Malakai 1 - JAM DE NHIALIC 2011

¹ Jam de Bɛ̈nydït kï, jam ɣɔn lëk ë tuc Malakai kɔc ke Yithriɛl.

Nhiëër nhiɛɛr ë Bɛ̈nydït Yithriɛl

² Aye Bɛ̈nydït lueel an, “Wek nhiaar. Ku wek ee bɛ lop an, ‘Nhiaar wook adï?’ Ethau ë cie mänhë Jakop? Aguɔ Jakop nhiaar ku lac,

³ ku rɛɛc Ethau, ku riääk wundɛn ë kuur, ku ta pinyden dɔ̈ŋ kekë läi roor.

⁴ Tɛk däŋ, duëër kɔc ke Edom, dhiën de Ethau, lueel an, “Na cakaa nɔn cï wo riɔ̈ɔ̈kë, wok bï bɛ yïk. Ku kë cï Bɛ̈nydït de rɛm lueel kï an, “Tɛk däŋ bïk keek bɛ nyɔk në yïk, ku abä keek bɛ nyɔk në riäk riääk Ɛn keek, man abï keek aa cɔɔl an kɔc rac, ku cɔl keek an jur ye Bɛ̈nydït gɔ̈th ke keek aɣet athɛɛr.

⁵ Abäk tïŋ në wenyïïn wapäc, wek dhiën ë Jakop, ka bäk lueel an, Bɛ̈nydït ade nɔm riɛl ayï wuöt kɔ̈k yiic biic të cie piny ë Yithriɛl!

Bɛ̈nydït Agäk Bäny ke kake Nhialic

⁶ Go Bɛ̈nydït de rɛm bäny ke kake Nhialic luɔp an, “Meth cïï wun ee riëëu? Ku raan ee bɛ̈ny luööi cïï bɛ̈nyde ee riëëu? Na Ya Wuöördun, ke rïïu riëëu wek Ɛn akou? Ku na Ya Bɛ̈nydïtdun, ke riɔ̈ɔ̈cduön ya wek riɔ̈ɔ̈c në Yɛn akou? Wek ë Ya dhɔ̈l guöp wek bäny ke kake luɔidï. Ku wek ee lop an, ‘Cuk Yï dhɔ̈l, ee dhääl yïn dï?’

⁷ Ku wek ee miɔ̈c cï dhiöök gam në yïïŋdï nɔm. Ku luɛlkï an, ‘Cuk yïk dhiöök adï?’ Wek cï yïïŋdï tɔ ye ɣɔ̈ric.

⁸ Go Bɛ̈nydït de rɛm lueel an, Nɔn ya wek weŋ cɔɔr gam ke ye miɔ̈c, kënë yak tak cie awäc? Ku ee nɔn ya wek thɔ̈ɔ̈k ŋɔl gam, ku nɔn yen thɔ̈ɔ̈k de guöp jɔk, kënë yak yök cie awäc? Thɛmkï da, bäk ɣɔ̈k cït keek gäm bɛ̈nyduön mac week! Yak yök duëër piɔ̈u miɛt ke week? Duëër keek gam tëde week?

⁹ Kë cïï Bɛ̈nydït de rɛm lueel kï an, “Ku ënɔɔnë, läŋkï Nhialic në wepiɔ̈ɔ̈th, ke bï piɔ̈u bɛ kok kekë week. Yak tak duëër week gam në ee miɔ̈cduön cït kë yak gäm Ee në?

¹⁰ Ago Bɛ̈nydït de rɛm lueel an, “Cïn raan tök në weyiic, raan bï Luaŋdït thiöök thok, ago ciën many ë ɣɔ̈ric bï bɛ kooth në yïïŋdï nɔm? Yɛn cïï piɔ̈u mit wokë week, ku acïn miɔ̈cduön bä gam tëde week.

¹¹ Juöör ke piny nɔm ëbɛ̈n, gɔl të lɔ aköl amiäk lee të lɔ aköl athɛ̈i, adhuëŋkï rinkï. Yɛn ye nyuöp wal ŋïr, ku yïnë ya miɔ̈c lɔ wai në piny nɔm ëbɛ̈n. Në biäk ye rinkï dhuëëŋ në juöör ke piny nɔm kedhie, kë lueel ë Bɛ̈nydït de rɛm ka.

¹² Ku ayak dhiöök, në luɛɛl ya wek en lueel an cï yïïŋ de Bɛ̈nydït wuɔɔk, ku takï kacaam tɔ̈u në yenɔm ee ka ɣäär yiic.

¹³ Ku ayak lueel an, ‘Wok ë jɔ bäp në ee kakë kedhie!’ Ku wɛ̈lkï wekɔ̈ɔ̈th Ɛn. Kaarkï bä ɣɔ̈kkun gam, ɣɔ̈k ë rum, ku thök ŋöl, ku thök de gup jɔɔk yak yiɛ̈n Ɛn ke ke ye miɔ̈c, yak tak bä ke gam tëde week? Kë lueel ë Bɛ̈nydït de rɛm ka.

¹⁴ ku lueel ë Bɛ̈nydït de rɛm an, Aciɛɛn abï tɔ̈u kekë raan ee mɛth. Raan de nɔm nyɔk, ku nɔn yen miɔɔr në lunyde yic, nyɔɔŋ ë cï yen kuëëŋ an bï gam, ke be pɔ̈l ku gëm Ɛn thɔ̈ɔ̈k de guöp tëdak. Wek ŋic Ɛn nɔn yan Meliŋ dït, ka juöör ke pinynɔm ëbɛ̈n ariɔ̈ckï në Yɛn.