Mak 7 - JAM DE NHIALIC 2011

Wëët de Kɔc Thɛɛr

¹ Na wën, ke Parithai guëër të nu yen, kekë kɔc kɔ̈k kɔc ë löŋ gɔ̈ɔ̈r, kɔc ë bɔ̈ Jeruthalem.

² Ku acïk kɔc kɔ̈k ë kɔckɛn ë piööcë tïŋ ke ke ye kuïn cam ë ke rac cin, yen aye cin kënë piny.

³ Ku Parithai, kekë Judai ëbɛ̈n, acïkï ye cam, të ŋoot kek ë ke kën kecin piny arëët, amukkï ciɛɛŋ thɛɛr ë röördït:

⁴ ku të ye kek bɛ̈n ë thuukic, të ŋoot kek ë ke kën waak, ke ke cie cam: ku kajuëc kɔ̈k anukï, ka cïk dɔm, ku yek ke döt apiɛth, cït man ë wɛ̈k de abïïny, ku wɛ̈k de töny, ku abïïny ke malɔ̈ɔ̈ŋ, ku biök.

⁵ Na wën, ke Parithai ku kɔc ee löŋ gɔ̈ɔ̈r ke thiëckï an, “Na kɔckuön ë piööcë, eeŋö reec kek cieŋ thɛɛr ë röördït, ku yek kuïn cam ke ke kën kecin piny?”

⁶ Go ke yɔ̈ɔ̈k an, “Ee yic en kë wään lueel tiët Yithaya në këdun, wek kɔc de yäc aguk, cït man cï ë gɔ̈ɔ̈r an, ‘Kɔckë ayek a riëëu ë kethook, Ku ameckï piɔ̈ɔ̈th në yɛn.

⁷ Lam ee kek a lam ee ɣɔ̈ric tei, Ku wëëtdɛn ee kek wëët ee lööŋ ke kɔc tei!’

⁸ “We ye löŋ de Nhialic pɔ̈l, ku yak ciɛɛŋ thɛɛr ë kɔc döt aril, kë cït wɛ̈k de töny, ku abïny, ku kajuëc kɔ̈k cït ee kake ayak ke looi.”

⁹ Go ke yɔ̈ɔ̈k an, “Thieithieei, rɛɛc aa wek löŋ ke Nhialic rɛɛc, luɔi bä wek ciɛɛŋduön thɛɛr aa döt!

¹⁰ Acï Mothe luel an, Ye wuur riëëu kekë moor, ku an, Raan ee wun lɛ̈k kërac ayï man, ke näkkï abï thou.’

¹¹ Ku week ayak lueel an, Të yöökë raan wun ayï man an, Kë duɛ̈ɛ̈r gäm yïn, ke bï yï muk, ‘Acï aa Korban’ (yen aye, kë cï gäm Nhialic),

¹² ke we cïï raan be pɔ̈l ë luɔi lui en wun këdäŋ, ayï man.

¹³ Aguɔkï jam ë Nhialic tɔ cïn naamde në ciɛɛŋduön thɛɛr: ku yak kajuëc cït ëkake looi ayadäŋ.”

Kak ee Raan tɔ Nhiany

¹⁴ Go kut ë kɔc ëbɛ̈n cɔɔl të nu yen, ku jɔ ke yɔ̈ɔ̈k an, “Piɛŋkï këdï week wedhie, ku mɔ̈kkï wepiɔ̈ɔ̈th:

¹⁵ acïn kën ee lɔ ë raan guöp, kë wën nu biic, kë duëër raan tɔ rac: ee ka bɔ̈ bei ë raanic thïn, kek aye kak ee raan tɔ rac.”

¹⁶ Raan de yïth ee yen ke piŋ, ke piŋ!

¹⁷ Na wën, aacï jäl ë kut ë kɔc yiic le ɣöt, ke kɔckɛn ë piööcë ke thiëckï në kääŋë.

