Mak 8 - JAM DE NHIALIC 2011

Yecu Acɛ̈ɛ̈m Aguum Kaŋuan

¹ Na ɣɔn ë aköölkë, acï kut dïït ë kɔc bɛ guëër, ku cïnkï këcam, go Yecu kɔckɛn ë piööcë cɔɔl tëde yen, ku yöök keek an,

² “Yɛn ë piɔ̈u kok wo kut ë kɔc, luɔi cï kek tɔ̈u në yɛn, nïn acïk aa diäk ënɔɔnë ku acïnkï këcam:

³ ku të ta yɛn keek jël lek paanden, ke ke kën kethook jak, ka bïk tiaam kueer, kɔ̈k ë keyiic aake bɔ̈ tëmec.”

⁴ Go kɔckɛn ë piööcë bɛ̈ɛ̈r an, “Ee tënou bïï raan këcam yök, këcam bï kɔcke tɔ kueth ë jɔ̈ɔ̈ric eetënë?”

⁵ Go ke thiëëc an, “Ee kuïn cï pam kadiaa cath në week?” Gokï bɛ̈ɛ̈r an, “Ee dhorou.”

⁶ Go kut ë kɔc yɔ̈ɔ̈k bïk nyuc piny: na wën, ke kuany kuïïn cï pam kadhorou, ku jɔ Nhialic leec, go ke wääk yiic, ku gëm keek kɔckɛn ë piööcë, bïk ke tääu ë kɔc nïïm, gokï ke tääu ë kut ë kɔc nïïm.

⁷ Ku ciɛthkï në rec thii töktöök: na wën, ke ke thieei, ku jɔ ke yɔ̈ɔ̈k an, bïk tääu ë kenïïm ayadäŋ.

⁸ Gokï cam, abïk kuɛth: gokï kak athueithuei wën cï döŋ kuany ë diööny yiic kadhorou.

⁹ Ku kɔc wën cï cam acïtkï aguum kaŋuan: ku jɔ ke tɔ jël.

¹⁰ Go lɔ ë abëlic ënɔnthiinë kekë kɔckɛn ë piööcë ëtök, ku bï paan ë Dalmanutha.

Kɔc ke Parithai Akɔɔrkï Gök

¹¹ Na wën, ke Parithai ë ke bɔ̈, bïk ku gɔlkï teer në yen, akɔɔrkï këgök gɛ̈iyë tëde yen këgök bɔ̈ nhial, them kek en.

¹² Go wëi nhial arëët, ku lueel an, “Eeŋö kɔɔr rem de ënɔɔnë këgök gɛ̈iyë? Wek yɔ̈ɔ̈k ëyic an, “Acïn këgök gɛ̈iyë bï gam rem de ënɔɔnë!”

¹³ Go ke nyääŋ piny, ku be lɔ abëlic, jël le lɔɔk.

Luɔu de Parithai ku Ɣerod

¹⁴ Na wën, acïk kuïn ruööi, ku acïn kë cath ke keek ë abëlic, ee kuïn tök tei kuïn cï pam.

¹⁵ Go ke yɔ̈ɔ̈k an, “Yak cath aŋiɛckï, yak röt tiit ë luɔu de Parithai, ayï luɔu de Ɣerod.”

¹⁶ Gokï jam kapäc, luelkï an, “Ee luɔi cïn wok nïïm kuïn.”

¹⁷ Na wën, aacï Yecu ye ŋic, ke thiëëc keek an, “Eeŋö tɛɛrkï në cïn ciën wek nïïm kuïn? Ŋuɔɔtkï ë we kuc käŋ, ku cäkï käŋ ë piŋ? Ŋuɔɔtkï ë we ril piɔ̈ɔ̈th?

¹⁸ Wek de nyïïn ku cäkï ye daai? Ku we de yïth, ku cäkï ye piŋ? Ku cäkï wenïïm ee tak?

¹⁹ Wään wääk ɛn kuïïn cï pam yiic kadhïc ë aguum kadhïny de kɔc yiic, cäk diööny kuany kadiaa, diööny cï thiäŋ në kak athueithuei?” Gokï lueel an, “Thiëër ku rou.”

²⁰ Ayï wään cän kuïïn wääk yiic kadhorou ë aguum kaŋuan de kɔc yiic, cäk diööny kuany kadï, diööny cï thiäŋ në kak athueithuei?” Gokï lueel an, “Dhorou.”

