɔc Acïnkï Adöt në Nhialic

¹⁰ Go Malakai lɛ̈k kɔc ke Yithriɛl an, “Wääda cie tök wodhie? Cie Yen ë Nhialic töŋë, Yen ë cak wook wodhie? Ka eeŋö tɔ we dhoŋ löŋ cïï Nhialic gäm wärkuɔ kɔ̈u, wek kën kapiɛth ŋiɛckï an duɛ̈ɛ̈rkï ke luöi röt në kɛmkun wapäc looi?

¹¹ Juda ë löŋ dhoŋ kɔ̈u. Kërac arëët acï Yithriɛl looi, ku looi Jeruthalem aya. Juda ë tëɣeric tɔ rac, ɣöndɛn nhiɛɛr, aake cï duet ee yiëth kɔ̈k lam thiaak.

¹² Yen abï Bɛ̈nydït kɔc ee ka cït ee kakë looi nyaai nyïïn në Yithriɛlic, ke bï ciën miɔ̈cdɛn bïk bɛ gäm Bɛ̈nydït de rɛm.

¹³ Ku däŋ yak looi kï: wek ee yïïŋ ë Bɛ̈nydït mool nɔm në pïïu ke wenyïïn. Ku wek ee röt näk piny në dhiëëu ku kiɛɛu, në baŋ cïï Bɛ̈nydït miɔ̈cdun ee bɛ gam në miɛtëpiɔ̈u, ku cïnic këde thïn kekë miɔ̈cduön yak gam.

¹⁴ Ku wek ee bɛ lop an, eeŋö cïï miɔ̈cda ee bɛ gam? Ee luɔi ë ye Nhialic raan ee daai në kë loi rɔt në kaamdu wekë tiiŋduön riëëc wek, tiiŋ cï päl wei ënɔɔnë. Ku ee yen ee yï kuɔny, ku ye tiiŋduön de löŋ.

¹⁵ Kën Bɛ̈nydït ɣöndun deer nɔm në Yen? Ku eeŋö tɔ ë Nhialic keek ee tök? Aa tɔ keek ee tök agokï mïth ŋic Nhialic dhiëëth. Ka week tiɛtkï röt apiɛth, ku duökï diëërkuön riëëc wek pɛ̈l wei.

¹⁶ Acï Bɛ̈nydït Nhialic de Yithriɛl lueel an, “Yɛn man päl ë diäär ku teer. Yɛn man raan ee rɔt gëër në awuɔɔu. Yen kë cï Bɛ̈nydït de rɛm lueel ka. Ka week tiɛtkï röt apiɛth, ku duökï diëërkun pɛ̈l wei.

Kööl de Guiëër ë Löŋ acï Thiɔ̈k

¹⁷ Wek ë Bɛ̈nydït nuaan në jam. Ku wek ee lop an, “Cuk nuaan adï? Acäk nuaan në luɔiduön ya wek en lueel an, “Kɔc ee karɛc looi ëbɛ̈n, kek aye kɔc piɛth tëde Bɛ̈nydït. Ku luɛlkï an, ye Bɛ̈nydït piɔ̈u miɛt ke keek. Ku ayï lop ya wek lop ayadäŋ an, “Nu Nhialic ë nou, Nhialic de yic?