¹⁸ Go ke yɔ̈ɔ̈k an, “Ŋuɔɔtkï ke we kuc käŋ ayadäŋ? Kɛ̈nkï kënë yökic, an, Acïn kë ye lɔ ë raan guöp, kë wën nu biic, kë duëër raan tɔ rac:

¹⁹ luɔi kën en lɔ ë yepiɔ̈u, alɔ ë yeyäc tei, go bɛ lɔ biic ë yomic?” (Kë ë lueel en en, ee kë ë tɔ yen këcam piɛth ëbɛ̈n.)

²⁰ Go lueel an, “Kë bɔ̈ bei ë raanic, yen aye raan tɔ rac.

²¹ Ë raanic thïn, ë raan piɔ̈u thïn, yen aye täŋ rac bɛ̈n bei, kɔɔr ë diëër lei, dhööm, näŋ nɛ̈kë raan akur,

²² kuël, wui de kalei, luɔi de kërac, ruëëny, kɔ̈ɔ̈r ë kërac, tiɛɛl, lɛ̈ɛ̈t rac, luɔi ee raan rɔt tɔ dït, cïn cïnë raan nɔm:

²³ Karɛckë kedhie ayek bɛ̈n bei ë raanic thïn, agokï raan tɔ rac.”

Gäm de Tik

²⁴ Na wën, ke jɔt rɔt ëtɛ̈ɛ̈n, jël le piny de Tayer ku Thidon. Go lɔ ɣöt, ku acïn piɔ̈u luɔi bï raan e ŋic, ku acïï duëër thiaan.

²⁵ Ade tiiŋ de nyandɛn thiin cïï jɔŋ rac dɔm: na wën, aacï këde piŋ, ke jɔ guɔ bɛ̈n ënɔnthiinë, bï ku cuɛt rɔt piny ë yecök.

²⁶ Ku tiiŋë ee Girikii, aa dhiëth piny de Ponicia ë Thiriya. Go lɔ̈ŋ luɔi bï en jɔŋ rac cieec bei ë nyande guöp.

²⁷ Go yɔ̈ɔ̈k an, “Ë mïth ë ke ye kɔn kuɛth, acï piɛth të nöömë raan kuïn ë mïth, dëny jɔ̈k.”

²⁸ Go bɛ̈ɛ̈r lueel an, “Ee yic Bɛ̈nydït, ku jɔ̈k nu ë paam thar ayek cam tei në athueithuei ë both mïth!”

²⁹ Go yɔ̈ɔ̈k an, “Në baŋ de jamë, jɔ lɔ, jɔŋ rac ë jäl ë nyandu guöp!”

³⁰ Na wën, aacï lɔ ɣönde, ke yök nyande atɔ̈u piny në agen nɔm, ke cïï jɔŋ rac jäl ë yeguöp.

Yecu Atɔ Raan Miŋ Waar

³¹ Na wën, ke be jäl piny de Tayer, ku jɔ Thidon reetic, bïï Baar ë Galili, tëëk piny de Dekapoli.

³² Gokï raan bɛ̈ɛ̈i të nu yen, raan miŋ, ku cie jam apiɛth, gokï lɔ̈ŋ an, bï ecin thany ë yeguöp.

³³ Go bɛ̈ɛ̈i bei ë kut ë kɔc yiic yetök, ku tɛ̈ɛ̈u ecin ë yeguöp, go ŋuut, ku jiɛk liep.

³⁴ Na wën, ke liec paannhial, ku wëi arëët, ku yöök an, “Epatha,” an, “Liep rɔt!”

³⁵ Go yïth liep ënɔnthiinë, ku lony ke wën ë liep guut, go jɔ jam ë ka piŋ yiic.

³⁶ Go ke lom thook an, Ë cïn raan däŋ lɛ̈kkï yen, ku lum lom en kethook arëët, yen aye kek jam lɔ thäi piny arëët.

³⁷ Acïk gäi ë gäi cïï themë thok, ku luelkï an, “Acï këriëëc tiiŋic ëbɛ̈n, acakaa mïŋ aye ke tɔ piŋ, ku tɔ kɔc cïn thook jam!”