²¹ Go ke thiëëc an, “Ŋuɔɔtkï ke we cïï käŋ ee piŋ?”

Yecu Atɔ Cɔɔr Waar ë Bethaida

²² Gokï bɛ̈n Bethaida. Na wën ke ke bïï cɔɔr tëde yen, ku jɔkï lɔ̈ŋ ke bï jak.

²³ Go cɔɔr dɔm ciin, ku thël bei wutic, na wën, ke ŋuut nyin, ku thɛny ecin ë yeguöp, ku thiëëc an, “De kë cï tïŋ?”

²⁴ Go enyin jɔt, ku lueel an, “Yɛn woi kɔc, ee luɔi aa yɛn ke tïŋ acït tiim, ke ke cath.”

²⁵ Na wën, ke be ecin thany ë yenyin, ku tɔ jɔt enyin. Go nyin bɛ lɔ tëden, ku jɔ kɔc woi ëgɔk kedhie.

²⁶ Go tɔ lɔ paande, ku lueel an, “Du lɔ wutic, ku du lëk raan däŋ nu wutic ayadäŋ.”

Petero Alek Yecu nɔn Yen Kërtho

²⁷ Na wën, ke Yecu jël kekë kɔckɛn ë piööcë lek bɛ̈i ke Kaitharia de Pilip: go kɔckɛn ë piööcë thiëëc kueer an, “Ye kɔc lueel, an, aa ŋa?”

²⁸ Gokï bɛ̈ɛ̈r an, “Aye kɔc kɔ̈k lueel an ye Jɔn Baptith: ku lueel kɔc kɔ̈k an ye Elija, ku lueel kɔ̈k an ye Raan töŋ de tït.”

²⁹ Go ke thiëëc an, “Na week, yak lueel an, aa ŋa?” Go Petero bɛ̈ɛ̈r lueel an, “Yïn ee Kërtho.”

³⁰ Go ke lom thook an, “Ë cïn raan lɛ̈kkï yen.”

Yecu Ajam në Biäk de Nuande ku Thonde

³¹ Na wën, ke ke jɔ gɔl ë wëët an, “Wën ë Raan abï kajuëc dhil guum, ku bï dhil rɛɛc ë röördït, ku bänydït ke ka ke Nhialic, ku kɔc ee löŋ gɔ̈ɔ̈r, ku bï dhil nɔ̈k, na miäk, acï nïn aa diäk, ka bï rɔt bɛ jɔt.”

³² Ë jamë lueel a piŋ raan ëbɛ̈n. Na wën, ke Petero dɔm Bɛ̈ny cin, ku jɔ jɔ̈ɔ̈ny.

³³ Go rɔt puk, ku woi kɔckɛn ë piööcë, ku jɔ Petero jɔ̈ɔ̈ny, lueel an, “Lɔ ë yakɔ̈u ciëën, Catan: acie ka ke Nhialic kek tuɔɔmë ë yïpiɔ̈u, ee ka ke kɔc tei!”

³⁴ Go kut ë kɔc cɔɔl kekë kɔckɛn ë piööcë, ku yöök keek an, “Na de raan kɔɔr luɔi bï en a biɔɔth cök, ë ye rɔt nyɔ̈ŋ, ku jɔt timdɛn cï rïïu nɔm, ku jɔ a kuany cök.

³⁵ Raan ëbɛ̈n raan kɔɔr luɔi bï en wëike kony, ka bï wëike mɔ̈ɔ̈r, ku raan ëbɛ̈n raan bï wëike mɔ̈ɔ̈r në biäkdï, ku në biäk de wëlpiɛth, ka bï wëike kony.

³⁶ Ku piathde akɔ̈u tëde raan, të ciɛm en piny nɔm ëbɛ̈n, ku mɛ̈ɛ̈r wëike?

³⁷ Ku ye ŋö duëër raan gaam wɛɛr en wëike?

³⁸ Ku raan ëbɛ̈n raan ë yäär ë këdï ku në wëlkï ë remë yic rem ë diëër lei kɔɔr, ku ye rem ë kërac dap looi, ke Wën ë Raan abï yäär ë këde aya, Të nu yen në dhuëëŋ de Wun kekë tuucnhial ɣeriic.”