Mak 9 - JAM DE NHIALIC 2011

¹ Go lɛ̈k keek an, “Wek yɔ̈ɔ̈k ëyic an, Ade kɔc kɔ̈k ë kɔc yiic kɔc kääc eetënë, kɔc cï thuɔɔu bï thiëëp, të ŋoot kek ke ke kën ciɛɛŋ de Nhialic tïŋ ke bɔ̈ kekë riɛldït.”

Yecu Acï Yeguöp Waar

² Na wën, aacï nïn aa dhetem, ke Yecu nöm Petero, ku Jakop, ku Jɔn, leer keek ë kuurdïït bäär nɔm kapäc pei. Go yeguöp waar aye guöp däŋ ë kenïïm:

³ go lupɔɔke lɔ riauriau, abïk ɣɛɛr ëwic, awär ɣɛɛr duëër raan lupɔɔ tɔ ɣer.

⁴ Na wën, ke Elija tul ë kelɔ̈m kekë Mothe: ku ajamkï në Yecu.

⁵ Go Petero bɛ̈ɛ̈r, ku lëk Yecu an, “Bɛ̈ny, apiɛth nɔn tɔ̈u wok eenë: jɔku kɛ̈ɛ̈t yïk kadiäk, ye tök këdu, ku tök këde Mothe, ku tök këde Elija.”

⁶ Akuc löŋ piɛth adï cï lueel, acïk guɔ riɔ̈ɔ̈c arëët.

⁷ Na wën, ke luät bɔ̈ ku kum ke piny: ku bɔ̈ röl ë luätic, röl lueel en an, “Wëndiën nhiaar kï, eekënë: yak këde piŋ!”

⁸ Na wën, ee tëthiinë, acïk piny liääp, ke cïn raan cïk bɛ tïŋ, ee Yecu etök kekë keek.

⁹ Na wën, abïk piny ë kuurdït nɔm, ke ke lom Yecu thook an, “Ë cïn raan lɛ̈kkï ka cäk tïŋ, të ŋootë Wën ë Raan ke kën rɔt guɔ jɔt ë kɔc cï thou yiic.”

¹⁰ Gokï jamë muk ë keyäc, ke ke ye röt thiëëc an, “Jön jɔtë raan rɔt ë kɔc cï thou yiic ee käŋö?”

¹¹ Gokï thiëëc an, “Eeŋö ye kɔc ee löŋ gɔ̈ɔ̈r e lueel an, bï Elija dhil kɔn bɛ̈n?”

¹² Go ke yɔ̈ɔ̈k an, “Elija abï kɔn bɛ̈n ëyic, go käŋ bɛ puk tɔ ke piɛth kedhie: ku cï gɔ̈ɔ̈r adï në këde Wën ë Raan, nɔn bï en kajuëc dhil guum, ku dhäl guöp?

¹³ Ku wek yɔ̈ɔ̈k an, Elija ë guɔ bɛ̈n, ku acïk luöi këde kepiɔ̈ɔ̈th, cït man cï e gɔ̈ɔ̈r në këde.”

Yecu acï Mɛnh de Guöp Jɔŋ rac tɔ Waar

¹⁴ Na wën, aa cïk bɛ̈n të nu kɔcpiööcë, ke ke tïŋ kut dïït ë kɔc acïk keek tuɔɔk, ku tïŋkï kɔc ee löŋ gɔ̈ɔ̈r ateerkï në keek.

¹⁵ Na wën, ee tëthiinë, acï kut ë kɔc e tïŋ, ke ke gäi arëët, gokï riŋ ke ke lɔ të nu yen lek mɔ̈ɔ̈th.

¹⁶ Go kɔc ee löŋ gɔ̈ɔ̈r thiëëc an, “Eeŋö guiɛɛrkï në keek?”

¹⁷ Go raan tök ë kut ë kɔc yiic bɛ̈ɛ̈r an, “Bɛ̈ny ee wëët, yɛn ë wëndï bɛ̈ɛ̈i tëde yïn, wën cï jɔŋ rac dɔm jɔŋ cïn thok.

¹⁸ Ku të de en të dɔm en en, ke deeny piny: ago ayɔ̈k gut ë yethok, ku reem e lec, go lɔ ke nɔl: guɔ lɛ̈k kɔckuön ë piööcë luɔi bï kek e cieec, ku akënkï lëu ë ciëc.”

¹⁹ Go bɛ̈ɛ̈r, lueel an, “Rem reec gäm oou! Bä ceŋ ë weyiic ë run kadï? Bä këdun guum ë run kadï? Bɛ̈ɛ̈ikï të nuö yɛn!”

²⁰ Gokï bɛ̈ɛ̈i të nu Yecu. Na wën, aacï jɔŋ rac Yecu tïŋ, ke jɔ meth tɔ lɔ juɔ̈kläŋ, go meth wïïk, ku dɛɛl rɔt piny abï ayɔ̈k gut ë yethok.

²¹ Go wun thiëëc an, “Ye run dï run ë dɔmë kënë ye?” Go lueel an, “Të wään ee yen meth.

²² Ku aye cool ë cuat mɛɛc ayï pïïu yiic an, nɛ̈k. Ku na de kë duɛ̈ɛ̈rë lëu, ke yï kok piɔ̈u we wook, ago wo kony!”

²³ Go Yecu yɔ̈ɔ̈k an, “Të ŋic yïn gäm! Käŋ ayek lëu kedhie tëde raan ë gäm.”

²⁴ Go wun meth cööt ënɔnthiinë, go pïïu lony ë yenyin, ku lueel, an, “Acä gam, Bɛ̈nydït, kony ɛn në kuny kuöc ɛn gäm!”

²⁵ Na wën, aacï Yecu kut ë kɔc tïŋ nɔn bï kek ë ke riŋ ëtök, ke jäny jɔŋ rac yöök an, “Yïn jɔŋ miŋ cïn thok, yïn yɔ̈ɔ̈k an, Bä bei, ku du be lɔ ë yeguöp!”

²⁶ Go jɔŋ rac kiiu, ku tɔ meth lɔ juɔ̈kläŋ, ku jɔ bɛ̈n bei: arëk abï ë tëdït ë kɔc juëc e lueel an, “Raan acï thou!”

²⁷ Go Yecu meth dɔm ciin, ku jɔt nhial, ago rɔt jɔt.

²⁸ Na wën, aacï bɛ̈n ɣöt ke thiëëc kɔckɛn ë piööcë pei kapäc an, “Eeŋö kën wok e lëu ë ciëc?”

²⁹ Go ke yɔ̈ɔ̈k an, “Kë cït ee kënë acïn kë duëër e tɔ bɔ̈ bei, ee lɔ̈ŋ etök kekë rɛɛc reec ë raan cäm.”

Yecu Abe Jam në Biäk de Thonde

³⁰ Na wën, aa cïk jäl ëtɛ̈ɛ̈n, ke ke jɔ tëëk ë Galili, ku acïï kɔɔr luɔi bï en dɛ raan bï e ŋic.

³¹ Ee kɔc kɔckɛn ë piööcë wɛ̈ɛ̈t, yöök keek an, “Wën ë Raan acï tääu ë kɔc cin, ku abïk nɔ̈k, na miäk, aacï nɔ̈k, ka bï rɔt bɛ jɔt ë nïn ee kek diäk.”

³² Ku akënkï jamë yökic, ku acïk riɔ̈ɔ̈c ë thiëc thiëëc kek en.

Eeŋa Yen Dït?

³³ Gokï bɛ̈n Kapernaum, na wën, aa cïk lɔ ɣööt, ke ke thiëëc an, “Eeŋö ë tɛɛrkï wapäc wën kueer?”

³⁴ Gokï lɔ lik: luɔi ee yen dït en ë teerkï kapäc kueer.

³⁵ Go nyuc piny, ku cɔɔl kɔc kathiëër ku rou, ku yöök keek an, “Na de raan kɔɔr luɔi bï en lɔ tueŋ, ke ye tɔ̈u ë kɔc cök ciëën kedhie, abï aa mɛnh ë kɔc luööi kedhie.

³⁶ Ku nööm mɛnhthiinakäŋ, tɛ̈ɛ̈u ë keyiic cil: na wën, ke boom, ku yöök keek an,

³⁷ Raan ëbɛ̈n raan bï mɛnhthiin tök dɔm, mɛnh töŋ cït ee mɛnhë, në baŋ de rinkï, ka ye yɛn ë dɔm, ku raan dɔm ɛn, acie yɛn ë dɔm, ee raan ë toc ɛn yen ë dɔm.”

Raan cïn Ater ke Wook ee Raanda

³⁸ Go Jɔn lueel an, “Bɛ̈ny ee wëët, wo ë raan tïŋ aciec jɔɔk rac në rinku, raan cïï wook ë kuany cök: agoku pëën, luɔi cïï en wook ee kuany cök.”

³⁹ Go Yecu lueel an, “Duökï pën: acïn raan bï luɔi dït looi në rinkï, ku duëër a dap lɛ̈k kërac.

⁴⁰ Raan cïn ater ke wook en aye raanda.

⁴¹ Raan bï week miɔɔc ë bïny ë pïïu ka dɛkkï në rinkï, luɔi aa wek kɔc ke Kërtho, wek yɔ̈ɔ̈k ë yic an, Acï bï tɔ̈u ke cïn ariöpde.

Thëm ë biäk bïï ë Raan tɔ Wäc

⁴² Ku raan bï mɛnh tök ë mïththiikë yiic tɔ loi kërac mïth gam ɛn, aduëër ŋuän tëde yen, të mɛc gök dïït ë pil ë guär ë yeyeth, ku cuɛtë wïïr.

⁴³ Ku na yïcin, të tɔ en yï loi kërac, ke tɛɛmë wei: aduëër ŋuän tëde yïn, të le yïn tëde pïïr ke yï cïn ciin tök, në luɔi bï yï cath we cin kaarou, ago lɔ giɛnayic (en aye tërac ëtaiwei) tëde many cïï duëërë lëu në näk anande,

⁴⁴ të cïï thiënde ee thou, ku cïï mac ë nɔ̈k anande.

⁴⁵ Ayï yïcöök, të tɔ en yï loi kërac, ke tɛɛmë wei: aduëër ŋuän tëde yïn, të le yïn tëde pïïr, ke yï cïn cöök tök, në luɔi bï yïn dɛ cök kaarou, ku bï yï cuat ë giɛnayic,

⁴⁶ të cïï thiënde ee thou, ku cïï mac ë nɔ̈k anande.

⁴⁷ Ayïk yïnyin, të tɔ en yï loi kërac, ke tukë bei: aduëër ŋuɛ̈ɛ̈n tëde yïn, të le yïn ë ciɛɛŋ de Nhialic yic wekë nyin tök, në luɔi bï yïn cath we nyïïn kaarou, ku bï yï cuat ë giɛnayic,

⁴⁸ të cïï thiënde ee thou, ku cïï mac ë nɔ̈k anande.

⁴⁹ Raan ëbɛ̈n abï tɔ wac ë mac, ku kë cï lam ëbɛ̈n ku näk abï tɔ wac ë amilɔ.

⁵⁰ “Amilɔ yen apiɛth: ku na cï amilɔ guɔ liɛɛr ë thuat, bäk tɔ wac ë ŋö? Yak dɛ amilɔ ë weyiic, ku yak rëër ëdïu wapäc.”